ਪੰਜ ਬੈਂਕਾਂ ਤੇ ਲਗਾਇਆ ਆਰ.ਬੀ.ਆਈ ਨੇ 10 ਕਰੋੜ ਰੁਪਏ ਦਾ ਜ਼ੁਰਮਾਨਾ

ਨਵੀਂ ਦਿੱਲੀ – ਭਾਰਤੀ ਰਿਜ਼ਰਵ ਬੈਂਕ (ਆਰ.ਬੀ.ਆਈ.) ਨੇ ‘ਸਵਿਫਟ’ ਨਾਲ ਜੁੜੇ ਨਿਯਮਾਂ ਅਤੇ ਹੋਰ ਨਿਰਦੇਸ਼ਾਂ ਦਾ ਅਨੁਪਾਲਨ ਨਹੀਂ ਕਰਨ ‘ਤੇ ਮੰਗਲਵਾਰ ਨੂੰ ਆਈ.ਸੀ.ਆਈ.ਸੀ.ਆਈ. ਬੈਂਕ, ਯੈੱਸ ਬੈਂਕ ਸਮੇਤ ਪੰਜ ਬੈਂਕਾਂ ‘ਤੇ ਕੁੱਲ 10 ਕਰੋੜ ਰੁਪਏ ਦਾ ਜ਼ੁਰਮਾਨਾ ਲਗਾਇਆ ਹੈ। ਇਸ ‘ਚ ਇਲਾਹਾਬਾਦ ਬੈਂਕ ‘ਤੇ ਨੋਸਟਰੋ ਖਾਤਿਆਂ ਨਾਲ ਜੁੜੇ ਦਿਸ਼ਾ-ਨਿਰਦੇਸ਼ਾਂ ਦਾ ਪਾਲਨ ਨਹੀਂ ਕਰਨ ਦੇ ਚੱਲਦੇ ਜ਼ੁਰਮਾਨਾ ਲਗਾਇਆ ਗਿਆ। ਬੈਂਕਾਂ ਨੇ ਇਸ ਸੰਬੰਧ ‘ਚ ਸ਼ੇਅਰ ਬਾਜ਼ਾਰਾਂ ਨੂੰ ਜਾਣਕਾਰੀ ਦਿੱਤੀ ਹੈ।
ਬੈਂਕ ਆਫ ਬੜੌਦਾ, ਆਈ.ਸੀ.ਆਈ.ਸੀ.ਆਈ. ਬੈਂਕ, ਯੈੱਸ ਬੈਂਕ ਅਤੇ ਕੇਨਰਾ ਬੈਂਕ ਅਤੇ ਸਵਿੱਫਟ ਵਿਨਿਯਮਾਂ ਦਾ ਪਾਲਨ ਨਹੀਂ ਕਰਨ ਦੇ ਲਈ ਜ਼ੁਰਮਾਨਾ ਲਗਾਇਆ ਹੈ। ਇਸ ‘ਚ ਬੈਂਕ ਆਫ ਬੜੌਦਾ ‘ਤੇ ਚਾਰ ਕਰੋੜ ਰੁਪਏ, ਕੇਨਰਾ ਬੈਂਕ ‘ਤੇ ਦੋ ਕਰੋੜ ਰੁਪਏ ਅਤੇ ਆਈ.ਸੀ.ਆਈ.ਸੀ.ਆਈ. ਬੈਂਕ ਅਤੇ ਯੈੱਸ ਬੈਂਕ ‘ਤੇ ਇਕ-ਇਕ ਕਰੋੜ ਰੁਪਏ ਦਾ ਜ਼ੁਰਮਾਨਾ ਲਗਾਇਆ ਗਿਆ ਹੈ।
ਵਰਣਨਯੋਗ ਹੈ ਕਿ ਪੰਜਾਬ ਨੈਸ਼ਨਲ ਬੈਂਕ ‘ਚ ਕੀਤੀ ਗਈ 14,000 ਕਰੋੜ ਰੁਪਏ ਦੀ ਧੋਖਾਧੜੀ ਇਸ ਸਾਫਟਵੇਅਰ ਦੇ ਗਲਤ ਵਰਤੋਂ ਨਾਲ ਕੀਤੀ ਗਈ ਸੀ। ਇਸ ਦੇ ਬਾਅਦ ਕੇਂਦਰੀ ਬੈਂਕ ਨੇ ਇਸ ਤਕਨਾਲੋਜੀ ਨੂੰ ਲੈ ਕੇ ਸਖਤ ਦਿਸ਼ਾ-ਨਿਰਦੇਸ਼ ਜਾਰੀ ਕੀਤੇ ਹਨ। ਇਸ ਦੇ ਇਲਾਵਾ ਇਲਾਹਾਬਾਦ ਬੈਂਕ ‘ਤੇ ਦੋ ਕਰੋੜ ਰੁਪਏ ਦਾ ਜ਼ੁਰਮਾਨਾ ਨੋਸਟਰੋ ਖਾਤਿਆਂ ਨਾਲ ਜੁੜੇ ਦਿਸ਼ਾ-ਨਿਰਦੇਸ਼ਾਂ ਦਾ ਅਨੁਪਾਲਨ ਨਹੀਂ ਕਰਨ ‘ਤੇ ਲਗਾਇਆ ਗਿਆ ਹੈ।

ਨੋਸਟਰੋ ਖਾਤਾ, ਕਿਸੇ ਇਕ ਬੈਂਕ ਵਲੋਂ ਵਿਦੇਸ਼ੀ ਮੁਦਰਾ ‘ਚ ਕਿਸੇ ਦੂਜੇ ਬੈਂਕ ‘ਚ ਰੱਖਿਆ ਜਾਣ ਵਾਲਾ ਖਾਤਾ ਹੈ। ਕੇਂਦਰੀ ਬੈਂਕ ਨੇ ਸੋਮਵਾਰ ਨੂੰ ਵੀ ਸਵਿੱਫਟ ਨਿਯਮਾਂ ਦੇ ਅਨੁਪਾਲਨ ‘ਤੇ ਅਣਗਹਿਲੀ ਨੂੰ ਲੈ ਕੇ ਛੇ ਸਰਕਾਰੀ ਅਤੇ ਨਿੱਜੀ ਖੇਤਰ ਦੇ ਬੈਂਕਾਂ ‘ਤੇ ਕੁੱਲ 17 ਕਰੋੜ ਰੁਪਏ ਦਾ ਜ਼ੁਰਮਾਨਾ ਲਗਾਇਆ ਹੈ।