ਇੰਦਰਾ ਨੂਈ ਨੂੰ ਮਿਲ ਸਕਦੀ ਹੈ ਵਿਸ਼ਵ ਬੈਂਕ ਦੀ ਕਮਾਨ

ਨਿਊਯਾਰਕ – ਭਾਰਤ ’ਚ ਜਨਮੀ ਪੈਪਸੀਕੋ ਦੀ ਸਾਬਕਾ ਸੀਈਓ ਇੰਦਰਾ ਨੂਈ ਦਾ ਨਾਮ ਵਿਸ਼ਵ ਬੈਂਕ ਦੇ ਦਾਅਵੇਦਾਰਾਂ ’ਚ ਸ਼ੁਮਾਰ ਹੈ। ਰਾਸ਼ਟਰਪਤੀ ਦੀ ਧੀ ਇਵਾਂਕਾ ਟਰੰਪ ਵੱਲੋਂ ਇੰਦਰਾ ਦੇ ਨਾਮ ਦੀ ਵਕਾਲਤ ਕੀਤੀ ਗਈ ਹੈ। ਜ਼ਿਕਰਯੋਗ ਹੈ ਕਿ ਨੂਈ (63) ਨੇ ਪੈਪਸੀ ਦੀ ਕਮਾਨ 12 ਸਾਲ ਤੱਕ ਸੰਭਾਲਣ ਮਗਰੋਂ ਪਿਛਲੇ ਸਾਲ ਅਗਸਤ ’ਚ ਅਹੁਦਾ ਛੱਡ ਦਿੱਤਾ ਸੀ। ‘ਨਿਊਯਾਰਕ ਟਾਈਮਜ਼’ ਦੀ ਰਿਪੋਰਟ ਮੁਤਾਬਕ ਵਿਸ਼ਵ ਬੈਂਕ ਦੇ ਮੁਖੀ ਦੀ ਚੋਣ ਲਈ ਇਵਾਂਕਾ ਟਰੰਪ ਵੱਲੋਂ ਅਹਿਮ ਭੂਮਿਕਾ ਨਿਭਾਈ ਜਾ ਰਹੀ ਹੈ। ਰਿਪੋਰਟ ’ਚ ਵਿਸ਼ਵ ਬੈਂਕ ਦੇ ਵੱਕਾਰੀ ਅਹੁਦੇ ਲਈ ਕਈ ਨਾਵਾਂ ਦਾ ਜ਼ਿਕਰ ਹੈ ਅਤੇ ਕਿਹਾ ਗਿਆ ਹੈ ਕਿ ਸ਼ੁਰੂਆਤ ’ਚ ਅੱਗੇ ਚੱਲ ਰਹੇ ਕਈ ਉਮੀਦਵਾਰ ਅਕਸਰ ਬਾਅਦ ’ਚ ਪੱਛੜ ਜਾਂਦੇ ਹਨ ਜਾਂ ਰਾਸ਼ਟਰਪਤੀ ਦੀ ਮੋਹਰ ਲੱਗਣ ਤੋਂ ਪਹਿਲਾਂ ਹੀ ਉਹ ਆਪਣਾ ਨਾਮ ਵਾਪਸ ਲੈ ਲੈਂਦੇ ਹਨ। ਅਜੇ ਇਹ ਅਸਪੱਸ਼ਟ ਹੈ ਕਿ ਜੇਕਰ ਟਰੰਪ ਪ੍ਰਸ਼ਾਸਨ ਨੂਈ ਨੂੰ ਉੱਚ ਅਹੁਦੇ ਲਈ ਚੁਣਦਾ ਹੈ ਤਾਂ ਕੀ ਉਹ ਇਸ ਨੂੰ ਸਵੀਕਾਰ ਕਰੇਗੀ ਜਾਂ ਨਹੀਂ। ਟਰੰਪ ਦੀ ਧੀ ਇਵਾਂਕਾ ਨੇ ਟਵੀਟ ਕਰਕੇ ਨੂਈ ਨੂੰ ‘ਮਾਰਗਦਰਸ਼ਕ ਅਤੇ ਪ੍ਰੇਰਣਾਸ੍ਰੋਤ’ ਦੱਸਦਿਆਂ ਉਸ ਦਾ ਨਾਮ ਵਿਸ਼ਵ ਬੈਂਕ ਦੇ ਜਾਨਸ਼ੀਨ ਵਜੋਂ ਅੱਗੇ ਵਧਾਇਆ ਹੈ।