ਵਾਰਨਰ ਨੂੰ ਓਰੇਂਜ ਕੈਪ ਤੇ ਤਾਹਿਰ ਨੂੰ ਪਰਪਲ ਕੈਪ

ਹੈਦਰਾਬਾਦ –  ਸਨਰਾਈਜ਼ਰਜ਼ ਹੈਦਰਾਬਾਦ ਦੇ ਡੇਵਿਡ ਵਾਰਨਰ ਨੇ ਆਈਪੀਐਲ 2019 ਵਿੱਚ ਸਿਰਫ਼ 12 ਮੈਚ ਖੇਡੇ, ਪਰ ਇਸ ਦੇ ਬਾਵਜੂਦ ਉਹ ਕਿਸੇ ਇੱਕ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੇ ਬੱਲੇਬਾਜ਼ ਨੂੰ ਮਿਲਣ ਵਾਲੀ ਓਰੇਂਜ ਕੈਪ ਹਾਸਲ ਕਰਨ ਵਿੱਚ ਸਫਲ ਰਿਹਾ, ਜਦਕਿ ਚੇਨੱਈ ਸੁਪਰਕਿੰਗਜ਼ ਦੇ ਇਮਰਾਨ ਤਾਹਿਰ ਨੂੰ ਸਭ ਤੋਂ ਵੱੱਧ ਵਿਕਟਾਂ ਲੈਣ ਲਈ ਪਰਪਲ ਕੈਪ ਮਿਲੀ। ਵਾਰਨਰ ਨੇ 12 ਪਾਰੀਆਂ ਵਿੱਚ 69.20 ਦੇ ਔਸਤ ਅਤੇ 143.86 ਦੇ ਸਟਰਾਈਕ ਰੇਟ ਨਾਲ 692 ਦੌੜਾਂ ਬਣਾਈਆਂ, ਜਿਸ ਵਿੱਚ ਇੱਕ ਸੈਂਕੜਾ ਅਤੇ ਅੱਠ ਨੀਮ ਸੈਂਕੜੇ ਸ਼ਾਮਲ ਹਨ। ਇਹ ਤੀਜਾ ਮੌਕਾ ਹੈ ਜਦੋਂ ਵਾਰਨਰ ਨੇ ਓਰੇਂਜ ਕੈਪ ਹਾਸਲ ਕੀਤੀ। ਇਸ ਤੋਂ ਪਹਿਲਾਂ ਉਸ ਨੇ 2015 ਵਿੱਚ 562 ਅਤੇ 2017 ਵਿੱਚ 641 ਦੌੜਾਂ ਬਣਾ ਕੇ ਓਰੇਂਜ ਕੈਪ ਹਾਸਲ ਕੀਤੀ ਸੀ। ਕਿਸੇ ਇੱਕ ਸੈਸ਼ਨ ਵਿੱਚ ਸਭ ਤੋਂ ਵੱਧ ਵਿਕਟਾਂ ਲੈਣ ਲਈ ਮਿਲਣ ਵਾਲੀ ਪਰਪਲ ਕੈਪ ਦੱਖਣੀ ਅਫਰੀਕਾ ਦੇ ਲੈੱਗ ਸਪਿੰਨਰ ਇਮਰਾਨ ਤਾਹਿਰ ਨੇ ਹਾਸਲ ਕੀਤੀ। ਉਸ ਨੇ 17 ਮੈਚਾਂ ਵਿੱਚ 26 ਵਿਕਟਾਂ ਲਈਆਂ। ਉਸ ਨੇ ਇਸ ਦੌੜ ਵਿੱਚ ਹਮਵਤਨ ਤੇਜ਼ ਗੇਂਦਬਾਜ਼ ਕੈਗਿਸੋ ਰਬਾਡਾ ਨੂੰ ਪਛਾੜ ਦਿੱਤਾ, ਜਿਸ ਨੇ ਦਿੱਲੀ ਕੈਪੀਟਲਜ਼ ਲਈ 12 ਮੈਚਾਂ ਵਿੱਚ 25 ਵਿਕਟਾਂ ਲਈਆਂ ਸਨ।