ਐੱਚ1-ਬੀ ਵੀਜ਼ਾ ਧਾਰਕਾਂ ਨੂੰ ਰੋਜ਼ਗਾਰ ਬਦਲਣ ਦੀ ਛੋਟ ‘ਤੇ ਬਿੱਲ ਪੇਸ਼

ਵਾਸ਼ਿੰਗਟਨ – ਭਾਰਤੀ ਮੂਲ ਦੇ ਅਮਰੀਕੀ ਸੰਸਦ ਮੈਂਬਰ ਰਾਜਾ ਕ੍ਰਿਸ਼ਣ ਮੂਰਤੀ ਨੇ ਪ੍ਰਤੀਨਿਧੀ ਸਭਾ ‘ਚ ਬਿੱਲ ਪੇਸ਼ ਕੀਤਾ ਹੈ। ਇਸ ਬਿੱਲ ਦਾ ਟੀਚਾ ਐੱਚ1-ਬੀ ਦੇ ਕਰਮਚਾਰੀਆਂ ਨੂੰ ਨੌਕਰੀ ਬਦਲਣ ਦੇ ਮਾਮਲੇ ‘ਚ ਛੋਟ ਦੇਣਾ ਤੇ ਪੈਂਡਿੰਗ ਪਏ ਗ੍ਰੀਨ ਕਾਰਡ ਦਾ ਨਿਪਟਾਰਾ ਕਰਨਾ ਹੈ। ਇਸ ਦੇ ਲਈ ਐੱਚ1-ਬੀ ਧਾਰਕਾਂ ਲਈ ਦੇਸ਼ ਦੀ ਬਜਾਏ ਸਿੱਖਿਆ ਆਧਾਰਿਤ ਛੋਟ ਵਿਵਸਥਾ ਦੇ ਵਿਸਥਾਰ ਦਾ ਸੁਝਾਅ ਦਿੱਤਾ ਗਿਆ ਹੈ। ਕ੍ਰਿਸ਼ਣ ਮੂਰਤੀ ਨੇ ਰਿਪਬਲਿਕਨ ਪਾਰਟੀ ਦੇ ਸੰਸਦ ਮੈਂਬਰ ਮਾਇਕ ਕਾਫਮੈਨ ਨਾਲ ਮਿਲ ਕੇ ਐੱਚ.ਆਰ. 6794 ‘ਇਮੀਗ੍ਰੇਸ਼ਨ ਇਨੋਵੇਸ਼ਨ ਐਕਟ’ 2018 ਵੀਰਵਾਰ ਨੂੰ ਪ੍ਰਤੀਨਿਧੀ ਸਭਾ ‘ਚ ਪੇਸ਼ ਕੀਤਾ। ਜੇਕਰ ਇਹ ਬਿੱਲ ਪਾਸ ਹੁੰਦਾ ਹੈ ਤੇ ਰਾਸ਼ਟਰਪਤੀ ਇਸ ‘ਤੇ ਦਸਤਖਤ ਕਰਦੇ ਹਨ ਤਾਂ ਇਹ ਹੁਨਰਮੰਦ ਕਾਮਿਆਂ ਲਈ ਵੀਜ਼ਾ ਪ੍ਰੋਗਰਾਮ ਐੱਚ1-ਬੀ ਵਿਵਸਥਾ ‘ਚ ਸੁਧਾਰ ਲਿਆਵੇਗਾ। ਡੈਮੋਕ੍ਰਟਿਕ ਪਾਰਟੀ ਦੇ ਸੰਸਦ ਮੈਂਬਰ ਕ੍ਰਿਸ਼ਣ ਮੂਰਤੀ ਨੇ ਕਿਹਾ, ‘ਘਰੇਲੂ ਕਰਮਚਾਰੀਆਂ ਦੇ ਹੁਨਰ ਵਿਕਾਸ ਲਈ ਬਿੱਲ ‘ਚ ਸਾਡੀ ਸਿੱਖਿਆ ਪ੍ਰਣਾਲੀ ‘ਚ ਨਿਵੇਸ਼ ਵਧਾਉਣ ਦੀ ਗੱਲ ਕਹੀ ਗਈ ਹੈ ਤਾਂ ਕਿ ਇਸ ਦੀ ਗਾਰੰਟੀ ਹੋਵੇ ਕਿ ਅਮਰੀਕੀ ਕਰਮਚਾਰੀ ਉੱਚ ਤਕਨੀਕੀ ਵਾਲੇ ਰੋਜ਼ਗਾਰ ਲਈ ਸਿਖਲਾਈ ਪ੍ਰਾਪਤ ਕਰਨ। ਇਸ ‘ਚ ਹੁਨਰਮੰਦ ਕਾਮਿਆਂ ਲਈ ਵੀਜ਼ਾ ਪ੍ਰਣਾਲੀ ‘ਚ ਸੁਧਾਰ ਦੀ ਵੀ ਗੱਲ ਹੈ।’