ਆਸਟ੍ਰੇਲੀਆ ਵਿੱਚ ਕਾਰਡੀਨਲ ਜੌਰਜ ਪੇਲ ਸੈਕਸ ਸ਼ੋਸ਼ਣ ਮਾਮਲੇ ਵਿੱਚ ਦੋਸ਼ੀ ਕਰਾਰ

ਮੈਲਬੌਰਨ – ਵੈਟੀਕਨ ਵਿਚ ਤੀਜੇ ਨੰਬਰ ਦੇ ਅਹੁਦੇਦਾਰ ਕਾਰਡੀਨਲ ਜੌਰਜ ਪੇਲ ਨੂੰ ਬੱਚਿਆਂ ਦਾ ਸੈਕਸ ਸ਼ੋਸ਼ਣ ਕਰਨ ਦੇ ਮਾਮਲੇ ਵਿਚ ਆਸਟ੍ਰੇਲੀਆ ਵਿੱਚ ਦੋਸ਼ੀ ਕਰਾਰ ਦਿੱਤਾ ਗਿਆ ਹੈ| ਅਦਾਲਤ ਦੇ ਅਧਿਕਾਰੀਆਂ ਨੇ ਅੱਜ ਦੱਸਿਆ ਕਿ ਬੱਚਿਆਂ ਦੇ ਸੈਕਸ ਸ਼ੋਸ਼ਣ ਦੇ ਮਾਮਲੇ ਵਿੱਚ ਦੋਸ਼ੀ ਕਰਾਰ ਦਿੱਤੇ ਜਾਣ ਵਾਲੇ ਪੇਲ ਵੈਟੀਕਨ ਦੇ ਹੁਣ ਤੱਕ ਦੇ ਸੀਨੀਅਰ ਅਹੁਦੇਦਾਰ ਹਨ|
ਅਦਾਲਤ ਨੇ ਮੈਲਬੌਰਨ ਦੇ ਸੈਂਟ ਪੈਟ੍ਰਿਕਸ ਕੈਥੇਡ੍ਰਲ ਵਿੱਚ 1990 ਦੇ ਦਹਾਕੇ ਵਿਚ ਕਵਾਇਰ ਵਿੱਚ ਸ਼ਾਮਲ ਹੋਣ ਵਾਲੇ ਦੋ ਮੁੰਡਿਆਂ ਦੇ ਸੈਕਸ ਸ਼ੋਸ਼ਣ ਦੇ ਮਾਮਲੇ ਵਿਚ 77 ਸਾਲਾ ਪੇਲ ਨੂੰ ਦਸੰਬਰ 2018 ਵਿਚ ਦੋਸ਼ੀ ਪਾਇਆ ਸੀ| ਮੈਲਬੌਰਨ ਦੀ ਅਦਾਲਤ ਵੱਲੋਂ ਮਈ 2018 ਵਿੱਚ ਜਾਰੀ ਮਨਾਹੀ ਕਾਰਨ ਮੀਡੀਆ ਪੇਲ ਨੂੰ ਦੋਸ਼ੀ ਠਹਿਰਾਏ ਜਾਣ ਜਾਂ ਫਿਰ ਉਨ੍ਹਾਂ ਦੀ ਸੁਣਵਾਈ ਦੇ ਸਬੰਧ ਵਿੱਚ ਕੋਈ ਖਬਰ ਨਹੀਂ ਦੇ ਸਕੀ ਸੀ| ਖਬਰਾਂ ਦੇ ਪ੍ਰਕਾਸ਼ਨ ਤੇ ਲੱਗੀ ਮਨਾਹੀ ਅੱਜ ਖਤਮ ਹੋਈ ਹੈ|