ਕੈਲੀਫੋਰਨੀਆ ਦੇ ਜੰਗਲਾਂ ’ਚ ਅੱਗ; ਐਮਰਜੈਂਸੀ ਐਲਾਨੀ

ਹੀਲਡਜ਼ਬਰਗ – ਕੈਲੀਫੋਰਨੀਆ ਦੇ ਗਵਰਨਰ ਨੇ ਐਤਵਾਰ ਦੇਰ ਸ਼ਾਮ ਸੂਬੇ ਦੇ ਜੰਗਲਾਂ ਵਿਚ ਵਧਦੀ ਅੱਗ ਦੇ ਮੱਦੇਨਜ਼ਰ ਪੂਰੇ ਰਾਜ ਵਿਚ ਐਮਰਜੈਂਸੀ ਦਾ ਐਲਾਨ ਕੀਤਾ ਹੈ। ਸੈਰ-ਸਪਾਟੇ ਨਾਲ ਜੁੜੀਆਂ ਸਾਰੀਆਂ ਥਾਵਾਂ ਖ਼ਾਲੀ ਕਰਨ ਦੇ ਹੁਕਮ ਜਾਰੀ ਕੀਤੇ ਗਏ ਹਨ। ਸੂਬੇ ਦੇ ਫਾਇਰ ਬ੍ਰਿਗੇਡ ਅਧਿਕਾਰੀਆਂ ਨੇ ਦੱਸਿਆ ਕਿ ਸਾਂ ਫਰਾਂਸਿਸਕੋ ਦੇ ਉੱਤਰ ਵਿਚ ਫ਼ੈਲੀ ਅੱਗ ਰਾਤੋ-ਰਾਤ 30,000 ਏਕੜ ਵਿਚ ਫੈਲ ਗਈ ਜਦਕਿ ਐਤਵਾਰ ਦੁਪਹਿਰ ਤੱਕ ਇਹ ਕੇਵਲ 10 ਫ਼ੀਸਦ ਇਲਾਕੇ ਤੱਕ ਹੀ ਫ਼ੈਲੀ ਸੀ। ਇਹ ਕੈਲੀਫੋਰਨੀਆ ਵਿਚ ਅੱਗ ਲੱਗਣ ਦੀ ਸਭ ਤੋਂ ਭਿਆਨਕ ਘਟਨਾ ਹੈ। ਅੱਗ ਲੰਘੇ ਬੁੱਧਵਾਰ ਨੂੰ ਲੱਗੀ ਸੀ ਤੇ 145 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫ਼ਤਾਰ ਨਾਲ ਫ਼ੈਲਦੀ ਚਲੀ ਗਈ। ਗਵਰਨਰ ਗੈਵਿਨ ਨਿਊਜ਼ੋਮ ਨੇ ਤੇਜ਼ ਹਵਾਵਾਂ ਕਾਰਨ ਅੱਗ ਦੇ ਹੋਰ ਫ਼ੈਲਣ ਦੇ ਖ਼ਦਸ਼ੇ ਕਾਰਨ ਰਾਜ ਵਿਚ ਹੰਗਾਮੀ ਸਥਿਤੀ ਦਾ ਐਲਾਨ ਕੀਤਾ ਹੈ।ਉਨ੍ਹਾਂ ਕਿਹਾ ਕਿ ਅੱਗ ਨਾਲ ਨਜਿੱਠਣ ਦਾ ਹਰ ਸੰਭਵ ਯਤਨ ਕੀਤਾ ਜਾ ਰਿਹਾ ਹੈ ਤੇ ਕਈ ਏਜੰਸੀਆਂ ਸਹਿਯੋਗ ਕਰ ਰਹੀਆਂ ਹਨ। ਇਸ ਐਲਾਨ ਤਹਿਤ ਸਾਂਤਾ ਰੋਜ਼ ਤੇ ਸੋਨੋਮਾ ਇਲਾਕਿਆਂ ਵਿਚ ਲਗਭਗ ਇਕ ਲੱਖ ਅੱਸੀ ਹਜ਼ਾਰ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ’ਤੇ ਪਹੁੰਚਾਇਆ ਗਿਆ ਹੈ।