ਇੰਪਲਾਈਜ਼ ਫੈਡਰੇਸ਼ਨ ਥਰਮਲ ਯੁਨਿਟ ਰੂਪਨਗਰ ਵੱਲੋਂ ਨਵੇਂ ਸੁਪਰ ਕ੍ਰਿਟੀਕਲ ਯੁਨਿਟਾਂ ਦੀ ਉਸਾਰੀ ਲਈ ਮਨੀਸ਼ ਤਿਵਾੜੀ ਤੋਂ ਕੀਤੀ ਮੰਗ

ਰੂਪਨਗਰ – ਇੰਪਲਾਈਜ਼ ਫੈਡਰੇਸ਼ਨ ਪੰ.ਰਾ.ਬਿ.ਬੋ. ਥਰਮਲ ਯੁਨਿਟ ਰੂਪਨਗਰ ਵਲੋਂ ਬੀਤੀ ਸ਼ਾਮ ਹਲਕੇ ਦੇ ਮੈਂਬਰ ਪਾਰਲੀਮੈਂਟ ਮਨੀਸ਼ ਤਿਵਾੜੀ ਨੂੰ ਨਵੇਂ ਸੁਪਰ ਕ੍ਰਿਟੀਕਲ ਯੁਨਿਟਾਂ ਦੀ ਉਸਾਰੀ ਦਾ ਕੰਮ ਸ਼ੁਰੂ ਕਰਵਾਉਣ ਸਬੰਧੀ ਮੰਗ ਪੱਤਰ ਦਿਤਾ ਗਿਆ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਜਥੇਬੰਦੀ ਦੇ ਥਰਮਲ ਯੁਨਿਟ ਦੇ ਪ੍ਰਧਾਨ ਹਰਮੇਸ਼ ਧੀਮਾਨ ਅਤੇ ਸਕੱਤਰ ਕੁਲਦੀਪ ਸਿੰਘ ਮਿਨਹਾਸ ਨੇ ਦੱਸਿਆ ਕਿ ਗੁਰੂ ਗੋਬਿੰਦ ਸਿੰਘ ਸੁਪਰ ਥਰਮਲ ਪਲਾਂਟ ਰੂਪਨਗਰ ਵਿਖੇ 210 ਮੈਗਾਵਾਟ ਪ੍ਰਤੀ ਯੁਨਿਟ ਦੀ ਸਮਰੱਥਾ ਦੇ 6 ਯੁਨਿਟ ਲੱਗੇ ਹੋਏ ਹਨ। ਇਹਨਾਂ ਵਿਚੋਂ 2 ਯੁਨਿਟਾਂ ਨੂੰ 1.1.2018 ਤੋਂ ਪੱਕੇ ਤੌਰ ਤੇ ਬੰਦ ਕਰ ਦਿਤਾ ਗਿਆ ਸੀ ਅਤੇ ਹੁਣ 31.12.2020 ਨੂੰ 2 ਹੋਰ ਯੁਨਿਟਾਂ ਨੂੰ ਪੱਕੇ ਤੌਰ ਤੇ ਬੰਦ ਕਰਨ ਦੀ ਤਜਵੀਜ਼ ਹੈ। ਇਹ ਯੁਨਿਟ ਬੰਦ ਹੋਣ ਨਾਲ ਇਥੇ ਹਜਾਰਾਂ ਦੀ ਗਿਣਤੀ ਵਿਚ ਪਿਛਲੇ 25-30 ਸਾਲਾਂ ਤੋਂ ਕੰਮ ਕਰ ਰਹੇ ਕੰਟਰੈਕਟਰ ਕਾਮੇ ਕੰਮ ਤੋਂ ਵਾਂਝੇ ਹੋ ਜਾਣਗੇ ਅਤੇ ਰੈਗੁਲਰ ਅਤੇ ਵਰਕਚਾਰਜ ਕਾਮਿਆਂ ਨੂੰ ਦੂਰ ਦੁਰਾਡੇ ਬਦਲੀਆਂ ਕਰਕੇ ਘਰੋਂ ਬੇਘਰ ਕਰ ਦਿਤਾ ਜਾਵੇਗਾ। ਇਸ ਤੋਂ ਇਲਾਵਾ ਥਰਮਲ ਪਲਾਂਟ ਏਰੀਏ ਨਾਲ ਲਗਦੇ ਕਈ ਪਿੰਡਾਂ ਦੇ ਕਿਸਾਨਾਂ ਅਤੇ ਦੁਕਾਨਦਾਰਾਂ ਦਾ ਰੋਜਗਾਰ ਵੀ ਥਰਮਲ ਪਲਾਂਟ ਦੇ ਕਰਮਚਾਰੀਆਂ ਨਾਲ ਜੁੜਿਆ ਹੋਇਆ ਹੈ। ਥਰਮਲ ਬੰਦ ਹੋਣ ਨਾਲ ਇਹਨਾਂ ਲੋਕਾਂ ਦਾ ਰੋਜਗਾਰ ਵੀ ਪ੍ਰਭਾਵਿਤ ਹੋਵੇਗਾ। ਜਦ ਕਿ ਪੰਜਾਬ ਸੂਬੇ ਵਿਚ ਪਹਿਲਾਂ ਹੀ ਨੌਜਵਾਨ ਬੇ-ਰੋਜਗਾਰੀ ਕਾਰਨ ਪਰੇਸ਼ਾਨ ਹਨ। ਗੁਰੂ ਗੋਬਿੰਦ ਸਿੰਘ ਸੁਪਰ ਥਰਮਲ ਪਲਾਂਟ ਰੂਪਨਗਰ ਵਿਖੇ 800 ਮੈਗਾਵਾਟ ਦੇ 3 ਨਵੇਂ ਸੁਪਰ ਕ੍ਰਿਟੀਕਲ ਯੁਨਿਟਾਂ ਦੀ ਉਸਾਰੀ ਦੀ ਤਜਵੀਜ਼ ਪਾਵਰਕਾਮ ਵਲੋਂ ਪਾਸ ਕਰਕੇ ਪੰਜਾਬ ਸਰਕਾਰ ਨੂੰ ਭੇਜੀ ਗਈ ਸੀ ਜੋ ਕਿ ਪੰਜਾਬ ਸਰਕਾਰ ਕੋਲ ਪਿਛਲੇ ਲੰਬੇ ਸਮੇ ਤੋਂ ਵਿਚਾਰ ਅਧੀਨ ਹੈ। ਪ੍ਰੰਤੂ ਇਸ ਤਜਵੀਜ਼ ਨੂੰ ਅਜੇ ਤੱਕ ਅਮਲੀ ਰੂਪ ਨਹੀ ਦਿਤਾ ਗਿਆ। ਜੇਕਰ ਨਵੇਂ ਸੁਪਰ ਕ੍ਰਿਟੀਕਲ ਯੁਨਿਟਾਂ ਦੀ ਉਸਾਰੀ ਤੋਂ ਪਹਿਲਾਂ ਹੀ ਥਰਮਲ ਪਲਾਂਟ ਰੂਪਨਗਰ ਦੇ 2 ਹੋਰ ਯੁਨਿਟਾਂ ਨੂੰ ਬੰਦ ਕਰ ਦਿਤਾ ਜਾਂਦਾ ਹੈ ਤਾਂ ਥਰਮਲ ਪਲਾਟਾਂ ਦੀ ਬਿਜਲੀ ਉਤਪਾਦਨ ਦੇ ਖੇਤਰ ਵਿਚ ਪ੍ਰਾਈਵੇਟ ਥਰਮਲ ਪਲਾਂਟਾਂ ਦੀ ਹਿੱਸੇਦਾਰੀ ਵਧ ਕੇ ਲਗਪਗ 75% ਹੋ ਜਾਵੇਗੀ। ਜੋ ਕਿ ਆਉਣ ਵਾਲੇ ਸਮੇ ਲਈ ਪੰਜਾਬ ਸੂਬੇ ਲਈ ਘਾਤਕ ਸਿੱਧ ਹੋ ਸਕਦੀ ਹੈ।