ਜਸਟਿਸ ਰੰਜਨ ਗੋਗੋਈ ਸੁਪਰੀਮ ਕੋਰਟ ਦੇ 46ਵੇਂ ਚੀਫ਼ ਜਸਟਿਸ ਬਣੇ

ਨਵੀਂ ਦਿੱਲੀ – ਰਾਸ਼ਟਰਪਤੀ ਰਾਮ ਨਾਥ ਕੋਵਿੰਦ ਨੇ ਜਸਟਿਸ ਰੰਜਨ ਗੋਗੋਈ (63) ਨੂੰ ਅੱਜ ਮੁਲਕ ਦੇ 46ਵੇਂ ਚੀਫ਼ ਜਸਟਿਸ ਵਜੋਂ ਸਹੁੰ ਚੁਕਾਈ। ਇਸ ਮਗਰੋਂ ਉਨ੍ਹਾਂ ਸਪੱਸ਼ਟ ਤੌਰ ’ਤੇ ਕਿਹਾ ਕਿ ਸੁਪਰੀਮ ਕੋਰਟ ’ਚ ਕੇਸਾਂ ਦੀ ਫੌਰੀ ਸੁਣਵਾਈ ਮਾਪਦੰਡ ਤੈਅ ਹੋਣ ਤਕ ਰੋਕੀ ਜਾਂਦੀ ਹੈ। ਜਸਟਿਸ ਗੋਗੋਈ, ਜਿਨ੍ਹਾਂ ਅੰਗਰੇਜ਼ੀ ’ਚ ਸਹੁੰ ਚੁੱਕੀ, ਦਾ ਕਾਰਜਕਾਲ 13 ਕੁ ਮਹੀਨੇ ਤੋਂ ਵੱਧ ਦਾ ਹੋਵੇਗਾ ਅਤੇ ਉਹ 17 ਨਵੰਬਰ 2019 ਨੂੰ ਸੇਵਾਮੁਕਤ ਹੋਣਗੇ। ਉਹ ਉੱਤਰ ਪੂਰਬ ਦੇ ਪਹਿਲੇ ਵਿਅਕਤੀ ਹਨ ਜੋ ਨਿਆਂਪਾਲਿਕਾ ਦੀ ਸਿਖਰਲੀ ਪੁਜ਼ੀਸ਼ਨ ਤਕ ਪਹੁੰਚੇ ਹਨ। ਜਸਟਿਸ ਦੀਪਕ ਮਿਸ਼ਰਾ ਦੇ ਮੰਗਲਵਾਰ ਨੂੰ 65 ਸਾਲ ਦੀ ਉਮਰ ’ਚ ਰਿਟਾਇਰ ਹੋਣ ਮਗਰੋਂ ਉਨ੍ਹਾਂ ਸਹੁੰ ਚੁੱਕੀ ਹੈ। ਰਾਸ਼ਟਰਪਤੀ ਭਵਨ ਦੇ ਇਤਿਹਾਸਕ ਦਰਬਾਰ ਹਾਲ ’ਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ, ਸਾਬਕਾ ਪ੍ਰਧਾਨ ਮੰਤਰੀ ਮਨਮੋਹਨ ਸਿੰਘ ਅਤੇ ਐਚ ਡੀ ਦੇਵੇਗੌੜਾ ਸਮੇਤ ਕਈ ਹੋਰ ਆਗੂ ਹਾਜ਼ਰ ਸਨ। ਨਵੇਂ ਬਣੇ ਚੀਫ਼ ਜਸਟਿਸ ਨੇ ਸੁਪਰੀਮ ਕੋਰਟ ’ਚ ਦਿਨ ਦੀ ਸ਼ੁਰੂਆਤ ਵੱਖ ਵੱਖ ਬੈਂਚਾਂ ਲਈ ਮੁਕੱਦਮਿਆਂ ਦੀ ਵੰਡ ਦਾ ਨਵਾਂ ਰੋਸਟਰ ਬਣਾਉਣ ਦੇ ਨਾਲ ਕਰਦਿਆਂ ਫ਼ੈਸਲਾ ਕੀਤਾ ਕਿ ਜਨਿਹੱਤ ਪਟੀਸ਼ਨਾਂ ਦੀ ਸੁਣਵਾਈ ਉਹ ਖੁਦ ਅਤੇ ਦੂਜੇ ਸੀਨੀਅਰ ਜਸਟਿਸ ਮਦਨ ਬੀ ਲੋਕੁਰ ਦੀ ਅਗਵਾਈ ਹੇਠਲੀ ਬੈਂਚ ਕਰੇਗੀ। ਉਨ੍ਹਾਂ ਵਕੀਲਾਂ ਨੂੰ ਕਿਹਾ ਕਿ ਪਹਿਲ ਦੇ ਆਧਾਰ ’ਤੇ ਮਾਮਲਿਆਂ ਦੇ ਦੇਰੀ ਨਾਲ ਜ਼ਿਕਰ ਅਤੇ ਸੁਣਵਾਈ ਲਈ ਮਾਪਦੰਡ ਤੈਅ ਕੀਤੇ ਜਾਣਗੇ।