ਭਾਰੀ ਮੀਂਹ ਨੇ ਧੋਤਾ ਪਾਕਿਸਤਾਨ ਅਤੇ ਸ੍ਰੀਲੰਕਾ ਦਾ ਮੈਚ

ਬ੍ਰਿਸਟਲ – ਪਾਕਿਸਤਾਨ ਤੇ ਸ੍ਰੀਲੰਕਾ ਵਿਚਾਲੇ ਅੱਜ ਇੱਥੇ ਮੀਂਹ ਕਾਰਨ ਆਈਸੀਸੀ ਕ੍ਰਿਕਟ ਵਿਸ਼ਵ ਕੱਪ ਮੈਚ ਰੱਦ ਹੋ ਗਿਆ, ਜਿਸ ਵਿੱਚ ਦੋਹਾਂ ਟੀਮਾਂ ਨੂੰ ਇਕ-ਇਕ ਅੰਕ ਮਿਲਿਆ। ਮੀਂਹ ਕਾਰਨ ਮੈਦਾਨ ਖੇਡਣ ਲਾਇਕ ਨਹੀਂ ਸੀ। ਅੰਪਾਇਰ ਨਾਈਜ਼ੇਲ ਲੌਂਗ ਤੇ ਈਆਨ ਗੋਲਡ ਨੇ ਮੈਦਾਨ ਦਾ ਦੋ ਵਾਰ ਮੁਆਇਨਾ ਕਰਨ ਤੋਂ ਬਾਅਦ ਸ਼ਾਮ 3.46 ਵਜੇ ਇਸ ਮੈਚ ਨੂੰ ਰੱਦ ਕਰਨ ਦਾ ਫ਼ੈਸਲਾ ਲਿਆ। ਦੋਵੇਂ ਟੀਮਾਂ ਨੇ ਦੋ ਅੰਕ ਬਰਾਬਰ ਵੰਡ ਲਏ। ਅਸਮਾਨ ’ਤੇ ਉਦੋਂ ਵੀ ਬੱਦਲ ਛਾਏ ਹੋਏ ਸਨ ਜਦੋਂ 20-20 ਓਵਰਾਂ ਦਾ ਮੈਚ ਕਰਾਉਣ ਲਈ ਮੈਦਾਨ ਦਾ ਆਖ਼ਰੀ ਮੁਆਇਨਾ ਹੋਇਆ। ਪਾਕਿਸਤਾਨ ਤੇ ਸ੍ਰੀਲੰਕਾ ਦੋਹਾਂ ਨੇ ਇਕ ਇਕ ਮੈਚ ਜਿੱਤਿਆ ਹੈ ਅਤੇ ਇਕ ਇਕ ਮੈਚ ਹਾਰਿਆ ਹੈ। ਪਾਕਿਤਸਾਨ ਨੂੰ ਸ਼ੁਰੂਆਤੀ ਮੈਚ ਵਿੱਚ ਵੈਸਟਇੰਡੀਜ਼ ਤੋਂ ਸੱਤ ਵਿਕਟਾਂ ਨਾਲ ਹਾਰ ਝੱਲਣੀ ਪਈ ਸੀ ਜਦੋਂਕਿ ਉਸ ਨੇ ਇੰਗਲੈਂਡ ਨੂੰ 14 ਦੌੜਾਂ ਨਾਲ ਹਰਾਇਆ ਸੀ।