ਰੇਲਵੇ ਦਾ ਆਧੁਨਿਕੀਕਰਨ ਹੋਵੇਗੀ ਪਿਊਸ਼ ਗੋਇਲ ਦੀ ਪਹਿਲ

ਨਵੀਂ ਦਿੱਲੀ – ਪਿਊਸ਼ ਗੋਇਲ ਨੂੰ ਇੱਕ ਵਾਰ ਫਿਰ ਰੇਲ ਮੰਤਰਾਲੇ ਦੀ ਜ਼ਿੰਮੇਵਾਰੀ ਦਿੱਤੀ ਗਈ ਹੈ। ਆਪਣੇ ਦੂਜੇ ਕਾਰਜਕਾਲ ’ਚ ਉਹ ਸੁਰੱਖਿਆ, ਕਿਰਾਏ ’ਚ ਵਾਧੇ ਬਿਨਾਂ ਮਾਲੀਆ ਇਕੱਠਾ ਕਰਨ, ਰੇਲ ਪੱਟੜੀਆਂ ਦਾ ਮੁੜ ਨਿਰਮਾਣ, ਆਧੁਨਿਕੀਕਰਨ ਅਤੇ ਅਤਿ-ਆਧੁਨਿਕ ਰੇਲ ਬੋਗੀਆਂ ਦੇ ਉਤਪਾਦਨ ’ਚ ਵਾਧਾ ਕਰਨ ਦੀ ਦਿਸ਼ਾ ਵੱਲ ਕਦਮ ਚੁੱਕ ਸਕਦੇ ਹਨ। ਅਧਿਕਾਰਤ ਸੂਤਰਾਂ ਨੇ ਅੱਜ ਦੱਸਿਆ ਕਿ ਸ੍ਰੀ ਗੋਇਲ ਦੇ ਪਿਛਲੇ ਕਾਰਜਕਾਲ ’ਚ ਰੇਲਵੇ ’ਚ ਸਭ ਤੋਂ ਘੱਟ ਹਾਦਸੇ ਹੋਏ ਸਨ ਅਤੇ ਉਹ ਹਮੇਸ਼ਾ ਇਸ ਗੱਲ ਨੂੰ ਦੁਹਰਾਉਂਦੇ ਸਨ ਕਿ ਉਹ ‘ਜ਼ੀਰੋ ਹਾਦਸੇ’ ਦੇ ਟੀਚੇ ਨੂੰ ਹਾਸਲ ਕਰਨਾ ਚਾਹੁੰਦੇ ਹਨ। ਉਨ੍ਹਾਂ ਲਈ ਸਭ ਤੋਂ ਵੱਡੀ ਚੁਣੌਤੀ ਰੇਲ ਪਟੜੀਆਂ ਦੀ ਸੰਭਾਲ ਅਤੇ ਉਨ੍ਹਾਂ ਦਾ ਮੁੜ ਨਿਰਮਾਣ ਹੋਵੇਗੀ। ਉਨ੍ਹਾਂ ਦਾ ਟੀਚਾ ਇਹ ਤੈਅ ਕਰਨਾ ਹੋਵੇਗਾ ਕਿ ਰੇਲਵੇ ਕਾਰਖਾਨਿਆਂ ’ਚ ‘ਵੰਦੇ ਭਾਰਤ ਐਕਸਪ੍ਰੈੱਸ’ ਵਰਗੀਆਂ ਰੇਲ ਗੱਡੀਆਂ ਦੇ ਅਤਿ-ਆਧੁਨਿਕ ਡੱਬਿਆਂ ਦਾ ਨਿਰਮਾਣ ਵਧੇ ਤਾਂ ਜੋ ਉਨ੍ਹਾਂ ਦੀਆਂ ਸੇਵਾਵਾਂ ਵਧਾਈਆਂ ਜਾ ਸਕਣ।