ਭਾਰਤ ਇੰਗਲੈਂਡ ਖ਼ਿਲਾਫ਼ ਜਿੱਤ ਤੋਂ ਦੋ ਕਦਮ ਦੂਰ

ਨਾਟਿੰਘਮ – ਤੇਜ਼ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ ਦੀ ਸ਼ਾਨਦਾਰ ਗੇਂਦਬਾਜ਼ੀ ਦੇ ਦਮ ’ਤੇ ਭਾਰਤ ਤੀਜੇ ਟੈਸਟ ਦੇ ਚੌਥੇ ਦਿਨ ਇੰਗਲੈਂਡ ਖ਼ਿਲਾਫ਼ ਜਿੱਤ ਤੋਂ ਦੋ ਕਦਮ ਦੂਰ ਹੈ। ਜਸਪ੍ਰੀਤ ਬੁਮਰਾਹ ਨੇ 84 ਦੌੜਾਂ ਦੇ ਕੇ ਚਾਰ ਵਿਕਟਾਂ ਲਈਆਂ। ਮੇਜ਼ਬਾਨ ਟੀਮ ਦੀਆਂ ਅੱਠ ਵਿਕਟਾਂ 268 ਦੌੜਾਂ ਡਿੱਗ ਗਈਆਂ ਸਨ।
ਇਸ ਤੋਂ ਪਹਿਲਾਂ ਜੋਸ ਬਟਲਰ (106) ਅਤੇ ਬੈਨ ਸਟੋਕਸ (62) ਨੇ ਜੁਝਾਰੂ ਪਾਰੀਆਂ ਖੇਡੀਆਂ, ਜਿਸ ਕਾਰਨ ਇੰਗਲੈਂਡ ਨੇ ਚਾਹ ਦੇ ਆਰਾਮ ਮਗਰੋਂ ਚਾਰ ਵਿਕਟਾਂ ’ਤੇ 231 ਦੌੜਾਂ ਬਣਾ ਲਈਆਂ ਸਨ। 521 ਦੌੜਾਂ ਦੇ ਪਹਾੜ ਵਰਗੇ ਟੀਚੇ ਦਾ ਪਿੱਛਾ ਕਰ ਰਹੇ ਇੰਗਲੈਂਡ ਨੇ ਇੱਕ ਸਮੇਂ ਆਪਣੀਆਂ ਚਾਰ ਵਿਕਟਾਂ ਸਿਰਫ਼ 62 ਦੌੜਾਂ ਤੱਕ ਗੁਆ ਲਈਆਂ ਸਨ ਅਤੇ ਲੰਚ ਤੱਕ ਉਸ ਦਾ ਸਕੋਰ ਚਾਰ ਵਿਕਟਾਂ ’ਤੇ 84 ਦੌੜਾਂ ਸੀ। ਇਸ ਤੋਂ ਬਾਅਦ ਬਟਲਰ ਅਤੇ ਸਟੋਕਸ ਨੇ ਦੂਜੇ ਸੈਸ਼ਨ ਵਿੱਚ ਇੰਗਲੈਂਡ ਦਾ ਕੋਈ ਨੁਕਸਾਨ ਨਹੀਂ ਹੋਣ ਦਿੱਤਾ। ਇੰਗਲੈਂਡ ਨੇ ਸਵੇਰੇ ਬਿਨਾਂ ਕਿਸੇ ਨੁਕਸਾਨ ਦੇ 23 ਦੌੜਾਂ ਤੋਂ ਅੱਗੇ ਖੇਡਣਾ ਸ਼ੁਰੂ ਕੀਤਾ। ਅਲਸਟੇਅਰ ਕੁੱਕ ਨੇ ਨੌਂ ਦੌੜਾਂ ਅਤੇ ਕੀਟਨ ਜੇਨਿੰਗਜ਼ ਨੇ 13 ਦੌੜਾਂ ਨਾਲ ਆਪਣੀ ਪਾਰੀ ਨੂੰ ਅੱਗੇ ਵਧਾਇਆ। ਤੇਜ਼ ਗੇਂਦਬਾਜ਼ ਇਸ਼ਾਂਤ ਸ਼ਰਮਾ ਨੇ ਛੇਤੀ ਹੀ ਇੰਗਲੈਂਡ ਨੂੰ ਪਹਿਲਾ ਝਟਕਾ ਦੇ ਦਿੱਤਾ। ਇਸ਼ਾਤ ਸ਼ਰਮਾ ਨੇ 43 ਦੌੜਾਂ ਦੇ ਕੇ ਦੋ, ਮੁਹੰਮਦ ਸ਼ਮੀ ਨੇ ਅਤੇ ਹਾਰਦਿਕ ਪੰਡਿਆ ਨੇ ਇੱਕ-ਇੱਕ ਵਿਕਟ ਲਈ।