ਰੂਸ-ਅਮਰੀਕਾ ਸਬੰਧਾਂ ਨੂੰ ਮੁੱਲਰ ਜਾਂਚ ਦਾ ਮੁਥਾਜ ਨਾ ਬਣਾਇਆ ਜਾਵੇ: ਪੂਤਿਨ

ਵਾਸ਼ਿੰਗਟਨ – ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੂਤਿਨ ਨੇ ਕਿਹਾ ਹੈ ਕਿ ਅਮਰੀਕਾ ਦੇ ਵਿਸ਼ੇਸ਼ ਕਾਊਂਸਲ ਰੌਬਰਟ ਮੁੱਲਰ ਵੱਲੋਂ ਅਮਰੀਕਾ ਦੀਆਂ ਆਮ ਚੋਣਾਂ ਦੌਰਾਨ ਰੂਸ ਦੇ ਦਖ਼ਲ ਬਾਰੇ ਕੀਤੀ ਜਾ ਰਹੀ ਜਾਂਚ ਨੂੰ ਦੋਵਾਂ ਦੇਸ਼ਾਂ ਦੇ ਸਬੰਧਾਂ ਵਿੱਚ ਦਖ਼ਲ ਦੇਣ ਦੀ ਆਗਿਆ ਨਹੀਂ ਦੇਣੀ ਚਾਹੀਦੀ ਕਿਉਂਕਿ ਇਹ ਜਾਂਚ ‘ਰਾਜਸੀ ਖੇਡ’ ਹੈ। ‘ਫੌਕਸ ਨਿਊਜ਼’ ਚੈਨਲ ਨੂੰ ਦਿੱਤੀ ਇੰਟਰਵਿਊ ਵਿੱਚ ਰੂਸ ਦੇ ਰਾਸ਼ਟਰਪਤੀ ਨੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਉਨ੍ਹਾਂ ਵਿਚਕਾਰ ਮੁਲਕਾਤ ਤੋਂ ਤਿੰਨ ਦਿਨ ਪਹਿਲਾਂ ਅਮਰੀਕਾ ਦੇ ਵਿਸ਼ੇਸ਼ ਕਾਊਂਸਲ ਰੌਬਰਟ ਮੁੱਲਰ ਵੱਲੋਂ ਲਾਏ ਦੋਸ਼ ਕਿ ਰੂਸ ਦੇ 12 ਖ਼ੁਫੀਆ ਏਜੰਟਾਂ ਨੇ ਡੈਮੋਕਰੇਟਿਕ ਪਾਰਟੀ ਦੇ ਕੰਪਿਊਟਰ ਹੈਕ ਕੀਤੇ ਸਨ, ਬਾਰੇ ਕਿਹਾ ਕਿ ਇਹ ਉਨ੍ਹਾਂ ਦੀ ਅੰਦਰੂਨੀ ਰਾਜਸੀ ਲੜਾਈ ਹੈ, ਉਨ੍ਹਾਂ ਦਾ ਇਸ ਨਾਲ ਕੋਈ ਸਬੰਧ ਨਹੀਂ ਹੈੈ। ਇਹ ਪ੍ਰਗਟਾਵਾ ਪੂਤਿਨ ਨੇ ਇੱਕ ਦੁਭਾਸ਼ੀਏ ਦੇ ਰਾਹੀਂ ਕੀਤਾ। ਉਨ੍ਹਾਂ ਕਿਹਾ ਕਿ ਇਹ ਅਮਰੀਕਾ ਦੀ ਅੰਦਰੂਨੀ ਰਾਜਸੀ ਖੇਡ ਹੈ ਕਿ ਅਮਰੀਕਾ ਅਤੇ ਰੂਸ ਦੇ ਵਿਚਕਾਰ ਆਪਸੀ ਸਬੰਧ ਨਾ ਬਣਨ। ਆਪਸੀ ਰਿਸ਼ਤਿਆਂ ਨੂੰ ਅੰਦਰੂਨੀ ਰਾਜਸੀ ਖੇਡ ਦੀਆਂ ਚਾਲਾਂ ਦੇ ਮੁਥਾਜ਼ ਨਹੀਂ ਬਣਾਉਣਾ ਚਾਹੀਦਾ। ਜ਼ਿਕਰਯੋਗ ਹੈ ਕਿ ਪੂਤਿਨ ਅਤੇ ਟਰੰਪ ਦੇ ਵਿਚਕਾਰ ਫਿਨਲੈਂਡ ਦੀ ਰਾਜਧਾਨੀ ਹੈਲਸਿੰਕੀ ਵਿੱਚ ਦੁਵੱਲੀ ਗੱਲਬਾਤ ਹੋਈ ਹੈ। ਸ੍ਰੀ ਪੂਤਿਨ, ਮੁੱਲਰ ਦੇ ਬਿਆਨ ਤੋਂ ਦੋਵਾਂ ਆਗੂਆਂ ਵਿਚਕਾਰ ਗੱਲਬਾਤ ਉੱਤੇ ਪੈਣ ਵਾਲੇ ਮਾੜੇ ਪ੍ਰਭਾਵ ਬਾਰੇ ਆਪਣਾ ਪੱਖ ਰੱਖ ਰਹੇ ਸਨ। ਟਰੰਪ ਨੇ ਸੋਮਵਾਰ ਨੂੰ ਮੁੱਲਰ ਦੀ ਨਿਯੁਕਤੀ ਨੂੰ ਲੈ ਕੇ ਵੀ ਸਵਾਲ ਕੀਤੇ ਸਨ। ਸ੍ਰੀ ਪੂਤਿਨ ਨੇ ਕਿਹਾ ਕਿ ਇਹ ਦੋਸ਼ ਅਮਰੀਕਾ ਦੀ ਅੰਦਰੂਨੀ ਰਾਜਸੀ ਲੜਾਈ ਦਾ ਹਿੱਸਾ ਹਨ।