ਭਾਰਤ ਮਹਿਲਾ ਹਾਕੀ ਟੀਮ ਦੀ ਜੇਤੂ ਲੈਅ ਬਰਕਰਾਰ, ਉਰੂਗਵੇ ਨੂੰ 2-1 ਨਾਲ ਹਰਾਇਆ

ਭਾਰਤ ਦੀ ਅੰਡਰ-18 ਮਹਿਲਾ ਹਾਕੀ ਟੀਮ ਨੇ ਅੱਜ ਇੱਥੇ ਯੂਥ ਓਲੰਪਿਕਸ ਦੇ ਆਪਣੇ ਦੂਜੇ ਮੈਚ ਵਿਚ ਉਰੂਗਵੇ ਨੂੰ 2-1 ਨਾਲ ਮਾਤ ਦੇ ਦਿੱਤੀ। ਭਾਰਤ ਲਈ ਲਾਲਰੇਮਸਿਆਮੀ (ਪਹਿਲੇ ਤੇ 19ਵੇਂ ਮਿੰਟ) ਨੇ ਦੋਵੇਂ ਗੋਲ ਦਾਗੇ। ਜਦਕਿ ਉਰੂਗਵੇ ਲਈ ਮੈਗਡੇਲੇਨਾ ਵਰਗਾ (10ਵੇਂ) ਨੇ ਇੱਕੋ ਇਕ ਗੋਲ ਕੀਤਾ। ਭਾਰਤੀ ਟੀਮ ਨੇ ਇਸ ਤੋਂ ਪਹਿਲਾਂ ਆਸਟ੍ਰੀਆ ਨੂੰ 4-2 ਨਾਲ ਮਾਤ ਦਿੱਤੀ ਸੀ। ਭਾਰਤ ਨੇ ਮੈਚ ਵਿਚ ਸ਼ਾਨਦਾਰ ਸ਼ੁਰੂਆਤ ਕੀਤੀ ਤੇ ਪਹਿਲੇ ਹੀ ਮਿੰਟ ਵਿਚ ਚੜ੍ਹਤ ਕਾਇਮ ਕਰ ਲਈ। ਭਾਰਤੀ ਟੀਮ ਪਹਿਲੇ ਅੱਧ ਵਿਚ ਹਾਵੀ ਰਹੀ। ਨੌਵੇਂ ਮਿੰਟ ਵਿਚ ਮੁਮਤਾਜ਼ ਖ਼ਾਨ ਦੇ ਗੋਲ ਨੂੰ ਅੰਪਾਇਰ ਨੇ ਨਕਾਰ ਦਿੱਤਾ ਤੇ ਫਾਊਲ ਦਾ ਇਸ਼ਾਰਾ ਕਰ ਦਿੱਤਾ। ਉਰੂਗਵੇ ਨੂੰ ਪਹਿਲੇ ਅੱਧ ਦੇ ਆਖ਼ਰੀ ਮਿੰਟ ਵਿਚ ਬਰਾਬਰੀ ਹਾਸਲ ਕਰਨ ਦਾ ਮੌਕਾ ਮਿਲਿਆ ਤੇ ਉਹ ਇਸ ਵਿਚ ਕਾਮਯਾਬ ਰਹੇ। ਭਾਰਤੀ ਟੀਮ ਦੂਜੇ ਅੱਧ ਵਿਚ ਵੀ ਹਾਵੀ ਰਹੀ ਪਰ ਫੇਰ ਵੀ ਜੇਤੂ ਗੋਲ ਲਈ 19 ਮਿੰਟ ਤਕ ਇੰਤਜ਼ਾਰ ਕਰਨਾ ਪਿਆ। ਯੂਥ ਓਲੰਪਿਕਸ ਵਿਚ ਇਹ ਮੁਕਾਬਲੇ ਫੀਲਡ ਹਾਕੀ ਵਾਂਗ ਹੁੰਦੇ ਹਨ ਤੇ ਮੈਚ 20 ਮਿੰਟ ਦਾ ਹੁੰਦਾ ਹੈ।