ਬੀਸੀਸੀਆਈ ਦੇ ਦਖ਼ਲ ਮਗਰੋਂ ਸ਼ਮੀ ਨੂੰ ਮਿਲਿਆ ਅਮਰੀਕਾ ਦਾ ਵੀਜ਼ਾ

ਭਾਰਤ ਦੇ ਸੀਨੀਅਰ ਤੇਜ਼ ਗੇਂਦਬਾਜ਼ ਮੁਹੰਮਦ ਸ਼ਮੀ ਦਾ ਅਮਰੀਕਾ ਵੀਜ਼ਾ ਉਨ੍ਹਾਂ ਦੇ ਘਰੇਲੂ ਹਿੰਸਾ ਦੇ ਦੋਸ਼ਾਂ ਵਾਲੇ ਮੌਜੂਦਾ ਰਿਕਾਰਡ ਕਾਰਨ ਪਹਿਲਾਂ ਖ਼ਾਰਜ ਕਰ ਦਿੱਤਾ ਗਿਆ ਸੀ ਪਰ ਬੀਸੀਸੀਆਈ ਨੇ ਦਖ਼ਲ ਦਿੰਦਿਆਂ ਇਸ ਦਾ ਨਿਪਟਾਰਾ ਕਰਵਾਇਆ। ਬੀਸੀਸੀਆਈ ਦੇ ਮੁੱਖ ਕਾਰਜਕਾਰੀ ਅਧਿਥਾਰੀ ਰਾਹੁਲ ਜੌਹਰੀ ਨੇ ਅਮਰੀਕੀ ਦੂਤਾਵਾਸ ਨੂੰ ਪੱਤਰ ਲਿਖਿਆ ਜਿਸ ਤੋਂ ਬਾਅਦ ਬੰਗਾਲ ਦੇ ਇਸ ਤੇਜ਼ ਗੇਂਦਬਾਜ਼ ਦੇ ਵੀਜ਼ੇ ਨੂੰ ਹਰੀ ਝੰਡੀ ਮਿਲ ਗਈ। ਜੌਹਰੀ ਨੇ ਇਸ ਪੱਤਰ ਵਿੱਚ ਦੇਸ਼ ਲਈ ਕਿ੍ਕਟਰ ਦੇ ਤੌਰ ’ਤੇ ਸ਼ਮੀ ਦੀਆਂ ਉਪਲਭਦੀਆਂ ਤੋਂ ਇਲਾਵਾ ਉਸ ਦੀ ਪਤਨੀ ਹਸੀਨ ਜਹਾਂ ਤੋਂ ਵੱਖ ਹੋਣ ਨੂੰ ਲੈ ਕੇ ਪੂਰੀ ਪੁਲੀਸ ਰਿਪੋਰਟ ਦੀ ਜਾਣਕਾਰੀ ਦਿੱਤੀ। ਪਤਾ ਲੱਗਾ ਹੈ ਕਿ ਭਾਰਤੀ ਖਿਡਾਰੀਆਂ ਨੂੰ ਪੀ1 ਵਰਗ ਤਹਿਤ ਵੀਜ਼ਾ ਮਿਲਿਆ ਹੈ ਜੋ ਅੰਤਰਰਾਸ਼ਟਰੀ ਮਾਨਤਾ ਪ੍ਰਾਪਤ ਵਿਦੇਸ਼ੀ ਟੀਮ ਦੇ ਮੈਂਬਰਾਂ ਨੂੰ ਦਿੱਤਾ ਗਿਆ ਹੈ। ਬੀਸੀਸੀਆਈ ਦੇ ਇਕ ਸੂਤਰ ਨੇ ਨਾਂ ਨਾ ਦੱਸਣ ਦੀ ਸ਼ਰਤ ’ਤੇ ਪੀਟੀਆਈ ਨੂੰ ਕਿਹਾ, ‘‘ਹਾਂ, ਸ਼ਮੀ ਦਾ ਵੀਜ਼ਾ ਪਹਿਲਾਂ ਅਮਰੀਕੀ ਦੂਤਾਵਾਸ ਨੇ ਖ਼ਾਰਜ ਕਰ ਦਿੱਤਾ ਸੀ। ਇਸ ਬਾਰੇ ਪਤਾ ਲੱਗਾ ਸੀ ਕਿ ਪੁਲੀਸ ਜਾਂਚ ਦਾ ਰਿਕਾਰਡ ਪੂਰਾ ਨਹੀਂ ਸੀ। ਹਾਲਾਂਕਿ ਇਸ ਨੂੰ ਬਾਅਦ ਵਿੱਚ ਨਿਪਟਾ ਲਿਆ ਗਿਆ ਅਤੇ ਸਾਰੇ ਜ਼ਰੂਰੀ ਦਸਤਾਵੇਜ਼ ਮੁਹੱਈਆ ਕਰਵਾ ਦਿੱਤੇ ਗਏ।