ਭਾਰਤ ਦਾ ਪਹਿਲਾ ਮਾਨਵ ਰਹਿਤ ਮਿਸ਼ਨ ਦਸੰਬਰ ’ਚ: ਇਸਰੋ

ਬੰਗਲੁਰੂ – ਭਾਰਤ ਦੇ ਪਲੇਠੇ ‘ਗੰਗਾਯਾਨ ਮਿਸ਼ਨ ਤੋਂ ਪਹਿਲਾਂ ਭਾਰਤੀ ਪੁਲਾੜ ਖੋਜ ਸੰਗਠਨ (ਇਸਰੋ) ਵੱਲੋਂ ਦਸੰਬਰ 2020 ਅਤੇ ਜੂਨ 2021 ’ਚ ਦੋ ਮਾਨਵ ਰਹਿਤ ਮਿਸ਼ਨਾਂ ’ਤੇ ਕੰਮ ਕੀਤਾ ਜਾਵੇਗਾ। ਇਥੇ ਮਨੁੱਖੀ ਪੁਲਾੜ ਉਡਾਣਾਂ ਸਬੰਧੀ ਚੁਣੌਤੀਆਂ ਅਤੇ ਭਵਿੱਖ ਦੇ ਰੁਝਾਨਾਂ ਬਾਰੇ ਕਰਵਾਈ ਗਈ ਵਿਚਾਰ ਚਰਚਾ ਦੇ ਉਦਘਾਟਨੀ ਇਜਲਾਸ ਨੂੰ ਸੰਬੋਧਨ ਕਰਦਿਆਂ ਇਸਰੋ ਦੇ ਚੇਅਰਮੈਨ ਕੇ ਸ਼ਿਵਨ ਨੇ ਕਿਹਾ ਕਿ ਗੰਗਾਯਾਨ ਮਿਸ਼ਨ ਭਾਰਤ ਦਾ ਪਲੇਠਾ ਮਨੁੱਖੀ ਪੁਲਾੜ ਮਿਸ਼ਨ ਹੈ ਪਰ ਇਸ ਦੇ ਨਾਲ ਨਵਾਂ ਪੁਲਾੜ ਸਟੇਸ਼ਨ ਵੀ ਸਥਾਪਤ ਕੀਤਾ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਗੰਗਾਯਾਨ ਮਿਸ਼ਨ ਤਿੰਨ ਨੁਕਤਿਆਂ ’ਤੇ ਆਧਾਰਿਤ ਹੈ। ਪਹਿਲਾ ਦਸੰਬਰ 2020 ਅਤੇ ਫਿਰ ਜੂਨ 2021 ’ਚ ਮਾਨਵ ਰਹਿਤ ਮਿਸ਼ਨ ਹਨ। ਇਸ ਮਗਰੋਂ ਦਸੰਬਰ 2021 ’ਚ ਮਨੁੱਖ ਨਾਲ ਪੁਲਾੜ ਦੀ ਉਡਾਣ ਹੈ।ਉਨ੍ਹਾਂ ਕਿਹਾ ਕਿ ਇਸਰੋ ਨੇ ਬੰਗਲੁਰੂ ਨੇੜੇ ਪੁਲਾੜ ਯਾਤਰੀ ਸਿਖਲਾਈ ਕੇਂਦਰ ਖੋਲ੍ਹਿਆ ਹੈ। ਪੁਲਾੜ ਏਜੰਸੀ ਨਾਸਾ ਅਤੇ ਹੋਰ ਏਜੰਸੀਆਂ ਤੇ ਸਨਅਤਕਾਰਾਂ ਨਾਲ ਵੀ ਗੱਲਬਾਤ ਕਰ ਰਹੀ ਹੈ ਤਾਂ ਜੋ ਉਨ੍ਹਾਂ ਦੇ ਤਜਰਬਿਆਂ ਤੋਂ ਸਿੱਖਿਆ ਜਾ ਸਕੇ।