ਕੋਰਟ ਨੇ ਮਾਣਹਾਨੀ ਮਾਮਲੇ ਵਿੱਚ ਜੈਰਾਮ ਰਮੇਸ਼ ਨੂੰ ਪੇਸ਼ੀ ਤੋਂ ਦਿੱਤੀ ਛੋਟ

ਨਵੀਂ ਦਿੱਲੀ – ਦਿੱਲੀ ਦੀ ਇਕ ਅਦਾਲਤ ਨੇ ਰਾਸ਼ਟਰੀ ਸੁਰੱਖਿਆ ਸਲਾਹਕਾਰ ਅਜੀਤ ਡੋਭਾਲ ਦੇ ਬੇਟੇ ਵਿਵੇਕ ਵਲੋਂ ਦਾਇਰ ਇਕ ਮਾਣਹਾਨੀ ਮਾਮਲੇ ਵਿੱਚ ਕਾਂਗਰਸ ਨੇਤਾ ਜੈਰਾਮ ਰਮੇਸ਼ ਨੂੰ ਵਿਅਕਤੀਗਤ ਪੇਸ਼ੀ ਤੋਂ ਅੱਜ ਛੋਟ ਦੇ ਦਿੱਤੀ ਅਤੇ ਉਨ੍ਹਾਂ ਨੂੰ 9 ਮਈ ਨੂੰ ਪੇਸ਼ ਹੋਣ ਦਾ ਆਦੇਸ਼ ਦਿੱਤਾ| ਜੱਜ ਸਮਰ ਵਿਸ਼ਾਲ ਨੇ ‘ਦਿ ਕੈਰਵੇਨ’ ਦੇ ਐਡਿਟਰ ਇਨ ਚੀਫ ਅਤੇ ਉਸ ਦੇ ਰਿਪੋਰਟਰ ਨੂੰ ਵੀ ਜ਼ਮਾਨਤ ਦੇ ਦਿੱਤੀ| ਮਾਮਲੇ ਵਿੱਚ ਦੋਸ਼ੀ ਦੇ ਤੌਰ ਤੇ ਤਲੱਬ ਕੀਤੇ ਜਾਣ ਤੇ ਉਹ ਕੋਰਟ ਦੇ ਸਾਹਮਣੇ ਪੇਸ਼ ਹੋਏ ਸਨ| ‘ਦਿ ਕੈਰਵੇਨ’ ਨੇ ਆਪਣੇ ਲੇਖ ਵਿੱਚ ਦੋਸ਼ ਲਗਾਇਆ ਸੀ ਕਿ ਵਿਵੇਕ ਡੋਭਾਲ ‘ਕੇਮੈਨ ਆਈਲੈਂਡਸ’ ਵਿੱਚ ਹੇਜ ਫੰਡ ਚਲਾਉਂਦੇ ਹਨ, ਜੋ ‘ਟੈਕਸ ਚੋਰੀ ਨੂੰ ਸਥਾਪਤ ਟੈਕਸ ਹੇਵੇਨ’ ਹੈ| ਵਿਵੇਕ ਨੇ 30 ਜਨਵਰੀ ਨੂੰ ਕੋਰਟ ਦੇ ਸਾਹਮਣੇ ਆਪਣਾ ਬਿਆਨ ਦਰਜ ਕਰਵਾਇਆ ਸੀ ਕਿ ਅਖਬਾਰ ਵਲੋਂ ਲਗਾਏ ਗਏ ਅਤੇ ਬਾਅਦ ਵਿੱਚ ਰਮੇਸ਼ ਵਲੋਂ ਇਕ ਪੱਤਰਕਾਰ ਸੰਮੇਲਨ ਵਿੱਚ ਦੋਹਰਾਏ ਗਏ ਸਾਰੇ ਦੋਸ਼ ਗਲਤ ਅਤੇ ਝੂਠੇ ਹਨ ਅਤੇ ਇਨ੍ਹਾਂ ਕਾਰਨ ਉਨ੍ਹਾਂ ਦੇ ਪਰਿਵਾਰ ਅਤੇ ਸਹਿ ਕਰਮਚਾਰੀਆਂ ਦੀਆਂ ਨਜ਼ਰਾਂ ਵਿੱਚ ਉਨ੍ਹਾਂ ਦਾ ਮਾਣ ਘੱਟ ਹੋਇਆ ਹੈ|