ਕਿਮ ਜੋਂਗ ਦੀਆਂ ਇੱਛਾਵਾਂ ਨੂੰ ਪੂਰਾ ਕਰਨਗੇ ਡੋਨਾਲਡ ਟਰੰਪ

ਵਾਸ਼ਿੰਗਟਨ – ਦੱਖਣੀ ਕੋਰੀਆ ਦੇ ਰਾਸ਼ਟਰਪਤੀ ਮੂਨ ਜੇ ਇਨ ਨੇ ਆਖਿਆ ਹੈ ਕਿ ਜੇਕਰ ਉੱਤਰੀ ਕੋਰੀਆ ਮੁਖੀ ਕਿਮ ਜੋਂਗ ਉਨ ਪ੍ਰਮਾਣੂ ਹਥਿਆਰਾਂ ਨੂੰ ਤਬਾਹ ਕਰਨ ਦੇ ਆਪਣੇ ਵਾਅਦੇ ਨੂੰ ਪੂਰਾ ਕਰਦੇ ਹਨ ਤਾਂ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਉਨ੍ਹਾਂ ਦੀਆਂ ਇੱਛਾਵਾਂ ਨੂੰ ਪੂਰਾ ਕਰਨਗੇ। ਉਨ੍ਹਾਂ ਨੇ ਜੀ-20 ਸ਼ਿਖਰ ਸੰਮੇਲਨ ਤੋਂ ਬਾਅਦ ਟਰੰਪ ਨਾਲ ਗੱਲਬਾਤ ਤੋਂ ਬਾਅਦ ਐਤਵਾਰ ਨੂੰ ਇਹ ਗੱਲ ਆਖੀ। ਉੱਤਰੀ ਕੋਰੀਆ ਨੇ ਅਮਰੀਕਾ ਤੋਂ ਸੁਰੱਖਿਆ ਗਾਰੰਟੀ ਅਤੇ ਅੰਤਰਰਾਸ਼ਟਰੀ ਪਾਬੰਦੀਆਂ ਤੋਂ ਰਾਹਤ ਦੇਣ ਦੀ ਮੰਗ ਕੀਤੀ ਹੈ। ਮੂਨ ਜੇ ਇਨ ਦੇ ਦਫਤਰ ਨੇ ਰਾਸ਼ਟਰਪਤੀ ਦੇ ਹਵਾਲੇ ਤੋਂ ਆਖਿਆ ਹੈ ਕਿ ਰਾਸ਼ਟਰਪਤੀ ਟਰੰਪ ਨੇ ਉਨ੍ਹਾਂ ਤੋਂ ਇਸ ਸਾਲ ਸਿਓਲ ਦੀ ਯਾਤਰਾ ਕਰਨ ‘ਤੇ ਉੱਤਰੀ ਕੋਰੀਆਈ ਨੇਤਾ ਨੂੰ ਉਨ੍ਹਾਂ ਦਾ ਸੰਦੇਸ਼ ਦੇਣ ਨੂੰ ਕਿਹਾ। ਅਰਜਨਟੀਨਾ ਤੋਂ ਨਿਊਜ਼ੀਲੈਂਡ ਜਾਣ ਦੌਰਾਨ ਮੂਨ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਕਿਹਾ ਸੀ ਕਿ ਰਾਸ਼ਟਰਪਤੀ ਟਰੰਪ ਦਾ ਚੇਅਰਮੈਨ ਕਿਮ ਪ੍ਰਤੀ ਬੇਹੱਦ ਦੋਸਤਾਨਾ ਰਵੱਈਆ ਹੈ ਅਤੇ ਉਹ ਉਨ੍ਹਾਂ ਪਸੰਦ ਕਰਦੇ ਹਨ। ਮੂਨ ਨੇ ਕਿਹਾ ਕਿ ਉਨ੍ਹਾਂ ਨੇ ਅਤੇ ਟਰੰਪ ਨੇ ਆਪਣੀ ਬੈਠਕ ਦੌਰਾਨ ਸਹਿਮਤੀ ਜਤਾਈ ਕਿ ਕਿਮ ਦੀ ਸਿਓਲ ਦੀ ਯਾਤਰਾ ਅਮਰੀਕਾ-ਉੱਤਰੀ ਕੋਰੀਆ ਪ੍ਰਮਾਣੂ ਕੂਟਨੀਤੀ ‘ਚ ਬਹੁਤ ਸਕਾਰਾਮਤਕ ਭੂਮਿਕਾ ਨਿਭਾਵੇਗੀ। ਮੂਨ ਨੇ ਕਿਹਾ ਕਿ ਅਜੇ ਇਹ ਸਪੱਸ਼ਟ ਨਹੀਂ ਹੈ ਕਿ ਕਿਮ ਇਸ ਸਾਲ ਦੇ ਆਖਿਰ ‘ਚ ਸਿਓਲ ਦੀ ਯਾਤਰਾ ਕਰਨਗੇ ਜਾਂ ਨਹੀਂ।