ਅਜਿੰਕਿਆ ਰਹਾਣੇ ਦੀ ਰਾਜਸਥਾਨ ਦੀ ਕਪਤਾਨੀ ਤੋਂ ਛੁੱਟੀ

ਜੈਪੁਰ – ਆਸਟਰੇਲੀਆ ਦੇ ਸਾਬਕਾ ਕਪਤਾਨ ਸਟੀਵ ਸਮਿੱਥ ਨੂੰ ਅਜਿੰਕਿਆ ਰਹਾਣੇ ਦੀ ਥਾਂ ਇੰਡੀਅਨ ਪ੍ਰੀਮੀਅਰ ਲੀਗ ਦੇ ਸੈਸ਼ਨ ਦੌਰਾਨ ਰਾਜਸਥਾਨ ਰੌਇਲਜ਼ ਦੀ ਕਪਤਾਨੀ ਸੌਂਪ ਦਿੱਤੀ ਗਈ ਹੈ। ਸਮਿੱਥ ਨੇ ਗੇਂਦ ਨਾਲ ਛੇੜ-ਛਾੜ ਮਾਮਲੇ ਵਿੱਚ ਇੱਕ ਸਾਲ ਦੀ ਪਾਬੰਦੀ ਝੱਲਣ ਮਗਰੋਂ ਟੀਮ ਵਿੱਚ ਵਾਪਸੀ ਕੀਤੀ ਹੈ। ਮੁੰਬਈ ਇੰਡੀਅਨਜ਼ ਖ਼ਿਲਾਫ਼ ਅੱਜ ਮੈਚ ਤੋਂ ਪਹਿਲਾਂ ਇਹ ਐਲਾਨ ਕੀਤਾ ਗਿਆ। ਰਾਜਸਥਾਨ ਦੀ ਟੀਮ ਅੱਠ ਵਿੱਚੋਂ ਛੇ ਮੈਚ ਗੁਆ ਚੁੱਕੀ ਹੈ ਅਤੇ ਪਲੇਅ-ਆਫ ਦੀ ਦੌੜ ਵਿੱਚ ਬਰਕਰਾਰ ਰਹਿਣ ਲਈ ਉਸ ਨੂੰ ਬਾਕੀ ਬਚੇ ਛੇ ਵਿੱਚੋਂ ਘੱਟ ਤੋਂ ਘੱਟ ਪੰਜ ਮੈਚਾਂ ਵਿੱਚ ਜਿੱਤ ਦਰਜ ਕਰਨੀ ਹੋਵੇਗੀ। ਸਮਿੱਥ ਨੂੰ 2018 ਸੈਸ਼ਨ ਲਈ ਵੀ ਟੀਮ ਦਾ ਕਪਤਾਨ ਬਣਾਇਆ ਗਿਆ ਸੀ, ਪਰ ਪਾਬੰਦੀ ਲੱਗਣ ਕਾਰਨ ਬਾਅਦ ਵਿੱਚ ਰਹਾਣੇ ਨੇ ਟੀਮ ਦੀ ਕਮਾਨ ਸੰਭਾਲੀ ਸੀ। ਸਮਿੱਥ ਹਾਲਾਂਕਿ ਰਾਜਸਥਾਨ ਰੌਇਲਜ਼ ਨਾਲ ਪਹਿਲੀ ਮਈ ਤੱਕ ਰਹੇਗਾ, ਪਰ ਟੀਮ ਨੇ ਉਦੋਂ ਤੱਕ ਲੀਗ ਦੇ ਆਪਣੇ ਜ਼ਿਆਦਾਤਰ ਮੈਚ ਖੇਡ ਲਏ ਹੋਣਗੇ। ਸਮਿੱਥ ਨੇ ਇਸ ਸੈਸ਼ਨ ਵਿੱਚ ਸੱਤ ਮੈਚਾਂ ਦੌਰਾਨ 37.20 ਦੀ ਔਸਤ ਨਾਲ 186 ਦੌੜਾਂ ਬਣਾਈਆਂ ਹਨ, ਜਿਸ ਵਿੱਚ 73 ਉਸ ਦਾ ਸਰਵੋਤਮ ਸਕੋਰ ਹੈ। ਰਹਾਣੇ ਨੇ 25.12 ਦੀ ਔਸਤ ਨਾਲ 201 ਦੌੜਾਂ ਬਣਾਈਆਂ ਹਨ। ਉਸ ਦਾ ਸਰਵੋਤਮ ਸਕੋਰ 70 ਦੌੜਾਂ ਹੈ।