ਜਾਧਵ ਦੀ ਸਜ਼ਾ ‘ਤੇ ਭਾਰਤ ਖਿਲਾਫ ਸਾਡਾ ਮਾਮਲਾ ਮਜ਼ਬੂਤ : ਪਾਕਿ

ਇਸਲਾਮਾਬਾਦ – ਪਾਕਿਸਤਾਨ ਨੇ ਕਿਹਾ ਕਿ ਭਾਰਤੀ ਨਾਗਰਿਕ ਕੁਲਭੂਸ਼ਣ ਜਾਧਵ ਦੀ ਸਜ਼ਾ ‘ਤੇ ਆਈ.ਸੀ.ਜੇ. ‘ਚ ਉਸ ਦਾ ਮਾਮਲਾ ਕਾਫੀ ਮਜ਼ਬੂਤ ਹੈ। ਜਾਧਵ ਨੂੰ ਪਾਕਿਸਤਾਨ ਦੀ ਇਕ ਫੌਜੀ ਅਦਾਲਤ ਨੇ ਜਾਸੂਸੀ ਤੇ ਅੱਤਵਾਦ ਦੇ ਦੋਸ਼ਾਂ ਦੇ ਮਾਮਲੇ ‘ਚ ਮੌਤ ਦੀ ਸਜ਼ਾ ਸੁਣਾਈ ਸੀ। ਭਾਰਤ ਨੇ 48 ਸਾਲ ਦੇ ਜਾਧਵ ਨੂੰ ਮਿਲੀ ਸਜ਼ਾ ਤੋਂ ਬਾਅਦ ਪਿਛਲੇ ਸਾਲ ਮਈ ‘ਚ ਅੰਤਰਰਾਸ਼ਟਰੀ ਨਿਆਂ ਅਦਾਲਤ ਦਾ ਰੂਖ ਕੀਤਾ ਸੀ। ਆਈ.ਸੀ.ਜੇ. ਦੀ 10 ਮੈਂਬਰੀ ਪੀਠ ਨੇ ਮਾਮਲੇ ‘ਤੇ ਫੈਸਲਾ ਸੁਣਾਉਣ ਤਕ 18 ਮਈ 2017 ਨੂੰ ਪਾਕਿਸਤਾਨ ਨੂੰ ਜਾਧਵ ਨੂੰ ਸਜ਼ਾ ਦੇਣ ਤੋਂ ਰੋਕ ਦਿੱਤਾ ਸੀ। ਪਾਕਿਸਤਾਨ ਦੇ ਵਿਦੇਸ਼ ਵਿਭਾਗ ਦੇ ਬੁਲਾਰੇ ਮੁਹੰਮਦ ਫੈਜ਼ਲ ਨੇ ਆਪਣੀ ਹਫਤਾਵਾਰ ਬ੍ਰੀਫਿੰਗ ‘ਚ ਕਿਹਾ ਕਿ ਆਈ.ਸੀ.ਜੇ. ‘ਚ ਦੋਹਾਂ ਧਿਰਾਂ ਦੀਆਂ ਦਲੀਲਾਂ ਪੂਰੀਆਂ ਹੋ ਗਈਆਂ ਹਨ ਤੇ ਹੁਣ ਰਸਮੀ ਸੁਣਵਾਈ ਸ਼ੁਰੂ ਹੋਵੇਗੀ। ਫੈਜ਼ਲ ਨੇ ਦਾਅਵਾ ਕੀਤਾ, ‘ਆਈ.ਸੀ.ਜੇ. ‘ਚ ਜਾਧਵ ਦੇ ਸਬੰਧ ‘ਚ ਭਾਰਤ ਖਿਲਾਫ ਸਾਡਾ ਮਾਮਲਾ ਕਾਫੀ ਮਜ਼ਬੂਤ ਹੈ। ਉਸ ਨੂੰ ਸਾਡੀ ਸਰਜ਼ਮੀਂ ‘ਤੇ ਜਾਸੂਸੀ, ਵਿਨਾਸ਼ਕਾਰੀ ਤੇ ਅੱਤਵਾਦੀ ਸਰਗਰਮੀਆਂ ‘ਚ ਰੰਗੇ ਹੱਥੀ ਫੜਿਆ ਗਿਆ ਸੀ।