ਟਰੰਪ ਨੇ ਮੂਲਰ ਦੀ ਜਾਂਚ ਨੂੰ ਗੈਰ ਕਾਨੂੰਨੀ ਕਰਾਰ ਦਿੱਤਾ

ਵਾਸ਼ਿੰਗਟਨ – ਅਮਰੀਕਾ ‘ਚ ਰਾਸ਼ਟਰਪਤੀ ਚੋਣਾਂ 2016 ‘ਚ ਰੂਸੀ ਦਖਲ ਅੰਦਾਜ਼ੀ ਦੇ ਮਾਮਲਿਆਂ ਦੇ ਵਿਸ਼ੇਸ਼ ਵਕੀਲ ਰਾਬਰਟ ਮੂਲਰ ਦੀ ਜਾਂਚ ਨੂੰ ਗੈਰ-ਕਾਨੂੰਨੀ ਦੱਸਦੇ ਹੋਏ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਕਿਹਾ ਕਿ ਉਨ੍ਹਾਂ ਦੀ ਜਾਂਚ ਦਾ ਦਾਇਰਾ ਮੇਰੇ ਨਜ਼ਦੀਕੀਆਂ ਤੋਂ ਅੱਗੇ ਵਧ ਨਹੀਂ ਰਿਹਾ ਹੈ। ਟਰੰਪ ਨੇ ਵੀਰਵਾਰ ਨੂੰ ਇਕ ਇੰਟਰਵੀਊ ‘ਚ ਕਿਹਾ ਕਿ 2016 ‘ਚ ਉਨ੍ਹਾਂ ਦੀ ਚੋਣ ਮੁਹਿੰਮ ਨਾਲ ਰੂਸ ਦੇ ਕਥਿਤ ਜੋੜ-ਮੇਲ ਦੀ ਜਾਂਚ ਕਰਨ ਲਈ ਮੂਲਰ ਦੀ ਨਿਯੁਕਤੀ ਕਰਨਾ ਗਲਤ ਸੀ। ਉਨ੍ਹਾਂ ਨੇ ਕਿਹਾ ,”ਮੈਂ ਇਸ ਨੂੰ ਵੱਖਰੇ ਤਰੀਕੇ ਨਾਲ ਦੇਖਦਾ ਹਾਂ। ਮੈਂ ਇਸ ਨੂੰ ਗੈਰ-ਕਾਨੂੰਨੀ ਜਾਂਚ ਦੀ ਤਰ੍ਹਾਂ ਦੇਖਦਾ ਹਾਂ।” ਉਨ੍ਹਾਂ ਨੇ ਕੁਝ ਮਹਾਨ ਵਿਦਵਾਨਾਂ ਦਾ ਹਵਾਲਾ ਦਿੰਦੇ ਹੋਏ ਕਿਹਾ ਕਿ ਵਿਸ਼ੇਸ਼ ਵਕੀਲ ਕਦੇ ਹੋਣਾ ਹੀ ਨਹੀਂ ਚਾਹੀਦਾ ਸੀ। ਕੁਝ ਕਾਨੂੰਨੀ ਮਾਹਿਰਾਂ ਨੇ ਐੱਫ.ਬੀ.ਆਈ. ਦੇ ਸਾਬਕਾ ਨਿਰਦੇਸ਼ਕ ਮੂਲਰ ਦਾ ਨਾਂ ਸੁਝਾਉਣ ‘ਤੇ ਸਵਾਲ ਉਠਾਏ ਸਨ। ਜ਼ਿਕਰਯੋਗ ਹੈ ਕਿ ਟਰੰਪ ਪ੍ਰਸ਼ਾਸਨ ਦਾ ਆਪਣਾ ਨਿਆਂ ਮੰਤਰਾਲਾ ਕਹਿੰਦਾ ਹੈ ਕਿ ਇਹ ਕਾਨੂੰਨੀ ਹੈ। ਇਸ ਤੋਂ ਪਹਿਲਾਂ ਅਗਸਤ ਦੀ ਸ਼ੁਰੂਆਤ ‘ਚ ਟਰੰਪ ਦੇ ਸਾਬਕਾ ਰਾਜਨੀਤਕ ਸਲਾਹਕਾਰ ਰੋਜ਼ਰ ਸਟੋਨ ਦੇ ਸਹਿਯੋਗੀ ਰਹੇ ਐਂਡਰੀਊ ਮਿਲਰ ਨੇ ਅਪੀਲ ਅਦਾਲਤ ‘ਚ ਮੂਲਰ ਦੀ ਨਿਯੁਕਤੀ ਦੇ ਕਾਨੂੰਨੀ ਹੋਣ ਨੂੰ ਚੁਣੌਤੀ ਦਿੱਤੀ ਸੀ।