ਵਿਦੇਸ਼ੀ ਧਰਤੀ ’ਤੇ ਕੋਹਲੀ ਨੇ ਬਣਾਇਆ ਇੱਕ ਹੋਰ ਰਿਕਾਰਡ

ਮੈਲਬਰਨ – ਕਪਤਾਨ ਵਿਰਾਟ ਕੋਹਲੀ ਭਾਰਤ ਵੱਲੋਂ ਵਿਦੇਸ਼ੀ ਧਰਤੀ ’ਤੇ ਇੱਕ ਕੈਲੰਡਰ ਸਾਲ ਵਿੱਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲਾ ਬੱਲੇਬਾਜ਼ ਬਣ ਗਿਆ ਹੈ। ਕੋਹਲੀ ਨੇ ਆਸਟਰੇਲੀਆ ਖ਼ਿਲਾਫ਼ ਤੀਜੇ ਟੈਸਟ ਕ੍ਰਿਕਟ ਮੈਚ ਦੇ ਦੂਜੇ ਦਿਨ ਅੱਜ ਇੱਥੇ ਆਪਣੀ 82 ਦੌੜਾਂ ਦੀ ਪਾਰੀ ਦੌਰਾਨ ਇਹ ਰਿਕਾਰਡ ਆਪਣੇ ਨਾਮ ਕੀਤਾ। ਕੋਹਲੀ ਦੇ ਨਾਮ ਸਾਲ 2018 ਵਿੱਚ ਵਿਦੇਸ਼ੀ ਧਰਤੀ ’ਤ 1138 ਦੌੜਾਂ ਦਰਜ ਹੋ ਗਈਆਂ ਹਨ ਅਤੇ ਉਸ ਨੇ ਰਾਹੁਲ ਦਰਾਵਿੜ ਦੇ ਸਾਲ 2002 ਵਿੱਚ ਬਣਾਏ 1137 ਦੌੜਾਂ ਦੇ ਰਿਕਾਰਡ ਨੂੰ ਤੋੜ ਦਿੱਤਾ। ਦਰਾਵਿੜ ਦਾ ਰਿਕਾਰਡ ਆਪਣੇ ਨਾਮ ਕਰਨ ਤੋਂ ਤੁਰੰਤ ਮਗਰੋਂ ਹੀ ਕੋਹਲੀ ਮਿਸ਼ੇਲ ਸਟਾਰਕ ਦੀ ਗੇਂਦ ’ਤੇ ਫਿੰਚ ਨੂੰ ਕੈਚ ਦੇ ਬੈਠਾ। ਭਾਰਤੀ ਕਪਤਾਨ ਜੇਕਰ ਦੂਜੀ ਪਾਰੀ ਵਿੱਚ 74 ਦੌੜਾਂ ਬਣਾ ਲੈਂਦਾ ਹੈ ਤਾਂ ਇੱਕ ਕੈਲੰਡਰ ਸਾਲ ਵਿੱਚ ਵਿਦੇਸ਼ੀ ਪਿੱਚਾਂ ’ਤੇ ਸਭ ਤੋਂ ਵੱਧ ਦੌੜਾਂ ਦਾ ਵਿਸ਼ਵ ਰਿਕਾਰਡ ਵੀ ਉਸ ਦੇ ਨਾਮ ਹੋ ਜਾਵੇਗਾ। ਇਹ ਰਿਕਾਰਡ ਇਸ ਵੇਲੇ ਦੱਖਣੀ ਅਫਰੀਕਾ ਦੇ ਸਾਬਕਾ ਕਪਤਾਨ ਗ੍ਰੀਮ ਸਮਿੱਥ ਦੇ ਨਾਮ ਹੈ, ਜਿਸ ਨੇ 2008 ਵਿੱਚ 1212 ਦੌੜਾਂ ਵਿਦੇਸ਼ੀ ਧਰਤੀ ’ਤੇ ਬਣਾਈਆਂ ਸਨ। ਸਮਿੱਥ ਮਗਰੋਂ ਵੈਸਟ ਇੰਡੀਜ਼ ਦੇ ਵਿਵਿਅਨ ਰਿਚਰਡਜ਼ (1154 ਦੌੜਾਂ) ਦਾ ਨੰਬਰ ਆਉਂਦਾ ਹੈ, ਜਿਸ ਨੇ 1976 ਵਿੱਚ ਇਹ ਰਿਕਾਰਡ ਬਣਾਇਆ ਸੀ। ਕੋਹਲੀ ਇਸ ਸੂਚੀ ਵਿੱਚ ਤੀਜੇ ਸਥਾਨ ’ਤੇ ਹੈ। ਕੋਹਲੀ ਨੇ ਇਸ ਸਾਲ ਦੱਖਣੀ ਅਫਰੀਕਾ ਵਿੱਚ ਤਿੰਨ ਟੈਸਟ ਮੈਚਾਂ ਵਿੱਚ 47.66 ਦੀ ਔਸਤ ਨਾਲ 286 ਦੌੜਾਂ ਅਤੇ ਇੰਗਲੈਂਡ ਵਿੱਚ ਪੰਜ ਟੈਸਟ ਮੈਚਾਂ 59.30 ਦੀ ਔਸਤ ਨਾਲ 593 ਦੌੜਾਂ ਬਣਾਈਆਂ। ਉਹ ਆਸਟਰੇਲੀਆ ਵਿੱਚ ਤਿੰਨ ਟੈਸਟ ਮੈਚਾਂ ਦੀਆਂ ਪੰਜ ਪਾਰੀਆਂ ਵਿੱਚ ਹੁਣ ਤੱਕ 51.80 ਦੀ ਔਸਤ ਨਾਲ 259 ਦੌੜਾਂ ਬਣਾ ਚੁੱਕਿਆ ਹੈ। ਕੋਹਲੀ ਨੇ ਸਾਲ 2018 ਵਿੱਚ ਹੁਣ ਤੱਕ 1322 ਦੌੜਾਂ ਬਣਾਈਆਂ ਹਨ।