ਫੈਡਰਰ ਨੇ ਤੀਜਾ ਹੋਪਮੈਨ ਕੱਪ ਜਿੱਤਿਆ

ਪਰਥ – ਰੋਜਰ ਫੈਡਰਰ ਨੇ ਸ਼ਨੀਵਾਰ ਨੂੰ ਪਰਥ ‘ਚ ਮਿਕਸਡ ਟੀਮ ਟੂਰਨਾਮੈਂਟ ਦੇ ਰੋਮਾਂਚਕ ਫਾਈਨਲ ‘ਚ ਸਵਿਟਜ਼ਰਲੈਂਡ ਨੂੰ 2-1 ਨਾਲ ਜਿੱਤ ਦਿਵਾਈ ਜਿਸ ਨਾਲ ਉਹ ਹੋਪਮੈਨ ਕੱਪ ਇਤਿਹਾਸ ‘ਚ ਸਭ ਤੋਂ ਸਫਲ ਖਿਡਾਰੀ ਬਣ ਗਏ। ਲਗਾਤਾਰ ਦੂਜੇ ਸਾਲ ਇਸ ਸਵਿਸ ਖਿਡਾਰੀ ਨੇ ਜਰਮਨੀ ਦੇ ਐਲੇਕਜ਼ੈਂਡਰ ਜਵੇਰੇਵ ਅਤੇ ਐਂਜਲਿਕ ਕਰਬਰ ਦੀ ਜੋੜੀ ਨੂੰ 4-0, 1-4, 4-3 (5/4) ਨਾਲ ਹਰਾ ਕੇ ਫੈਸਲਾਕੁੰਨ ਮਿਕਸਡ ਡਬਲਜ਼ ਮੁਕਾਬਲਾ ਜਿੱਤਿਆ। ਇਹ ਸਵਿਟਜ਼ਰਲੈਂਡ ਦਾ ਕੁੱਲ ਚੌਥਾ ਖਿਤਾਬ ਹੈ ਅਤੇ ਉਹ ਟਰਾਫੀ ਦੀ ਗਿਣਤੀ ਦੇ ਮਾਮਲੇ ‘ਚ ਅਮਰੀਕਾ ਤੋਂ ਪਿੱਛੇ ਹੈ ਜਿਸ ਦੇ ਨਾਂ 6 ਟਰਾਫੀਆਂ ਹਨ। ਫੈਡਰਰ ਤਿੰਨ ਹੋਪਮੈਨ ਕੱਪ ਜਿੱਤਣ ਵਾਲੇ ਪਹਿਲੇ ਖਿਡਾਰੀ ਬਣ ਗਏ ਹਨ। ਉਨ੍ਹਾਂ ਨੇ ਬੇਲਿੰਡਾ ਬੇਨਸਿਚ ਦੇ ਨਾਲ ਮਿਲ ਕੇ ਟੀਮ ਨੂੰ ਲਗਾਤਾਰ ਖਿਤਾਬ ਦਿਵਾਇਆ।