ਨਵਾਜ਼ ਸ਼ਰਹਫ ਅਤੇ ਉਸ ਦੀ ਧੀ ਨੂੰ ਜੇਲ੍ਹ ਵਿੱਚ ‘ਬੀ’ ਸ਼੍ਰੇਣੀ ਦੀਆਂ ਸਹੂਲਤਾਂ ਮਿਲੀਆਂ

ਇਸਲਾਮਾਬਾਦ – ਪਾਕਿਸਤਾਨ ਦੇ ਸਾਬਕਾ ਪ੍ਰਧਾਨ ਮੰਤਰੀ ਨਵਾਜ਼ ਸ਼ਰੀਫ ਅਤੇ ਉਨ੍ਹਾਂ ਦੀ ਧੀ ਮਰੀਅਮ ਸ਼ਰੀਫ ਨੇ ਰਾਵਲਪਿੰਡੀ ਵਿੱਚ ਸਥਿਤ ਅਦਿਯਾਲਾ ਜੇਲ ਵਿਚ ਪਹਿਲੀ ਰਾਤ ਬਤੀਤ ਕੀਤੀ| ਜੇਲ ਵਿੱਚ ਬੰਦ ਦੋਹਾਂ ਪਿਓ-ਧੀ ਨੂੰ ‘ਬੀ’ ਸ਼੍ਰੇਣੀ ਦੀਆਂ ਸਹੂਲਤਾਂ ਮੁਹੱਈਆ ਕਰਵਾਈਆਂ ਗਈਆਂ, ਜਿਸ ਵਿੱਚ ਟੀ. ਵੀ, ਏਸੀ, ਫਰਿੱਜ ਅਤੇ ਅਖਬਾਰ ਆਦਿ ਸਹੂਲਤਾਂ ਮਿਲੀਆਂ| ਦੱਸਣਯੋਗ ਹੈ ਕਿ ਰਾਸ਼ਟਰੀ ਜਵਾਬਦੇਹੀ ਬਿਊਰੋ ਦੇ ਅਧਿਕਾਰੀਆਂ ਨੇ ਨਵਾਜ਼ ਸ਼ਰੀਫ ਅਤੇ ਮਰੀਅਮ ਨੂੰ ਲੰਡਨ ਵਿੱਚ 4 ਲਗਜ਼ਰੀ ਫਲੈਟਾਂ ਨਾਲ ਜੁੜੇ ਭ੍ਰਿਸ਼ਟਾਚਾਰ ਮਾਮਲੇ ਨੂੰ ਲੈ ਕੇ ਲੰਡਨ ਤੋਂ ਲਾਹੌਰ ਪੁੱਜਣ ਦੇ ਤੁਰੰਤ ਬਾਅਦ ਹਿਰਾਸਤ ਵਿਚ ਲੈ ਲਿਆ ਸੀ| ਉਹ ਆਬੂ ਧਾਬੀ ਦੇ ਰਸਤਿਓਂ ਲਾਹੌਰ ਪੁੱਜੇ ਸਨ| ਉਨ੍ਹਾਂ ਦੋਹਾਂ ਨੂੰ ਇਕ ਵਿਸ਼ੇਸ਼ ਜਹਾਜ਼ ਤੋਂ ਇਸਲਾਮਾਬਾਦ ਲਿਆਂਦਾ ਗਿਆ ਅਤੇ ਫਿਰ ਪੁਲੀਸ ਕਾਫਲੇ ਦੀ ਸੁਰੱਖਿਆ ਹੇਠ ਵੱਖ-ਵੱਖ ਗੱਡੀਆਂ ਵਿਚ ਅਦਿਯਾਲਾ ਜੇਲ ਲਿਜਾਇਆ ਗਿਆ| ਅਦਿਯਾਲਾ ਜੇਲ ਵਿਚ ਇਸਲਾਮਾਬਾਦ ਮੈਜਿਸਟ੍ਰੇਟ ਅਤੇ ਸੀਨੀਅਰ ਪੁਲੀਸ ਅਧਿਕਾਰੀਆਂ ਦੀ ਹਾਜ਼ਰੀ ਵਿਚ ਡਾਕਟਰਾਂ ਦੀ ਇਕ ਟੀਮ ਨੇ ਸ਼ਰੀਫ ਅਤੇ ਉਨ੍ਹਾਂ ਦੀ ਧੀ ਮਰੀਅਮ ਦੀ ਮੈਡੀਕਲ ਜਾਂਚ ਕੀਤੀ ਅਤੇ ਉਨ੍ਹਾਂ ਨੂੰ ਤੰਦਰੁਸਤ ਘੋਸ਼ਿਤ ਕੀਤਾ| ਜ਼ਿਕਰਯੋਗ ਹੈ ਕਿ ਜਵਾਬਦੇਰੀ ਅਦਾਲਤ ਨੇ 6 ਜੁਲਾਈ ਨੂੰ ਲੰਡਨ ਵਿਚ ਅਵੇਨਫੀਲਡ ਹਾਊਸ ਵਿਚ 4 ਫਲੈਟਾਂ ਦੀ ਮਲਕੀਅਤ ਨਾਲ ਜੁੜੇ ਮਾਮਲੇ ਵਿਚ ਨਵਾਜ਼ ਸ਼ਰੀਫ ਨੂੰ 10 ਸਾਲ ਅਤੇ ਧੀ ਮਰੀਅਮ ਨੂੰ 7 ਸਾਲ ਜੇਲ ਦੀ ਸਜ਼ਾ ਸੁਣਾਈ ਗਈ| ਬੀਤੇ ਸਾਲ ਪਾਕਿਸਤਾਨ ਦੀ ਸੁਪਰੀਮ ਕੋਰਟ ਵਲੋਂ ਪਨਾਮਾ ਪੇਪਰ ਮਾਮਲੇ ਨੂੰ ਲੈ ਕੇ ਨਵਾਜ਼ ਸ਼ਰੀਫ ਨੂੰ ਅਯੋਗ ਕਰਾਰ ਦਿੱਤਾ ਗਿਆ ਸੀ|