ਮੈਕਸਿਕਨ ਕੰਧ ਲਈ ਫੰਡ ਨਾ ਮਿਲੇ ਤਾਂ ਕੰਮ ਠੱਪ ਕਰ ਦਿਆਂਗਾ: ਟਰੰਪ

ਵਾਸ਼ਿੰਗਟਨ – ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਅੱਜ ਧਮਕੀ ਦਿੱਤੀ ਹੈ ਕਿ ਜੇ ਮੈਕਸਿਕਨ ਸਰਹੱਦ ’ਤੇ ਕੰਧ ਕੱਢਣ ਲਈ ਪਾਰਲੀਮੈਂਟ ਨੇ ਫੰਡ ਮੁਹੱਈਆ ਨਾ ਕਰਵਾਏ ਤਾਂ ਉਹ ਸਰਕਾਰੀ ਕੰਮਕਾਜ ਠੱਪ ਕਰ ਦੇਣਗੇ। ਇਸ ਦੇ ਨਾਲ ਹੀ ਉਨ੍ਹਾਂ ਵੀਜ਼ਾ ਲਾਟਰੀ ਅਤੇ ਚੇਨ ਇਮੀਗ੍ਰੇਸ਼ਨ ਖਤਮ ਕਰ ਕੇ ਮੈਰਿਟ ਆਧਾਰਤ ਇਮੀਗ੍ਰੇਸ਼ਨ ਸਿਸਟਮ ਦੀ ਆਪਣੀ ਮੰਗ ਦੁਹਰਾਈ ਹੈ। ਦੌਰੇ ’ਤੇ ਆਏ ਇਤਾਲਵੀ ਪ੍ਰਧਾਨ ਮੰਤਰੀ ਗਿਸੇਪੇ ਕੌਂਟੇ ਨਾਲ ਵਾਈਟ ਹਾਊਸ ਵਿੱਚ ਪ੍ਰੈਸ ਕਾਨਫਰੰਸ ਨੂੰ ਮੁਖ਼ਾਤਬ ਕਰਦਿਆਂ ਸ੍ਰੀ ਟਰੰਪ ਨੇ ਕਿਹਾ ‘‘ ਅਸੀਂ ਦੁਨੀਆਂ ਦੇ ਮਜ਼ਾਕ ਦਾ ਪਾਤਰ ਬਣੇ ਹੋਏ ਹਾਂ। ਸਾਡਾ ਇਮੀਗ੍ਰੇਸ਼ਨ ਸਿਸਟਮ ਦੁਨੀਆ ਭਰ ’ਚੋਂ ਸਭ ਤੋਂ ਮਾੜਾ ਹੈ।’’ ਉਨ੍ਹਾਂ ਆਖਿਆ ਕਿ ਅਮਰੀਕਾ ਨੂੰ ਸਰਹੱਦੀ ਸੁਰੱਖਿਆ ਦੀ ਲੋੜ ਹੈ। ਸਰਹੱਦੀ ਸੁਰੱਖਿਆ ਵਿੱਚ ਕੰਧ ਵੀ ਆਉਂਦੀ ਹੈ ਪਰ ਇਸ ਵਿੱਚ ਹੋਰ ਵੀ ਬਹੁਤ ਕੁਝ ਸ਼ਾਮਲ ਹੈ। ਸਾਨੂੰ ਲਾਟਰੀ (ਵੀਜ਼ਾ) ਖ਼ਤਮ ਕਰਨੀ ਪਵੇਗੀ। ਸਾਨੂੰ ਚੇਨ ਮਾਈਗ੍ਰੇਸ਼ਨ ਖਤਮ ਕਰਨੀ ਪਵੇਗੀ ਜੋ ਕਿਸੇ ਬਿਪਤਾ ਤੋਂ ਘੱਟ ਨਹੀਂ। ਤੁਸੀਂ ਇਕ ਬੰਦਾ ਲੈ ਕੇ ਆਉਂਦੇ ਹੋ ਤੇ ਉਸ ਦੇ ਪਿੱਛੇ 32 ਜਣੇ ਆ ਜਾਂਦੇ ਹਨ।’’ ਉਨ੍ਹਾਂ ਕਿਹਾ ਕਿ ਅਮਰੀਕਾ ਦੀ ਤਰ੍ਹਾਂ ਇਟਲੀ ਵਿੱਚ ਗ਼ੈਰਕਾਨੂੰਨੀ ਆਵਾਸ ਦਾ ਮੁੱਦਾ ਬਹੁਤ ਭਖਿਆ ਹੋਇਆ ਹੈ ਤੇ ਸ੍ਰੀ ਕੌਂਟੇ ਇਸ ਨੂੰ ਨੱਥ ਪਾਉਣਾ ਚਾਹੁੰਦੇ ਹਨ।