ਕਵਾਨਹੋ ਨੇ ਯੋਣ ਸ਼ੋਸ਼ਣ ਦੇ ਦੋਸ਼ ਤੋਂ ਕੀਤਾ ਇਨਕਾਰ

ਵਾਸ਼ਿੰਗਟਨ- ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵਲੋਂ ਸੁਪਰੀਮ ਕੋਰਟ ‘ਚ ਜੱਜ ਦੇ ਅਹੁਦੇ ਲਈ ਨਾਮਜ਼ਦ ਬਰੇਟ ਕਵਾਨਹੋ ਨੇ ਇਕ ਔਰਤ ਵਲੋਂ ਆਪਣੇ ਖਿਲਾਫ ਲਗਾਏ ਗਏ ਜਿਨਸੀ ਸ਼ੋਸ਼ਣ ਦੇ ਦੋਸ਼ ਨੂੰ ਖਾਰਿਜ ਕਰ ਦਿੱਤਾ ਤੇ ਉਸ ਨੇ ਕਿਹਾ ਕਿ ਆਪਣੀ ਵਫਾਦਾਰੀ ਦੇ ਬਚਾਅ ਲਈ ਉਹ ਸਿਨੇਟ ਦੀ ਕਮੇਟੀ ਸਾਹਮਣੇ ਗਵਾਹੀ ਲਈ ਤਿਆਰ ਹੈ। ਕਵਾਨਹੋ ਦਾ ਨਾਮਜ਼ਦ ਕੀਤਾ ਜਾਣਾ ਉਦੋਂ ਵਿਵਾਦਾਂ ਦੇ ਘੇਰੇ ‘ਚ ਆਇਆ ਜਦੋਂ ਕਰਿਸਟੀਨ ਬਲੇਸੀ ਫੋਰਡ ਨੇ ਐਤਵਾਰ ‘ਦਿ ਵਾਸ਼ਿੰਗਟਨ ਪੋਸਟ’ ਨੂੰ ਕਿਹਾ ਕਿ ਉਨ੍ਹਾਂ ਨੇ 1980 ਦੇ ਦਹਾਕੇ ਦੀ ਸ਼ੁਰੂਆਤ ‘ਚ ਹਾਈ ਸਕੂਲ ‘ਚ ਉਨ੍ਹਾਂ ‘ਤੇ ਜਿਨਸੀ ਹਮਲਾ ਕੀਤਾ ਸੀ। ਕਰਿਸਟੀਨ ਬਲੇਸੀ ਫੋਰਡ ਨੇ ਇੰਟਰਵਿਊ ‘ਚ ਦੋਸ਼ ਲਾਇਆ ਕਿ ਮੈਰੀਲੈਂਡ ‘ਚ ਸੰਗਠਿਤ ਇਕ ਪਾਰਟੀ ਦੌਰਾਨ ਕਵਾਨਹੋ ਨੇ ਉਸ ਨੂੰ ਬੈੱਡ ‘ਤੇ ਸੁੱਟ ਦਿੱਤਾ ਤੇ ਉਸ ਦੇ ਕੱਪੜੇ ਉਤਾਰਨ ਦੀ ਕੋਸ਼ਿਸ਼ ਕੀਤੀ। ਜਦੋਂ ਉਸ ਨੇ ਰੋਲਾ ਪਾਉਣ ਦੀ ਕੋਸ਼ਿਸ਼ ਕੀਤੀ ਤਾਂ ਕਵਾਨਹੋ ਨੇ ਉਸ ਦੇ ਮੂੰਹ ‘ਤੇ ਹੱਥ ਰੱਖ ਦਿੱਤਾ। ਕਵਾਨਹੋ ਨੇ ਕਿਹਾ ਕਿ ਇਹ ਦੋਸ਼ ਪੂਰੀ ਤਰ੍ਹਾਂ ਝੂਠਾ ਹੈ। ਮੈਂ ਇਸ ਤਰ੍ਹਾਂ ਦਾ ਕੁਝ ਵੀ ਨਹੀਂ ਕੀਤਾ। ਵਾਇਟ ਹਾਊਸ ਨੇ ਕਿਹਾ ਕਿ ਉਹ ਉਨ੍ਹਾਂ ਦੇ ਨਾਲ ਹਨ।