2 ਸਤੰਬਰ ਨੂੰ ਹੋਵੇਗਾ ਮੈਕੇਨ ਦਾ ਅੰਤਿਮ ਸਸਕਾਰ

ਵਾਸ਼ਿੰਗਟਨ – ਅਮਰੀਕੀ ਸੈਨੇਟਰ ਅਤੇ ਵੀਅਤਨਾਮ ਯੁੱਧ ਦੇ ਹੀਰੋ ਜੌਨ ਮੈਕੇਨ ਦਾ 81 ਸਾਲ ਦੀ ਉਮਰ ਵਿਚ ਸ਼ਨੀਵਾਰ ਨੂੰ ਦੇਹਾਂਤ ਹੋ ਗਿਆ। ਮਰਹੂਮ ਸੈਨੇਟਰ ਜੌਨ ਮੈਕੇਨ ਦੀ ਮ੍ਰਿਤਕ ਦੇਹ ਅਖੀਰੀ ਦਰਸ਼ਨਾਂ ਲਈ ਸ਼ੁੱਕਰਵਾਰ ਨੂੰ ਵਾਸ਼ਿੰਗਟਨ ਵਿਚ ਅਮਰੀਕੀ ਕੈਪੀਟੋਲ ਵਿਚ ਰੱਖੀ ਜਾਵੇਗੀ। ਮੈਕੇਨ ਦੇ ਦਫਤਰ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਕੌਮੀ ਕੈਥੇਡ੍ਰਲ ਵਿਚ ਉਨ੍ਹਾਂ ਦੇ ਯਾਦਗਾਰੀ ਸਮਾਰੋਹ ਦੇ ਬਾਅਦ 2 ਸਤੰਬਰ (ਐਤਵਾਰ) ਨੂੰ ਐਨਾਪੋਲਿਸ ਨੇੜੇ ਅਮਰੀਕੀ ਜਲ ਸੈਨਾ ਅਕੈਡਮੀ ਵਿਚ ਦਫਨਾਇਆ ਜਾਵੇਗਾ। ਕੌਮੀ ਪੱਧਰ ਦੇ ਆਯੋਜਨਾਂ ਤੋਂ ਪਹਿਲਾਂ ਬੁੱਧਵਾਰ ਨੂੰ ਮੈਕੇਨ ਦੀ ਮ੍ਰਿਤਕ ਦੇਹ ਉਨ੍ਹਾਂ ਦੇ ਗ੍ਰਹਿ ਰਾਜ ਅਰੀਜ਼ੋਨਾ ਦੀ ਰਾਜਧਾਨੀ ਰੋਤੁੰਡਾ ਵਿਚ ਰੱਖੀ ਜਾਵੇਗੀ, ਜਿੱਥੇ ਲੋਕ ਉਨ੍ਹਾਂ ਨੂੰ ਸ਼ਰਧਾਂਜਲੀ ਦੇ ਸਕਣਗੇ। ਇਸ ਦੇ ਇਲਾਵਾ ਨੌਰਥ ਫੋਨੀਕਸ ਬੈਪਟਿਸਟ ਚਰਚ ਵਿਚ ਉਨ੍ਹਾਂ ਦਾ ਯਾਦਗਾਰੀ ਸਮਾਰੋਹ ਆਯੋਜਿਤ ਕੀਤਾ ਜਾਵੇਗਾ।