ਗਠਜੋੜ ਲਈ ਕਾਂਗਰਸ ਨਹੀਂ ਹੋ ਰਹੀ ਤਿਆਰ : ਮਨੀਸ਼ ਸਿਸੌਦੀਆ

ਨਵੀਂ ਦਿੱਲੀ – ਲੋਕ ਸਭਾ ਚੋਣਾਂ 2019 ਦੇ ਮੱਦੇਨਜ਼ਰ ਆਪ-ਕਾਂਗਰਸ ਗਠਜੋੜ ਹੋਵੇਗਾ ਜਾਂ ਨਹੀਂ ਇਸ ਤੇ ਅੱਜ ਮਨੀਸ਼ ਸਿਸੌਦੀਆ ਨੇ ਪਰਦਾ ਚੁੱਕਦੇ ਹੋਏ ਸਾਫ਼ ਕਰ ਦਿੱਤਾ ਹੈ ਕਿ ਉਨ੍ਹਾਂ ਨੇ ਤਾਂ ਬਹੁਤ ਕੋਸ਼ਿਸ਼ ਕੀਤੀ ਕਈ ਫਾਰਮੂਲੇ ਕਾਂਗਰਸ ਦੇ ਸਾਹਮਣੇ ਰੱਖੇ ਪਰ ਕਾਂਗਰਸ ਤਿਆਰ ਨਹੀਂ ਹੋਈ| ਸਿਸੌਦੀਆ ਨੇ ਪੱਤਰਕਾਰਾਂ ਨੂੰ ਸੰਬੋਧਨ ਕਰਦੇ ਹੋਏ ਕਿਹਾ ਕਿ ਅਸੀਂ ਕਾਂਗਰਸ ਦੇ ਭ੍ਰਿਸ਼ਟਾਚਾਰ ਵਿਰੁੱਧ ਲੜਦੇ ਹੋਏ ਸੱਤਾ ਵਿੱਚ ਆਏ| ਹੁਣ ਅਸੀਂ ਕਾਂਗਰਸ ਦਾ ਸਾਥ ਇਸ ਲਈ ਚਾਹੁੰਦੇ ਹਾਂ ਤਾਂ ਕਿ ਫਿਰਕੂ ਤਾਕਤਾਂ ਦੇਸ਼ ਨੂੰ ਤੋੜ ਨਾ ਸਕਣ| ਇਸੇ ਕਾਰਨ ਅਸੀਂ ਦਿੱਲੀ, ਗੋਆ, ਹਰਿਆਣਾ, ਚੰਡੀਗੜ੍ਹ ਅਤੇ ਪੰਜਾਬ ਵਿੱਚ ਕਾਂਗਰਸ ਨਾਲ ਗਠਜੋੜ ਚਾਹੁੰਦੇ ਸੀ| ਇਸ ਲਈ ਅਸੀਂ ਕਾਂਗਰਸ ਨਾਲ ਗੱਲ ਕੀਤੀ, ਹਰਿਆਣਾ ਵਿੱਚ ਜੇ.ਜੇ.ਪੀ. ਨਾਲ ਗੱਲ ਕੀਤੀ| ਗੋਆ ਅਤੇ ਪੰਜਾਬ ਵਿੱਚ ਉਨ੍ਹਾਂ ਨੇ ਗਠਜੋੜ ਤੋਂ ਮਨ੍ਹਾ ਕਰ ਦਿੱਤਾ| ਦਿੱਲੀ ਵਿੱਚ ਕਾਂਗਰਸ ਦਾ ਇਕ ਵੀ ਐਮ. ਐਲ. ਏ. ਨਹੀਂ ਹੈ| ਉਹ ਪਿਛਲੀਆਂ ਚੋਣਾਂ ਵਿੱਚ ਵੀ ਬਹੁਤ ਘੱਟ ਵੋਟ ਪਾ ਸਕੇ ਸਨ, ਜੇਕਰ ਅਸੀਂ ਦੋਵੇਂ ਨਾਲ ਆਉਂਦੇ ਹਾਂ ਤਾਂ ਭਾਜਪਾ ਨੂੰ ਹਰਾ ਸਕਦੇ ਹਾਂ| ਨਰਿੰਦਰ ਮੋਦੀ ਅਤੇ ਅਮਿਤ ਸ਼ਾਹ ਦੀ ਜੋੜੀ ਨੂੰ ਦੁਬਾਰਾ ਸੱਤਾ ਵਿੱਚ ਆਉਣ ਤੋਂ ਰੋਕ ਸਕਦੇ ਹਾਂ|