ਟੀ-20 ਵਿੱਚ ਅੱਵਲ ਨੰਬਰ ਸਕੋਰਰ ਬਣਿਆ ਰੋਹਿਤ

ਔਕਲੈਂਡ – ਭਾਰਤ ਦਾ ਕਾਰਜਕਾਰੀ ਕਪਤਾਨ ਰੋਹਿਤ ਸ਼ਰਮਾ ਨਿਊਜ਼ੀਲੈਂਡ ਦੇ ਮਾਰਟਿਨ ਗੁਪਟਿਲ ਨੂੰ ਪਛਾੜ ਕੇ ਟੀ-20 ਵਿੱਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲਾ ਬੱਲੇਬਾਜ਼ ਬਣ ਗਿਆ ਹੈ। ਰੋਹਿਤ ਨੇ ਲੈੱਗ ਸਪਿੰਨਰ ਈਸ਼ ਸੋਢੀ ਦੀ ਗੇਂਦ ’ਤੇ ਛੱਕਾ ਮਾਰ ਕੇ ਗੁਪਟਿਲ ਨੂੰ ਪਛਾੜਿਆ। ਗੁਪਟਿਲ (2272 ਦੌੜਾਂ) ਨੂੰ ਪਛਾੜਣ ਲਈ ਰੋਹਿਤ ਨੂੰ 35 ਦੌੜਾਂ ਦੀ ਲੋੜ ਸੀ। ਰੋਹਿਤ ਨੇ 93 ਮੈਚਾਂ ਵਿੱਚ 2288 ਦੌੜਾਂ ਬਣਾ ਲਈਆਂ ਹਨ। ਉਸ ਨੇ ਪਾਕਸਿਤਾਨ ਦੇ ਹਰਫ਼ਨਮੌਲਾ ਸ਼ੋਏਬ ਮਲਿਕ (2263) ਨੂੰ ਵੀ ਪਛਾੜਿਆ, ਜੋ ਤੀਜੇ ਸਥਾਨ ’ਤੇ ਹੈ। ਭਾਰਤੀ ਕਪਤਾਨ ਵਿਰਾਟ ਕੋਹਲੀ (2167 ਦੌੜਾਂ) ਚੌਥੇ ਅਤੇ ਨਿਊਜ਼ੀਲੈਂਡ ਦਾ ਸਾਬਕਾ ਵਿਕਟਕੀਪਰ ਬੱਲੇਬਾਜ਼ ਬ੍ਰੈਂਡਨ ਮੈਕੁਲਮ (2140) ਪੰਜਵੇਂ ਸਥਾਨ ’ਤੇ ਹੈ। ਰੋਹਿਤ ਟੀ-20 ਕ੍ਰਿਕਟ ਵਿੱਚ ਗੁਪਟਿਲ ਅਤੇ ਕ੍ਰਿਸ ਗੇਲ ਮਗਰੋਂ 100 ਛੱਕੇ ਮਾਰਨ ਵਾਲਾ ਤੀਜਾ ਬੱਲੇਬਾਜ਼ ਬਣ ਗਿਆ ਹੈ।