ਸਾਡੀ ਕੋਸ਼ਿਸ਼ 5-0 ਨਾਲ ਸੀਰੀਜ਼ ਜਿੱਤਣ ਦੀ ਹੋਵੇਗੀ ਪਾਂਡੇ

ਭਾਰਤੀ ਮੱਧਕ੍ਰਮ ਦੇ ਬੱਲੇਬਾਜ਼ ਮਨੀਸ਼ ਪਾਂਡੇ ਨੇ ਨਿਊਜ਼ੀਲੈਂਡ ਵਿਰੁੱਧ ਲਗਾਤਾਰ ਦੂਜੇ ਮੈਚ ‘ਚ ਸੁਪਰ ਓਵਰ ‘ਚ ਮਿਲੀ ਜਿੱਤ ਨੂੰ ਟੀਮ ਦਾ ਕਦੀ ਹਾਰ ਨਾ ਮੰਨਣ ਵਾਲੇ ਜ਼ਜਬਾ ਕਰਾਰ ਦਿੰਦੇ ਹੋਏ ਕਿਹਾ ਕਿ ਉਸਦੀ ਕੋਸ਼ਿਸ ਸੀਰੀਜ਼ ਨੂੰ 5-0 ਨਾਲ ਜਿੱਤਣ ਦੀ ਹੋਵੇਗੀ। ਨਿਊਜ਼ੀਲੈਂਡ ਦੀ ਟੀਮ ਨੇ ਇਕ ਬਾਰ ਫਿਰ ਤੋਂ ਆਸਾਨੀ ਨਾਲ ਟੀਚੇ ਹਾਸਲ ਕਰਨ ਵਾਲੀ ਸਥਿਤੀ ਨਾਲ ਸ਼ੁੱਕਰਵਾਰ ਨੂੰ ਇੱਥੇ ਮੈਚ ਗੁਆ ਦਿੱਤਾ, ਜਿਸ ਨਾਲ ਪੰਜ ਮੈਚਾਂ ਦੀ ਟੀ-20 ਅੰਤਰਰਾਸ਼ਟਰੀ ਸੀਰੀਜ਼ ‘ਚ ਭਾਰਤ ਦੀ ਬੜ੍ਹਤ 4-0 ਦੀ ਹੋ ਗਈ ਹੈ। ਦੋਵੇਂ ਟੀਮਾਂ ਐਤਵਾਰ ਨੂੰ ਸੀਰੀਜ਼ ਦਾ ਆਖਰੀ ਮੁਕਾਬਲਾ ਮਾਊਟ ਮੌਨਗਾਨੁਈ ‘ਚ ਖੇਡੇਗੀ। ਪਾਂਡੇ ਨੇ ਟੀਮ ਨੂੰ ਖਰਾਬ ਸ਼ੁਰੂਆਤ ਤੋਂ ਕੱਢ ਕੇ 36 ਗੇਂਦਾਂ ‘ਚ ਅਜੇਤੂ 50 ਦੌੜਾਂ ਬਣਾਈਆਂ। ਜਿਸ ਦੌਰਾਨ ਭਾਰਤ ਨੇ 8 ਵਿਕਟਾਂ ‘ਤੇ 165 ਦੌੜਾਂ ਬਣਾਈਆਂ ਸਨ।ਪਾਂਡੇ ਨੇ ਮੈਚ ਤੋਂ ਬਾਅਦ ਕਿਹਾ ਕਿ ਇਹ ਸਾਡਾ ਮੰਤਰ ਹੈ, ਸਿਰਫ ਇਨ੍ਹਾਂ ਦੋ ਮੈਚਾਂ ‘ਚ ਨਹੀਂ ਅਸੀਂ ਕਿਸੇ ਵੀ ਮੈਚ ‘ਚ ਆਖਰੀ ਗੇਂਦ ਤਕ ਹਾਰ ਨਹੀਂ ਮੰਨਾਂਗੇ। ਜੇਕਰ ਤੁਸੀਂ ਇਸ ਮਾਨਸਿਕਤਾ ਨਾਲ ਖੇਡੋਗੇ ਤਾਂ ਤੁਹਾਨੂੰ ਇਸ ਤਰ੍ਹਾਂ ਦੇ ਸੁਪਰ ਓਵਰ ਵਾਲੇ ਮੈਚ ਮਿਲਣਗੇ ਤੇ ਤੁਹਾਡੇ ਕੋਲ ਉੱਥੇ ਮੈਚ ਜਿੱਤਣ ਦਾ ਮੌਕਾ ਹੋਵੇਗਾ।