ਟਰੰਪ ਨੇ ਦਿੱਤੀ ਚਿਤਾਵਨੀ ਸੀਰੀਆ ਨਾ ਕਰੇ ‘ਇਦਲਿਬ’ ਸੂਬੇ ‘ਤੇ ਹਮਲਾ

ਵਾਸ਼ਿੰਗਟਨ – ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਸੀਰੀਆ ਨੂੰ ਚਿਤਾਵਨੀ ਦਿੱਤੀ ਹੈ ਕਿ ਉਹ ਰੂਸ ਅਤੇ ਈਰਾਨ ਦੀ ਮਦਦ ਨਾਲ ਬਾਗੀਆਂ ਦੇ ਕਬਜ਼ੇ ਵਾਲੇ ਇਦਲਿਬ ‘ਚ ਹਮਲਾ ਨਾ ਕਰੇ, ਕਿਉਂਕਿ ਇਸ ਨਾਲ ਮਨੁੱਖੀ ਸੰਕਟ ਪੈਦਾ ਹੋ ਸਕਦਾ ਹੈ। ਟਰੰਪ ਨੇ ਟਵੀਟ ਕੀਤਾ, ”ਸੀਰੀਆ ਦੇ ਰਾਸ਼ਟਰਪਤੀ ਬਸ਼ਰ ਅਲ-ਅਸਦ ਨੂੰ ਇਦਲਿਬ ਸੂਬੇ ‘ਤੇ ਬਿਨਾਂ ਸੋਚੇ-ਸਮਝੇ ਹਮਲਾ ਨਹੀਂ ਕਰਨਾ ਚਾਹੀਦਾ, ਅਜਿਹਾ ਕਰ ਕੇ ਰੂਸ ਅਤੇ ਈਰਾਨ ਇਕ ਵੱਡੀ ਗਲਤੀ ਕਰਨਗੇ।” ਓਧਰ ਸੰਯੁਕਤ ਰਾਸ਼ਟਰ ਅਤੇ ਰਾਹਤ ਸਮੂਹਾਂ ਨੇ ਵੀ ਚਿਤਾਵਨੀ ਦਿੱਤੀ ਹੈ ਕਿ ਇਦਲਿਬ ਸੂਬੇ ਵਿਚ ਇਸ ਹਮਲੇ ਕਾਰਨ ਪਿਛਲੇ 7 ਸਾਲਾਂ ਦੀ ਸੀਰੀਆਈ ਜੰਗ ਦਾ ਸਭ ਤੋਂ ਵੱਡਾ ਮਨੁੱਖੀ ਸੰਕਟ ਖੜ੍ਹਾ ਹੋ ਸਕਦਾ ਹੈ। ਸੀਰੀਆ ਸਰਕਾਰ ਦੇ ਸੁਰੱਖਿਆ ਫੋਰਸ ਦੇ ਜਵਾਨ ਇਦਲਿਬ ਸੂਬੇ ਦੇ ਬਾਹਰ ਇਕੱਠੇ ਹੋ ਰਹੇ ਹਨ। ਇਹ ਥਾਂ ਬਾਗੀਆਂ ਅਤੇ ਹਿੰਸਕ ਕਟੜਪੰਥੀ ਲੜਾਕਿਆਂ ਦਾ ਗੜ੍ਹ ਹੈ। ਇੱਥੇ ਦੁਨੀਆ ਭਰ ਵਿਚ ਕਾਲੀ ਸੂਚੀ ਵਿਚ ਪਾਏ ਗਏ ‘ਅੱਤਵਾਦੀ ਸੰਗਠਨ’ ਵੀ ਮੌਜੂਦ ਹਨ। ਓਧਰ ਰੂਸ ਅਤੇ ਈਰਾਨ ਨੇ ਇਸ ਗੱਲ ‘ਤੇ ਜ਼ੋਰ ਦਿੱਤਾ ਹੈ ਕਿ ਕਟੜਪੰਥੀ ਧੜਿਆਂ ਨੂੰ ਇਦਲਿਬ ‘ਚ ਹਰਾਇਆ ਜਾਣਾ ਬੇਹੱਦ ਜ਼ਰੂਰੀ ਹੈ।