ਅਮਰੀਕਾ ‘ਚ ਬੱਸ ਪਲਟਨ ਨਾਲ 2 ਦੀ ਮੌਤ, 44 ਜ਼ਖਮੀ

ਵਾਸ਼ਿੰਗਟਨ – ਅਮਰੀਕਾ ਦੇ ਦੱਖਣੀ ਸੂਬੇ ਮਿਸੀਸਿਪੀ ‘ਚ ਬੁੱਧਵਾਰ ਨੂੰ ਇਕ ਯਾਤਰੀ ਬੱਸ ਦੇ ਪਲਟਨ ਨਾਲ ਦੋ ਲੋਕਾਂ ਦੀ ਮੌਤ ਹੋ ਗਈ ਅਤੇ 44 ਜ਼ਖਮੀ ਹੋ ਗਏ। ਡੀਸੋਟੋ ਕਾਉਂਟੀ ਸ਼ੈਰਿਫ ਵਿਭਾਗ ਅਨੁਸਾਰ ਮੇਮਿਫਸ ਸ਼ਹਿਰ ਤੋਂ ਲੱਗਭੱਗ 40 ਮੀਲ ਦੱਖਣ ਵਿਚ ਡੀਸੋਟੋ ਕਾਉਂਟੀ ਵਿਚ ਬੱਸ ਹਾਦਸੇ ਦਾ ਸ਼ਿਕਾਰ ਹੋਈ ਜਿਸ ਵਿਚ ਇਕ ਮ੍ਰਿਤਕ ਦੀ ਪਛਾਣ 70 ਸਾਲ ਦੀ ਮਹਿਲਾ ਦੇ ਰੂਪ ਵਿਚ ਹੋਈ ਹੈ। ਰਿਪੋਰਟ ਵਿਚ ਕਿਹਾ ਗਿਆ ਕਿ ਦੁਰਘਟਨਾ ਵਿਚ ਬਚੇ ਸਾਰੇ 44 ਮੁਸਾਫਰਾਂ ਨੂੰ ਸੱਟਾ ਲੱਗੀਆਂ ਹਨ ਅਤੇ ਉਨ੍ਹਾਂ ਨੂੰ ਹਸਪਤਾਲ ਵਿਚ ਭਰਤੀ ਕਰਾਇਆ ਗਿਆ ਹੈ। ਜ਼ਖਮੀਆਂ ਵਿਚ ਘੱਟ ਤੋਂ ਘੱਟ ਤਿੰਨ ਦੀ ਹਾਲਤ ਗੰਭੀਰ ਦੱਸੀ ਜਾ ਰਹੀ ਹੈ। ਡੀਸੋਟੋ ਕਾਉਂਟੀ ਸ਼ੈਰਿਫ ਵਿਭਾਗ ਦਾ ਕਹਿਣਾ ਹੈ ਕਿ ਸੂਬੇ ਦੇ ਮੱਧ-ਦੱਖਣੀ ਦੇ ਹਿੱਸਿਆਂ ਵਿਚ ਬਰਫ ਡਿੱਗਣ ਨਾਲ ਤਿਲਕਣ ਹੈ। ਦੁਰਘਟਨਾ ਦੀ ਜਾਂਚ ਕੀਤੀ ਜਾ ਰਹੀ ਹੈ।