ਮੇਹੁਲ ਚੋਕਸੀ ਤੇ ਸ਼ਿਕੰਜਾ, ਜਾਰੀ ਹੋਇਆ ਰੈਡ ਕਾਰਨਰ ਨੋਟਿਸ

ਨਵੀਂ ਦਿੱਲੀ – ਪੰਜਾਬ ਨੈਸ਼ਨਲ ਬੈਂਕ ਨਾਲ 11400 ਕਰੋੜ ਰੁਪਏ ਦਾ ਘੋਟਾਲਾ ਕਰਨ ਵਾਲੇ ਮੁੱਖ ਦੋਸ਼ੀ ਮੇਹੁਲ ਚੋਕਸੀ ਦੇ ਖਿਲਾਫ ਸ਼ਿਕੰਜਾ ਕੱਸਦੇ ਹੋਏ ਰੈਡ ਕਾਰਨਰ ਨੋਟਿਸ ਜਾਰੀ ਕਰ ਦਿੱਤਾ ਗਿਆ ਹੈ| ਇਹ ਫੈਸਲਾ ਇੰਟਰਪੋਲ ਸੀ.ਬੀ.ਆਈ. ਵਲੋਂ ਬੇਨਤੀ ਕਰਨ ਤੋਂ ਬਾਅਦ ਲਿਆ ਗਿਆ ਹੈ| ਜ਼ਿਕਰਯੋਗ ਹੈ ਕਿ ਨੀਰਵ ਮੋਦੀ ਅਤੇ ਮੇਹੁਲ ਚੋਕਸੀ ਨੇ ਪੰਜਾਬ ਨੈਸ਼ਨਲ ਬੈਂਕ ਦੀ ਗਰੰਟੀ ਤੇ ਪੈਸੇ ਲਏ ਸਨ ਪਰ ਇਸ ਪੈਸੇ ਨੂੰ ਵਾਪਸ ਕੀਤੇ ਬਿਨਾਂ ਹੀ ਵਿਦੇਸ਼ ਫਰਾਰ ਹੋ ਗਏ| ਮੇਹੁਲ ਚੋਕਸੀ ਰਿਸ਼ਤੇ ਵਿੱਚ ਨੀਰਵ ਮੋਦੀ ਦੇ ਮਾਮਾ ਲੱਗਦੇ ਹਨ| ਪੰਜਾਬ ਨੈਸ਼ਨਲ ਬੈਂਕ ਤੋਂ ਨੀਰਵ ਮੋਦੀ ਨੇ 2000 ਕਰੋੜ ਰੁਪਏ ਅਤੇ ਮੇਹੁਲ ਚੋਕਸੀ ਨੇ 9000 ਕਰੋੜ ਰੁਪਏ ਲਏ ਸਨ| ਜਿਕਰਯੋਗ ਹੈ ਕਿ ਇਹ ਦੋਵੇਂ ਵਿਦੇਸ਼ਾਂ ਤੋਂ ਕੱਚਾ ਹੀਰਾ ਆਯਾਤ ਕਰਨ ਦਾ ਕਾਰੋਬਾਰ ਕਰਦੇ ਹਨ| ਇਕ ਕਰੋੜ ਦੇ ਚੈੱਕ ਬਾਊਂਸ ਮਾਮਲੇ ਵਿੱਚ ਪਿਛਲੇ ਸਾਲ ਮੇਹੁਲ ਨੂੰ ਭਗੌੜਾ ਕਰਾਰ ਦਿੱਤਾ ਗਿਆ ਸੀ| ਪੰਜਾਬ ਨੈਸ਼ਨਲ ਘਪਲਾ ਦੇ ਦੋਸ਼ ਦੀ ਕਾਰਵਾਈ ਕਰਦੇ ਹੋਏ ਈ.ਡੀ. ਨੇ ਚੰਡੀਗੜ੍ਹ ਵਿੱਚ ਗੀਤਾਂਜਲੀ ਦੇ ਆਉਟਲੇਟ ਤੇ ਵੀ ਛਾਪੇਮਾਰੀ ਕੀਤੀ ਸੀ, ਜਿਸ ਤੋਂ ਬਾਅਦ ਟੀਮ ਨੇ ਕਈ ਕੀਮਤੀ ਗਹਿਣੇ ਅਤੇ ਘੜੀਆਂ ਜ਼ਬਤ ਕੀਤੀਆ| ਮੇਹੁਲ ਅਜੇ ਐਂਟੀਗਾ ਵਿੱਚ ਰਹਿ ਰਹੇ ਹਨ ਉਸ ਨੇ ਸਾਲ 2017 ਵਿਚ ਉਥੋਂ ਦੀ ਨਾਗਰਿਕਤਾ ਲੈ ਲਈ ਸੀ| ਹੁਣ ਮੇਹੁਲ ਚੋਕਸੀ ਨੇ ਭਾਰਤ ਵਾਪਿਸ ਨਾ ਆਉਣ ਦਾ ਨਵਾਂ ਬਹਾਨਾ ਬਣਾਇਆ ਹੈ| ਉਸ ਨੇ ਕਿਹਾ ਹੈ ਕਿ ਉਹ ਤਿੰਨ ਮਹੀਨੇ ਤੱਕ ਭਾਰਤ ਵਾਪਿਸ ਨਹੀਂ ਆ ਸਕਦਾ | ਉਸ ਦੇ ਵਕੀਲ ਨੇ ਮੁੰਬਈ ਦੀ ਇਕ ਅਦਾਲਤ ਨੂੰ ਦੱਸਿਆ ਕਿ ਚੋਕਸੀ ਯਾਤਰਾ ਕਰਨ ਲਈ ਪੂਰੀ ਤਰ੍ਹਾਂ ਸਿਹਤਮੰਦ ਨਹੀਂ ਹਨ|