ਰਾਸ਼ਟਰਪਤੀ ਦੇ ਨਕਸਲ ਪ੍ਰਭਾਵਿਤ ਜ਼ਿਲ੍ਹਿਆਂ ਦੇ ਦੌਰੇ ਲਈ ਸਖ਼ਤ ਸੁਰੱਖਿਆ ਪ੍ਰਬੰਧ

ਰਾਏਪੁਰ – ਛੱਤੀਸਗੜ੍ਹ ਦੇ ਨਕਸਲ ਪ੍ਰਭਾਵਿਤ ਬਸਤਰ ਅਤੇ ਦਾਂਤੇਵਾੜਾ ਜ਼ਿਲ੍ਹਿਆਂ ਵਿੱਚ ਤਿੰਨ ਪਰਤੀ ਸੁਰੱਖਿਆ ਪ੍ਰਬੰਧ ਕੀਤੇ ਗਏ ਹਨ। ਰਾਸ਼ਟਰਪਤੀ ਰਾਮ ਨਾਮ ਕੋਵਿੰਦ ਭਲਕ ਤੋਂ ਇਥੇ ਦੋ ਦਿਨਾਂ ਦੌਰ ’ਤੇ ਪੁੱਜ ਰਹੇ ਹਨ। ਆਪਣੇ ਦੌਰੇ ਦੌਰਾਨ ਉਹ ਇਥੇ ਕਈ ਸਮਾਗਮਾਂ ਵਿੱਚ ਹਿੱਸਾ ਲੈਣਗੇ।ਤਿੰਨ ਪਰਤੀ ਸੁਰੱਖਿਆ ਵਿੱਚ ਸੂਬਾਈ ਵਿਸ਼ੇਸ਼ ਫੋਰਸ, ਜਿਸ ਵਿੱਚ ਐਸਟੀਐਫ ਅਤੇ ਜ਼ਿਲ੍ਹਾ ਰਿਜ਼ਰਵ ਗਾਰਡ ਦੇ ਨਾਲ ਨਾਲ ਕੇਂਦਰੀ ਰਿਜ਼ਰਵ ਪੁਲੀਸ ਫੋਰਸ ਵੀ ਸ਼ਾਮਲ ਹੈ, ਨਾਲ ਉਸ ਦੇ ਉਘੇ ਕੋਬਰਾ ਯੂਨਿਟ( ਸਖਤ ਕਾਰਵਾਈ ਲਈ ਕਮਾਂਡੋ ਬਟਾਲੀਅਨ) ਨੂੰ ਲਾਇਆ ਗਿਆ ਹੈ। ਇਹ ਜਾਣਕਾਰੀ ਸੁਰੱਖਿਆ ਪ੍ਰਬੰਧਾਂ ਦੀ ਨਿਗਰਾਨੀ ਕਰ ਰਹੇ ਸੀਨੀਅਰ ਪੁਲੀਸ ਅਧਿਕਾਰੀ ਨੇ ਦਿੱਤੀ। ਅਧਿਕਾਰੀ ਨੇ ਦੱਸਿਆ ਕਿ 7000 ਸੁਰੱਖਿਆ ਮੁਲਾਜ਼ਮ ਸਖ਼ਤ ਸੁਰੱਖਿਆ ਪ੍ਰਬੰਧਾਂ ਦਾ ਹਿੱਸਾ ਹਨ। ਸਮਾਗਮ ਵਾਲੀਆਂ ਸਭਨਾਂ ਥਾਵਾਂ ਦੇ 10 ਕਿਲੋਮੀਟਰ ਦੇ ਇਲਾਕੇ ਦੀ ਚੰਗੀ ਤਰ੍ਹਾਂ ਤਲਾਸ਼ੀ ਲਈ ਗਈ ਹੈ। ਸੁਰੱਖਿਆ ਮੁਲਾਜ਼ਮਾਂ ਨੂੰ ਵਰਦੀ ਵਿੱਚ ਸਮਾਗਮ ਵਾਲੇ ਸਾਰੇ ਰੂਟਾਂ ਅਤੇ ਰੈਸਟ ਹਾਊਸਾਂ ’ਤੇ ਲਾਇਆ ਗਿਆ ਹੈ। ਅਧਿਕਾਰੀ ਨੇ ਦੱਸਿਆ ਕਿ ਆਈ ਜੀ ਪੱਧਰ ਦਾ ਇਕ ਪੁਲੀਸ ਅਧਿਕਾਰੀ ਸੁਰੱਖਿਆ ਪ੍ਰਬੰਧਾਂ ’ਤੇ ਨਜ਼ਰ ਰੱਖ ਰਿਹਾ ਹੈ। ਸੁਰੱਖਿਆ ਬਲ, ਬੰਬ ਨਿਰੋਧਕ ਦਸਤੇ ਨਾਲ ਰੋਜ਼ਾਨਾ ਪੱਧਰ ’ਤੇ ਇਲਾਕੇ ਵਿੱਚ ਗਸ਼ਤ ਕਰ ਰਹੇ ਹਨ।ਜ਼ਿਕਰਯੋਗ ਹੈ ਕਿ ਰਾਸ਼ਟਰਪਤੀ ਕੋਵਿੰਦ ਬਸਤਰ ਦੇ ਜਗਦਲਪੁਰ ਹਵਾਈ ਅੱਡੇ ’ਤੇ ਬੁੱਧਵਾਰ ਨੂੰ ਸਵੇਰੇ 10.30 ਵਜੇ ਪੁੱਜਣਗੇ ਜਿਥੋਂ ਉਹ ਹੈਲੀਕੌਪਟਰ ’ਤੇ ਦਾਂਤੇਵਾੜਾ ਵਿੱਚ ਜਵਾਂਗਾ ਲਈ ਰਵਾਨਾ ਹੋਣਗੇ। ਉਥੋਂ ਉਹ ਸੜਕ ਰਸਤੇ ਹੀਰਾਨਰ ਪਿੰਡ ਜਾਣਗੇ ਜਿਥੇ ਉਹ ਕਿਸਾਨਾਂ ਅਤੇ ਸਵੈ ਸਹਾਇਤਾ ਗਰੁੱਪਾਂ ਨੂੰ ਸੰਬੋਧਨ ਕਰਨਗੇ। ਇਥੇ ਉਹ ਵਨਵਾਸੀ ਕਲਿਆਣ ਆਸ਼ਰਮ ਦੇ ਵਿਦਿਆਰਥੀਆਂ ਨਾਲ ਗੱਲਬਾਤ ਕਰਨਗੇ ਅਤੇ ਉਨ੍ਹਾਂ ਨਾਲ ਦੁਪਹਿਰ ਦਾ ਖਾਣਾ ਖਾਣਗੇ। ਇਸ ਤੋਂ ਬਾਅਦ ਉਹ ਸਕਸ਼ਮ ਸਕੂਲ ਅਤੇ ਆਸਥਾ ਵਿਦਿਆ ਮੰਦਿਰ ਦੇ ਬੱਚਿਆਂ ਨੂੰ ਮਿਲਣਗੇ। ਉਹ ਐਜੂਕੇਸ਼ਨ ਸਿਟੀ ਵਿੱਚ ਯੁਵਾ ਬੀਪੀਓ ਦਾ ਉਦਘਾਟਨ ਕਰਨਗੇ। ਬਸਤਰ ਵਿੱਚ ਇਕ ਰਾਤ ਰੁਕਣ ਤੋਂ ਬਾਅਦ ਵੀਰਵਾਰ ਨੂੰ ਰਾਸ਼ਟਰਪਤੀ ਜਗਦਲਪੁਰ ਮੈਡੀਕਲ ਕਾਲਜ ਹਸਪਤਾਲ ਨੂੰ ਰਾਸ਼ਟਰ ਨੂੰ ਸੌਂਪਣਗੇ ਅਤੇ ਇਕੱਠ ਨੂੰ ਸੰਬੋਧਨ ਕਰਨਗੇ।