ਏਸ਼ੀਆ ਕ੍ਰਿਕਟ ਕੱਪ ਲਈ ਭਾਰਤੀ ਟੀਮ ਦੀ ਚੋਣ ਅੱਜ

ਨਵੀਂ ਦਿੱਲੀ – ਏਸ਼ੀਆ ਕੱਪ ਕ੍ਰਿਕਟ ਟੂਰਨਾਮੈਂਟ ਲਈ ਅੱਜ ਭਾਰਤੀ ਟੀਮ ਦੀ ਚੋਣ ਹੋਵੇਗੀ ਤਾਂ ਕਪਤਾਨ ਵਿਰਾਟ ਕੋਹਲੀ ਦੇ ਕਾਰਜ ਭਾਰ ਤੇ ਬੱਲੇਬਾਜ਼ੀ ਦੇ ਮੱਧਕ੍ਰਮ ‘ਤੇ ਧਿਆਨ ਕੇਂਦਰਤ ਰਹੇਗਾ। ਭਾਰਤੀ ਟੀਮ ਢਾਈ ਮਹੀਨੇ ਦੇ ਇੰਗਲੈਂਡ ਦੌਰੇ ਮਗਰੋਂ ਟੂਰਨਾਮੈਂਟ ਖੇਡੇਗੀ, ਜਿਸ ‘ਚ ਸਿਖਰਲੇ ਖਿਡਾਰੀਆਂ ਨੂੰ ਆਰਾਮ ਦਿੱਤੇ ਜਾਣ ਦੀ ਸੰਭਾਵਨਾ ਘੱਟ ਹੀ ਹੈ। ਭਾਰਤ ਦਾ ਆਪਣੇ ਰਵਾਇਤੀ ਵਿਰੋਧੀ ਪਾਕਿਸਤਾਨ ਨਾਲ ਟਾਕਰਾ ਦੋ ਤੇ ਫਾਈਨਲ ‘ਚ ਪਹੁੰਚਣ ਦੀ ਸਥਿਤੀ ‘ਚ 3 ਵਾਰ ਹੋ ਸਕਦਾ ਹੈ। ਕੋਹਲੀ ਲੱਕ ਦੀ ਤਕਲੀਫ ਨਾਲ ਜੂਝ ਰਿਹਾ ਹੈ ਤੇ ਅਗਲੇ 3 ਮਹੀਨਿਆਂ ‘ਚ 6 ਟੈਸਟ ਅਜੇ ਹੋਰ ਖੇਡੇ ਜਾਣੇ ਹਨ। ਜਿਨ੍ਹਾਂ ‘ਚ 2 ਟੈਸਟ ਵੈਸਟਇੰਡੀਜ਼ ਤੇ 4 ਆਸਟਰੇਲੀਆ ਖਿਲਾਫ ਸ਼ਾਮਲ ਹਨ। ਮੱਧਕ੍ਰਮ ‘ਚ ਸਿਖਰ ਧਵਨ ਤੇ ਰੋਹਿਤ ਸ਼ਰਮਾ ਦੇ ਖੇਡਣਾ ਲਗਭਗ ਪੱਕਾ ਹੈ ਜਦਕਿ ਕੇ. ਐੱਲ. ਰਾਹੁਲ ਤੀਜੇ ਨੰਬਰ ‘ਤੇ ਖੇਡ ਸਕਦਾ ਹੈ। ਕੋਹਲੀ ਮਗਰੋਂ ਬੱਲੇਬਾਜ਼ੀ ਕ੍ਰਮ ਟੀਮ ਲਈ ਚਿੰਤਾ ਦਾ ਸਬੱਬ ਹੋ ਸਕਦਾ ਹੈ। ਮਨੀਸ਼ ਪਾਂਡੇ, ਅੰਬਾਤੀ ਰਾਇਡੂ, ਕੇਦਾਰ ਯਾਦਵ, ਮਯੰਕ ਅਗਰਵਾਲ ਵਿਚਾਲੇ ਟੀਮ ‘ਚ ਥਾਂ ਲਈ ਜ਼ੋਰ ਅਜ਼ਮਾਈ ਹੋ ਸਕਦੀ ਹੈ। ਗੇਂਦਬਾਜ਼ੀ ‘ਚ ਭੁਵਨੇਸ਼ਵਰ ਕੁਮਾਰ ਤੇ ਜਸਪ੍ਰੀਤ ਬੁਮਰਾਹ ਟੀਮ ਹਮਲੇ ਦੀ ਅਗਵਾਈ ਕਰਨਗੇ। ਸ਼ਰਦੁਲ ਠਾਕੁਰ ਤੇ ਸਿਧਾਰਥ ਕੋਲ ਵੀ ਉਮੇਸ਼ ਯਾਦਵ ਨਾਲ ਚੋਣ ਲਈ ਦਾਅਵੇਦਾਰੀ ਪੇਸ਼ ਕਰਨਗੇ। ਵਿਕਟਕੀਪਿੰਗ ‘ਚ ਮਹਿੰਦਰ ਸਿੰਘ ਧੋਨੀ ਸਿਰ ਰਹੇਗਾ ਤੇ ਉਨ੍ਹਾਂ ਤੋਂ ਸਿੱਖਣ ਲਈ ਰਿਸ਼ਭ ਪੰਤ ਨੂੰ ਟੀਮ ‘ਚ ਸ਼ਾਮਲ ਕੀਤਾ ਜਾ ਸਕਦਾ ਹੈ।