ਪਟਨਾ ਪਾਈਰੇਟਸ ਨੇ ਤਮਿਲ ਥਲਾਈਵਾਸ ਨੂੰ 45-27 ਨਾਲ ਹਰਾਇਆ

ਨਵੀਂ ਦਿੱਲੀ – ਪ੍ਰਦੀਪ ਨਰਵਾਲ (13 ਅੰਕ) ਅਤੇ ਦੀਪਕ ਨਰਵਾਲ (10 ਅੰਕ) ਦੇ ਦਮਦਾਰ ਖੇਡ ਦੇ ਦਮ ‘ਤੇ ਪਟਨਾ ਪਾਈਰੇਟਸ ਨੇ ਪ੍ਰੋ ਕਬੱਡੀ ਲੀਗ ਦੇ ਛੇਵੇਂ ਸੈਸ਼ਨ ‘ਚ ਬੁੱਧਵਾਰ ਨੂੰ ਇੱਥੇ ਤਮਿਲ ਥਲਾਈਵਾਸ ਨੂੰ ਇਕਪਾਸੜ ਮੁਕਾਬਲੇ ‘ਚ 45-27 ਨਾਲ ਹਰਾਇਆ। ਪ੍ਰਦੀਪ ਅਤੇ ਦੀਪਕ ਤੋਂ ਇਲਾਵਾ ਮਨਜੀਤ ਨੇ ਵੀ ਪਾਈਰੇਟਸ ਲਈ ਅੱਠ ਅੰਕ ਜੁਟਾਏ। ਮੈਚ ਦੇ ਦੌਰਾਨ ਪ੍ਰਦੀਪ ਨੇ ਸੈਸ਼ਨ ‘ਚ ਨੌਵੀਂ ਵਾਰ ਸੁਪਰ ਟੈਨ ਕੀਤਾ। ਥਲਾਈਵਾਸ ਵੱਲੋਂ ਅਜੇ ਠਾਕੁਰ ਨੇ ਸਭ ਤੋਂ ਜ਼ਿਆਦਾ ਅੱਠ ਅੰਕ ਬਣਾਏ ਪਰ ਉਨ੍ਹਾਂ ਦੀ ਟੀਮ ਸਿਰਫ ਚਾਰ ਟੈਕਲ ਅੰਕ ਹੀ ਬਣਾ ਸਕੀ। ਇਸ ਜਿੱਤ ਦੇ ਨਾਲ ਪਾਈਰੇਟਸ ਦੀ ਟੀਮ 13 ਮੈਚਾਂ ‘ਚ 38 ਅੰਕ ਦੇ ਨਾਲ ਜ਼ੋਨ ਬੀ ਦੇ ਸਕੋਰ ਬੋਰਡ ‘ਚ ਦੂਜੇ ਸਥਾਨ ‘ਤੇ ਪਹੁੰਚ ਗਈ ਹੈ। ਥਲਾਈਵਾਸ ਦੀ ਟੀਮ ਇੰਨੇ ਹੀ ਮੈਚਾਂ ‘ਚ 25 ਅੰਕਾਂ ਦੇ ਨਾਲ ਸਭ ਤੋਂ ਹੇਠਲੇ ਸਥਾਨ ‘ਤੇ ਹੈ।