ਈ. ਡੀ. ਤੇ ਐਨ.ਆਈ.ਏ. ਵਰਗੀਆਂ ਏਜੰਸੀਆਂ ਭਾਜਪਾ ਦਾ ਵਿੰਗ ਬਣੀਆਂ-ਮਹਿਬੂਬਾ ਮੁਫਤੀ

ਸ੍ਰੀਨਗਰ, 12 ਨਵੰਬਰ (ਵਾਇਆ ਪੰਜਾਬ ਬਿਊਰੋ)
ਪੀਪਲਜ਼ ਡੈਮੋਕ੍ਰੇਟਿਕ ਪਾਰਟੀ (ਪੀ.ਡੀ.ਪੀ.) ਦੀ ਮੁਖੀ ਮਹਿਬੂਬਾ ਮੁਫਤੀ ਨੇ ਜੰਮੂ-ਕਸ਼ਮੀਰ ‘ਚ ਸਥਿਤੀ ਆਮ ਵਾਂਗ ਹੋਣ ਦੇ ਕੇਂਦਰ ਦੇ ਦਾਅਵਿਆਂ ‘ਤੇ ਸਵਾਲ ਉਠਾਉਂਦਿਆਂ ਕਿਹਾ ਕਿ ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈ. ਡੀ.) ਅਤੇ ਕੌਮੀ ਜਾਂਚ ਏਜੰਸੀ (ਐਨ.ਆਈ.ਏ.) ਵਰਗੀਆਂ ਏਜਸੰੀਆਂ ਭਾਜਪਾ ਦਾ ਵਿੰਗ ਬਣ ਗਈਆਂ ਹਨ | ਉਨ੍ਹਾਂ ਕਿਹਾ ਕਿ ਜਿਥੇ ਵੀ ਕੋਈ ਭਾਜਪਾ ਦੇ ਖ਼ਿਲਾਫ਼ ਆਵਾਜ਼ ਉਠਾਉਂਦਾ ਹੈ, ਉਹ (ਏਜੰਸੀਆਂ) ਉਨ੍ਹਾਂ ‘ਤੇ ਛਾਪੇਮਾਰੀ ਕਰਦੀਆਂ ਹਨ | ਮਹਿਬੂਬਾ ਨੇ ਜ਼ਿਲ੍ਹਾ ਪੁਲਵਾਮਾ ‘ਚ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਕਿਹਾ ਕਿ ਸਾਡੀਆਂ ਜੇਲ੍ਹਾਂ ਭਰੀਆਂ ਪਈਆਂ ਹਨ | ਜੇ ਸਭ ਕੁਝ ਆਮ ਹੈ ਤਾਂ ਕਸ਼ਮੀਰੀਆਂ ਤੋਂ ਇੰਨਾ ਡਰ ਕਿਉਂ ਹੈ? ਹਰ ਰੋਜ਼ ਈ.ਡੀ., ਐਨ.ਆਈ.ਏ. ਦੇ ਇੰਨੇ ਛਾਪੇ ਕਿਉਂ ਹਨ? ਮਹਿਬੂਬਾ ਨੇ ਕਿਹਾ ਕਿ ਉਹ (ਏਜੰਸੀਆਂ) ਕਿਸੇ ਵਿਅਕਤੀ ਨੂੰ ਪਹਿਲਾਂ ਭਿ੍ਸ਼ਟ ਆਖਦੀਆਂ ਹਨ ਪਰ ਜਦੋਂ ਉਹ ਭਾਜਪਾ ‘ਚ ਸ਼ਾਮਿਲ ਹੋ ਜਾਂਦਾ ਹੈ ਤਾਂ ਸਭ ਠੀਕ ਹੋ ਜਾਂਦਾ ਹੈ |