ਭਾਰਤ ਅਤੇ ਦੱਖਣੀ ਅਫਰੀਕਾ ਦਾ ਪਹਿਲਾ ਟੀ-20 ਮੈਚ ਮੀਂਹ ਨੇ ਧੋਤਾ

ਭਾਰਤ ਅਤੇ ਦੱਖਣੀ ਅਫਰੀਕਾ ਵਿਚਾਲੇ ਇੱਥੇ ਖੇਡਿਆ ਜਾਣ ਵਾਲਾ ਤਿੰਨ ਮੈਚਾਂ ਦੀ ਟੀ-20 ਲੜੀ ਦਾ ਪਹਿਲਾ ਮੁਕਾਬਲਾ ਲਗਾਤਾਰ ਮੀਂਹ ਪੈਣ ਕਾਰਨ ਅੱਜ ਰੱਦ ਕਰਨਾ ਪਿਆ। ਸੱਤ ਵਜੇ ਸ਼ੁਰੂ ਹੋਣ ਵਾਲੇ ਮੈਚ ਦਾ ਟਾਸ ਛੇ ਵਜ ਕੇ 30 ਮਿੰਟ ’ਤੇ ਹੋਣਾ ਸੀ। ਮੀਂਹ ਕਾਰਨ ਟਾਸ ਵੀ ਨਹੀਂ ਹੋ ਸਕਿਆ। ਲਗਾਤਾਰ ਮੀਂਹ ਕਾਰਨ ਮੈਚ ਅਧਿਕਾਰੀਆਂ ਨੇ ਕਾਫ਼ੀ ਉਡੀਕ ਕਰਨ ਮਗਰੋਂ ਲਗਪਗ ਸੱਤ ਵੱਜ ਕੇ 45 ਮਿੰਟ ’ਤੇ ਮੈਚ ਰੱਦ ਕਰਨ ਦਾ ਫ਼ੈਸਲਾ ਲਿਆ। ਦੋਵਾਂ ਟੀਮਾਂ ਵਿਚਾਲੇ ਦੂਜਾ ਟੀ-20 ਮੈਚ 18 ਸਤੰਬਰ ਨੂੰ ਮੁਹਾਲੀ ਵਿੱਚ ਖੇਡਿਆ ਜਾਵੇਗਾ ਜਦਕਿ ਤੀਜਾ ਅਤੇ ਆਖ਼ਰੀ ਮੈਚ 22 ਸਤੰਬਰ ਨੂੰ ਬੰਗਲੌਰ ਵਿੱਚ ਹੋਵੇਗਾ। ਸਟੇਡੀਅਮ ਹਾਲਾਂਕਿ ਇਸ ਮੁਕਾਬਲੇ ਲਈ ਨੱਕੋ-ਨੱਕ ਭਰਿਆ ਹੋਇਆ ਸੀ ਅਤੇ ਇਸ ਮੈਚ ਦੇ ਰੱਦ ਹੋਣ ਕਾਰਨ ਦਰਸ਼ਕ ਕਾਫ਼ੀ ਨਿਰਾਸ਼ ਹੋਏ ਹੋਣਗੇ। ਦੁਪਹਿਰ ਨੂੰ ਹੀ ਤੇਜ਼ ਮੀਂਹ ਸ਼ੁਰੂ ਹੋ ਗਿਆ, ਪਰ ਸ਼ਾਮ ਪੰਜ ਵਜ ਕੇ 30 ਮਿੰਟ ਤੱਕ ਇਸ ਵਿੱਚ ਕੁੱਝ ਘਟਿਆ, ਜਿਸ ਕਾਰਨ ਮੈਚ ਹੋਣ ਦੀ ਉਮੀਦ ਬੱਝੀ।