BCCI ਕੋਈ ਸਰਕਾਰੀ ਬਾਡੀ ਨਹੀਂ ਜਿਸ ‘ਤੇ RTI ਲਾਗੂ ਹੋਵੇ : ਵਿਨੋਦ ਰਾਏ

ਨਵੀਂ ਦਿੱਲੀ – ਕੇਂਦਰੀ ਸੂਚਨਾ ਕਮਿਸ਼ਨ ਭਾਵ ਸੀ.ਆਈ.ਸੀ. ਨੇ ਭਾਵੇਂ ਹੀ ਬੀ.ਸੀ.ਸੀ.ਆਈ. ਨੂੰ ਆਰ.ਟੀ.ਆਈ. ਦੇ ਤਹਿਤ ਲਿਆਉਣ ਦਾ ਹੁਕਮ ਸੁਣਾਇਆ ਹੋਵੇ ਪਰ ਬੋਰਡ ਇਸ ਨੂੰ ਲਾਗੂ ਕਰਨ ਦੇ ਮੂਡ ‘ਚ ਬਿਲਕੁਲ ਵੀ ਨਹੀਂ ਹੈ। ਸੁਪਰੀਮ ਕੋਰਟ ਦੇ ਹੁਕਮ ਦੇ ਤਹਿਤ ਬੀ.ਸੀ.ਸੀ.ਆਈ. ਨੂੰ ਚਲਾ ਰਹੀ ਪ੍ਰਸ਼ਾਸਕਾਂ ਦੀ ਕਮੇਟੀ ਅਰਥਾਤ ਸੀ.ਓ.ਏ. ਦੇ ਮੁਖੀ ਵਿਨੋਦ ਰਾਏ ਨੇ ਸਪੱਸ਼ਟ ਕੀਤਾ ਹੈ ਕਿ ਬੋਰਡ ਇਕ ਖੁਦ ਮੁਖਤਿਆਰ ਬਾਡੀ ਹੈ ਅਤੇ ਇਸ ਨੂੰ ਆਰ.ਟੀ.ਆਈ. ਦੇ ਤਹਿਤ ਨਹੀਂ ਲਿਆਇਆ ਜਾ ਸਕਦਾ ਹੈ। ਪੱਤਰਕਾਰਾਂ ਨੂੰ ਦਿੱਤੇ ਇੰਟਰਵਿਊ ‘ਚ ਵਿਨੋਦ ਰਾਏ ਨੇ ਕਿਹਾ, ”ਅਸੀਂ ਪਹਿਲਾਂ ਵੀ ਕਹਿ ਚੁੱਕੇ ਹਾਂ ਕਿ ਬੀ.ਸੀ.ਸੀ.ਆਈ. ਸਰਕਾਰੀ ਬਾਡੀ ਨਹੀਂ ਹੈ। ਲਿਹਾਜ਼ਾ ਇਸ ਨੂੰ ਆਰ.ਟੀ.ਆਈ ਦੇ ਅੰਡਰ ਨਹੀਂ ਲਿਆਇਆ ਜਾ ਸਕਦਾ। ਅਸੀਂ ਇਸ ਮਸਲੇ ਨੂੰ ਲੈ ਕੇ ਮਈ ‘ਚ ਮਦਰਾਸ ਹਾਈਕੋਰਟ ਜਾ ਚੁੱਕੇ ਹਾਂ ਅਤੇ ਅਸੀਂ ਸੀ.ਆਈ.ਸੀ. ਨੂੰ ਕਿਹਾ ਵੀ ਸੀ ਕਿ ਕਿਉਂਕਿ ਇਹ ਮਸਲਾ ਹੁਣ ਅਦਾਲਤ ‘ਚ ਹੈ ਲਿਹਾਜ਼ਾ ਇਸ ‘ਤੇ ਫੈਸਲਾ ਨਹੀਂ ਦਿੱਤਾ ਜਾ ਸਕਦਾ।” ਹਾਲਾਂਕਿ ਵਿਨੋਦ ਰਾਏ ਨੇ ਇਹ ਵੀ ਕਿਹਾ ਕਿ ਉਨ੍ਹਾਂ ਨੇ ਬੀ.ਸੀ.ਸੀ.ਆਈ. ਨੂੰ ਕਾਫੀ ਹੱਦ ਤੱਕ ਪਾਰਦਰਸ਼ੀ ਬਣਾ ਵੀ ਦਿੱਤਾ ਹੈ ਅਤੇ ਟੀਮ ਸਲੈਕਸ਼ਨ, ਖਿਡਾਰੀਆਂ ਦੀ ਸੱਟ ਅਤੇ ਡੋਪਿੰਗ ਨਾਲ ਜੁੜੇ ਮਸਲਿਆਂ ਦੇ ਇਲਾਵਾ ਹਰ ਗੱਲ ‘ਤੇ ਜਨਤਾ ਦੀ ਜਾਣਕਾਰੀ ‘ਚ ਰੱਖਣਾ ਚਾਹੁੰਦੇ ਹਾਂ।