ਅਮਰੀਕਾ ‘ਚ ‘ਸਟੂਡੈਂਟ ਪਾਲਿਸੀ’ ਹੋਰ ਸਖਤ, ਭਾਰਤੀ ਵਿਦਿਆਰਥੀਆਂ ਦੇ ਭਵਿੱਖ ‘ਤੇ ਮੰਡਰਾਇਆ ਖਤਰਾ

ਵਾਸ਼ਿੰਗਟਨ – ਅਮਰੀਕਾ ‘ਚ ਲੱਗਭਗ 2 ਲੱਖ ਭਾਰਤੀ ਵਿਦਿਆਰਥੀਆਂ ਦੇ ਭਵਿੱਖ ‘ਤੇ ਖਤਰਾ ਮੰਡਰਾ ਰਿਹਾ ਹੈ। ਅਮਰੀਕਾ ਨੇ ਬਾਹਰੀ ਦੇਸ਼ਾਂ ਤੋਂ ਆਏ ਵਿਦਿਆਰਥੀਆਂ ਲਈ ਨੀਤੀ (ਸਟੂਡੈਂਟ ਪਾਲਿਸੀ) ਸਖਤ ਕਰ ਦਿੱਤੀ ਹੈ। ਇਸ ਨਵੀਂ ਨੀਤੀ ਤਹਿਤ ‘ਸਟੂਡੈਂਟ ਸਟੇਟਸ’ ਦਾ ਉਲੰਘਣ ਕਰਨ ਦੇ ਅਗਲੇ ਹੀ ਦਿਨ ਵਿਦਿਆਰਥੀਆਂ ਅਤੇ ਨਾਲ ਗਏ ਵਿਅਕਤੀ ਦੀ ਅਮਰੀਕਾ ਵਿਚ ਮੌਜੂਦਗੀ ਗੈਰ-ਕਾਨੂੰਨੀ ਮੰਨੀ ਜਾਵੇਗੀ, ਭਾਵੇਂ ਹੀ ਵੀਜ਼ਾ ਸਮਾਂ ਖਤਮ ਨਾ ਹੋਇਆ ਹੋਵੇ। ਨਵੀਂ ਵਿਵਸਥਾ 9 ਅਗਸਤ ਤੋਂ ਲਾਗੂ ਹੋ ਗਈ ਹੈ। ਨਵੀਂ ਨੀਤੀ ਮੁਤਾਬਕ ਜੇਕਰ ਉਲੰਘਣਾ ਦੇ 180 ਦਿਨ ਬਾਅਦ ਵੀ ਵਿਦਿਆਰਥੀ ਅਮਰੀਕਾ ਛੱਡਦਾ ਹੈ ਤਾਂ ਉਸ ‘ਤੇ 10 ਸਾਲ ਤਕ ਲਈ ਮੁੜ ਤੋਂ ਅਮਰੀਕਾ ਵਿਚ ਐਂਟਰੀ ‘ਤੇ ਰੋਕ ਲਾਈ ਜਾ ਸਕਦੀ ਹੈ। ਜੇਕਰ ਕੋਈ ਵਿਦਿਆਰਥੀ ਸੰਸਥਾ ਵਿਚ ਪੂਰਾ ਸਮਾਂ ਨਹੀਂ ਦੇਵੇਗਾ ਤਾਂ ਇਹ ਸਟੂਡੈਂਟ ਸਟੇਟਸ ਦੇ ਨਿਯਮਾਂ ਦਾ ਉਲੰਘਣ ਮੰਨਿਆ ਜਾਵੇਗਾ।