ਇੰਗਲੈਂਡ ਤੇ ਭਾਰਤ ਵਿਸ਼ਵ ਕੱਪ ਦੇ ਮਜ਼ਬੂਤ ਦਾਅਵੇਦਾਰ: ਪੀਟਰਸਨ

ਲੰਡਨ – ਇੰਗਲੈਂਡ ਦੇ ਸਾਬਕਾ ਕਪਤਾਨ ਕੇਵਿਨ ਪੀਟਰਸਨ ਨੇ ਇੰਗਲੈਂਡ ਅਤੇ ਭਾਰਤੀ ਟੀਮ ਨੂੰ ਵਿਸ਼ਵ ਕੱਪ ਦੀ ਮਜ਼ਬੂਤ ਦਾਅਵੇਦਾਰ ਦੱਸਿਆ ਹੈ, ਜਦਕਿ ‘ਛੁਪਿਆ ਰੁਸਤਮ’ ਆਸਟਰੇਲੀਆ ਅਤੇ ‘ਉਲਟਫੇਰ ਵਿੱਚ ਮਾਹਿਰ’ ਵੈਸਟ ਇੰਡੀਜ਼ ਦੀਆਂ ਸੰਭਾਵਨਾ ਤੋਂ ਵੀ ਇਨਕਾਰ ਨਹੀਂ ਕੀਤਾ। ਵਿਸ਼ਵ ਕੱਪ ਦੇ ਮਜ਼ਬੂਤ ਦਾਅਵੇਦਾਰ ਬਾਰੇ ਪੁੱਛਣ ’ਤੇ ਪੀਟਰਸਨ ਨੇ ਕਿਹਾ, ‘‘ਇੰਗਲੈਂਡ ਅਤੇ ਭਾਰਤ ਮਜ਼ਬੂਤ ਦਾਅਵੇਦਾਰ ਹਨ, ਪਰ ਆਸਟਰੇਲੀਆ ਛੁਪਿਆ ਹੋਇਆ ਰੁਸਤਮ ਹੈ ਅਤੇ ਵੈਸਟ ਇੰਡੀਜ਼ ਉਲਟਫੇਰ ਕਰ ਸਕਦਾ ਹੈ।’’ ਆਈਸੀਸੀ ਵਿਸ਼ਵ ਕੱਪ ਦਾ ਅੱਜ ਇੰਗਲੈਂਡ ਅਤੇ ਦੱਖਣੀ ਅਫਰੀਕਾ ਵਿਚਾਲੇ ਮੈਚ ਨਾਲ ਆਗਾਜ਼ ਹੋ ਗਿਆ ਹੈ। ਪੀਟਰਸਨ ਨੇ ਮੌਜੂਦਾ ਇੰਗਲੈਂਡ ਵਿੱਚ ਟੀਮ ਵਿੱਚ ਬਦਲਾਅ ਕਰਨ ਲਈ ਕਪਤਾਨ ਇਯੋਨ ਮੌਰਗਨ ਦੀ ਤਾਰੀਫ਼ ਕੀਤੀ। ਉਸ ਨੇ ਕਿਹਾ, ‘‘ਇਯੋਨ ਮੌਰਗਨ ਨੇ ਟੀਮ ਨੂੰ ਪੂਰੀ ਤਰ੍ਹਾਂ ਬਦਲ ਦਿੱਤਾ। ਮੈਂ ਹੈਰਾਨ ਨਹੀਂ ਹਾਂ ਕਿਉਂਕਿ ਮੈਂ ਉਸ ਨਾਲ ਖੇਡ ਚੁੱਕਿਆ ਹਾਂ। ਅਸੀਂ ਇਸ ਬਾਰੇ ਗੱਲ ਕੀਤੀ ਹੈ ਕਿ ਸਾਨੂੰ ਹਾਂ ਪੱਖੀ ਕ੍ਰਿਕਟ ਖੇਡਣੀ ਹੋਵੇਗੀ।