52 ਸੰਸਦ ਮੈਂਬਰ ਹੀ ਭਾਜਪਾ ਨਾਲ ਲੜਨ ਲਈ ਕਾਫ਼ੀ : ਰਾਹੁਲ ਗਾਂਧੀ

ਨਵੀਂ ਦਿੱਲੀ- ਕਾਂਗਰਸ ਪ੍ਰਧਾਨ ਰਾਹੁਲ ਗਾਂਧੀ ਨੇ ਪਹਿਲੀ ਵਾਰ ਸ਼ਨਿੱਚਰਵਾਰ ਨੂੰ ਨਰਿੰਦਰ ਮੋਦੀ ਸਰਕਾਰ ਖ਼ਿਲਾਫ਼ ਮੋਰਚਾ ਖੋਲ੍ਹਿਆ। ਪਾਰਟੀ ਦੇ ਲੋਕ ਸਭਾ ਮੈਂਬਰਾਂ ਨੂੰ ਸੰਘਰਸ਼ ਦਾ ਮੰਤਰ ਦਿੰਦੇ ਹੋਏ ਕਾਂਗਰਸ ਪ੍ਰਧਾਨ ਨੇ ਨਵੇਂ ਚੁਣੇ ਗਏ ਲੋਕ ਸਭਾ ਮੈਂਬਰਾਂ ਦੀ ਪਹਿਲੀ ਬੈਠਕ ਵਿੱਚ ਕਿਹਾ ਕਿ ਹਰੇਕ ਵਿਅਕਤੀ ਨੂੰ ਯਾਦ ਰੱਖਣਾ ਚਾਹੀਦੈ ਕਿ ਇਹ ਲੜਾਈ ਸੰਵਿਧਾਨ ਬਚਾਉਣ ਲਈ ਹੈ। ਕਾਂਗਰਸ ਦੇ 52 ਐੱਮ.ਪੀ. ਹੀ ਭਾਜਪਾ ਨਾਲ ਇੰਚ-ਇੰਚ ਦੀ ਲੜਾਈ ਲੜਨ ਲਈ ਕਾਫ਼ੀ ਹਨ। ਬੈਠਕ ਵਿੱਚ ਕਾਂਗਰਸ ਪ੍ਰਧਾਨ ਨੇ ਨਵ ਨਿਯੁਕਤ ਸੰਸਦ ਮੈਂਬਰਾਂ ਨੂੰ ਨਿਆਂ ਅਤੇ ਸੰਵਿਧਾਨ ਲਈ ਸੰਘਰਸ਼ ਦਾ ਸਬਕ ਦਿੰਦੇ ਹੋਏ ਕਿਹਾ ਕਿ ਅਸੀਂ 52 ਸੰਸਦ ਮੈਂਬਰਾਂ ਨੇ ਇਕਜੁੱਟ ਹੋ ਕੇ ਨਿਆਂ ਦੀ ਲੜਾਈ ਲੜਨੀ ਹੈ। ਬੇਸ਼ੱਕ ਸਾਡੀ ਗਿਣਤੀ ਘੱਟ ਹੋਵੇ, ਅਸੀਂ ਭਾਜਪਾ ਨਾਲ ਇੰਚ-ਇੰਚ ਦੀ ਲੜਾਈ ਲੜ ਸਕਦੇ ਹਾਂ। ਸਾਡੀ ਲੜਾਈ ਜਾਤੀ, ਧਰਮ, ਲਿੰਗ, ਰੰਗਭੇਦ ਤੋਂ ਪਰ੍ਹੇ ਹੈ। ਇਹ ਦੇਸ਼ ਦੇ ਹਰ ਉਸ ਨਾਗਰਿਕ ਲਈ ਹੈ ਜੋ ਜਮਹੂਰੀ ਪ੍ਰਕਿਰਿਆ ਵਿੱਚ ਯਕੀਨ ਰੱਖਦਾ ਹੈ।