ਟਰੰਪ ਤੋਂ ਮੁਆਫੀ ਮੰਗਣ ਨੂੰ ਲੈ ਕੇ ਕੋਈ ਚਰਚਾ ਨਹੀਂ ਹੋਈ : ਰੋਜਰ

ਵਾਸ਼ਿੰਗਟਨ – ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਰਸਮੀ ਸਲਾਹਕਾਰ ਰੋਜਰ ਸਟੋਨ ਦਾ ਆਖਣਾ ਹੈ ਕਿ ਮੁਆਫੀ ਨੂੰ ਲੈ ਕੇ ਉਨ੍ਹਾਂ ਦੀ ਅਮਰੀਕੀ ਰਾਸ਼ਟਰਪਤੀ ਨਾਲ ਕੋਈ ਚਰਚਾ ਨਹੀਂ ਹੋਈ। ਅਮਰੀਕਾ ‘ਚ 2016 ਦੀਆਂ ਰਾਸ਼ਟਰਪਤੀ ਚੋਣਾਂ ‘ਚ ਰੂਸੀ ਦਖਲਅੰਦਾਜ਼ੀ ਦੇ ਮਾਮਲੇ ‘ਚ ਸਟੋਨ ਵੀ ਜਾਂਚ ਦੇ ਦਾਇਰੇ ‘ਚ ਹਨ ਅਤੇ ਇਸ ਸਬੰਧ ‘ਚ ਉਨ੍ਹਾਂ ਨੇ ਇਹ ਬਿਆਨ ਦਿੱਤਾ। ਸਟੋਨ ਨੇ 2016 ਦੇ ਚੋਣ ਪ੍ਰਚਾਰ ਦੌਰਾਨ ਵਿਕੀਲਿਕਸ ਦੇ ਸੰਸਥਾਪਕ ਜੂਲੀਅਨ ਅਸਾਂਜ ਨਾਲ ਸੰਪਰਕ ਕੀਤੇ ਜਾਣ ਦੀ ਗੱਲ ਤੋਂ ਵੀ ਇਨਕਾਰ ਕੀਤਾ ਹੈ। ਇਸ ਸਾਈਟ ਨੇ ਚੋਣਾਂ ਨੂੰ ਪ੍ਰਭਾਵਿਤ ਕਰਨ ਲਈ ਹੈੱਕ ਕੀਤੇ ਗਏ ਟਰੰਪ ਦੇ ਡੈਮੋਕ੍ਰੇਟਿਕ ਵਿਰੋਧੀਆਂ ਦੇ ਸੰਦੇਸ਼ਾਂ ਨੂੰ ਪ੍ਰਕਾਸ਼ਿਤ ਕੀਤਾ ਸੀ। ਸਟੋਨ ਨੇ ਏ. ਬੀ. ਸੀ. ਨਿਊਜ਼ ਚੈਨਲ ਦੇ ਪ੍ਰੋਗਰਾਮ ‘ਦਿੱਜ ਵੀਕ’ ‘ਚ ਆਖਿਆ ਕਿ ਅਸਾਂਜ ਨਾਲ ਮੇਰਾ ਕੋਈ ਸੰਪਰਕ ਨਹੀਂ ਹੋਇਆ। ਸਾਡੀ ਉਨ੍ਹਾਂ ਦੇ ਨਾਲ ਕੋਈ ਗੱਲਬਾਤ ਨਹੀਂ ਹੋਈ। ਟਰੰਪ ਦੇ ਪ੍ਰਚਾਰ ਅਭਿਆਨ ਦਲ ਅਤੇ ਰੂਸ ਵਿਚਾਲੇ ਸੰਭਾਵੀ ਤਾਲਮੇਲ ਦੀ ਜਾਂਚ ਕਰ ਰਹੇ ਵਿਸ਼ੇਸ਼ ਜੱਜ ਰਾਬਰ ਮੂਲਰ ਨਾਲ ਵੀ ਕਿਸੇ ਤਰ੍ਹਾਂ ਦੇ ਸੰਪਰਕ ਦੀ ਗੱਲ ਨੂੰ ਉਨ੍ਹਾਂ ਨੇ ਖਾਰਿਜ ਕਰ ਦਿੱਤਾ। ਮੂਲਰ ਵੱਲੋਂ ਦੋਸ਼ੀ ਪਾਏ ਜਾਣ ‘ਤੇ ਰਾਸ਼ਟਰਪਤੀ ਤੋਂ ਮੁਆਫੀ ਦੀ ਉਮੀਦ ਦੇ ਸਵਾਲ ‘ਤੇ ਸਟੋਨ ਨੇ ਕਿਹਾ ਕਿ ਮੈਂ ਮੁਆਫੀ ਦੇ ਸਬੰਧ ‘ਚ ਕੋਈ ਗੱਲਬਾਤ ਨਹੀਂ ਕੀਤੀ ਹੈ। ਨਾਲ ਹੀ ਉਨ੍ਹਾਂ ਨੇ ਇਹ ਵੀ ਸਪੱਸ਼ਟ ਕਰ ਦਿੱਤਾ ਕਿ ਉਹ ਕਦੇ ਵੀ ਆਪਣੇ ਮਿੱਤਰ ਖਿਲਾਫ ਗਵਾਹੀ ਨਹੀਂ ਦੇਣਗੇ। ਉਨ੍ਹਾਂ ਆਖਿਆ ਕਿ ਅਜਿਹੇ ਕੋਈ ਹਲਾਤ ਨਹੀਂ ਹਨ, ਜਿਸ ਦੇ ਤਹਿਤ ਮੈਂ ਰਾਸ਼ਟਰਪਤੀ ਖਿਲਾਫ ਗਵਾਹੀ ਦੇਵਾਂਗਾ ਕਿਉਂਕਿ ਅਜਿਹੇ ‘ਚ ਮੈਨੂੰ ਉਨ੍ਹਾਂ ਖਿਲਾਫ ਝੂਠੀ ਗਵਾਹੀ ਦੇਣੀ ਹੋਵੇਗੀ।