ਰੋਹਿਤ ਬਣੇ ਨੰਬਰ 2 ਖਿਡਾਰੀ, ਚੋਟੀ 5 ‘ਚ 3 ਭਾਰਤੀ ਖਿਡਾਰੀਆਂ ਦਾ ਕਬਜਾ

ਦੁਬਈ – ਆਪਣੀ ਕਪਤਾਨੀ ਵਿਚ ਭਾਰਤ ਨੂੰ 7ਵੀਂ ਵਾਰ ਏਸ਼ੀਆ ਕੱਪ ਚੈਂਪੀਅਨ ਬਣਾਉਣ ਵਾਲੇ ਰੋਹਿਤ ਸ਼ਰਮਾ ਤਾਜਾ ਆਈ. ਸੀ. ਸੀ. ਵਨ ਡੇ ਬੱਲੇਬਾਜ਼ਾਂ ਦੀ ਰੈਂਕਿੰਗ ਵਿਚ ਦੂਜੇ ਸਥਾਨ ‘ਤੇ ਪਹੁੰਚ ਗਏ ਹਨ ਜਦਕਿ ਉਪ-ਕਪਤਾਨ ਸ਼ਿਖਰ ਧਵਨ 5ਵੇਂ ਸਥਾਨ ‘ਤੇ ਆ ਗਏ ਹਨ। ਇਸ ਤਰ੍ਹਾਂ ਰੈਂਕਿੰਗ ਵਿਚ ਚੋਟੀ 5 ਸਥਾਨਾਂ ‘ਤੇ 3 ਭਾਰਤੀ ਬੱਲੇਬਾਜ਼ ਸ਼ਾਮਲ ਹਨ। ਇਸ ਟੂਰਨਾਮੈਂਟ ਤੋਂ ਆਰਾਮ ਕਰਨ ਵਾਲੇ ਰੈਗੁਲਰ ਕਪਤਾਨ ਵਿਰਾਟ ਕੋਹਲੀ ਪਹਿਲੇ ਸਥਾਨ ‘ਤੇ ਬਣੇ ਹੋਏ ਹਨ। ਆਈ. ਸੀ. ਸੀ. ਦੀ ਬੱਲੇਬਾਜ਼ੀ ਰੈਂਕਿੰਗ ਵਿਚ ਚੋਟੀ 2 ਸਥਾਨਾਂ ‘ਤੇ ਭਾਰਤੀ ਖਿਡਾਰੀਆਂ ਦਾ ਕਬਜਾ ਹੋ ਗਿਆ ਹੈ। ਰੋਹਿਤ ਲਈ ਇਹ ਦੂਜੀ ਵਾਰ ਹੈ ਜਦੋਂ ਉਹ ਰੈਂਕਿੰਗ ਵਿਚ ਦੂਜੇ ਸਥਾਨ ‘ਤੇ ਪਹੁੰਚੇ ਹਨ। ਇਸ ਤੋਂ ਪਹਿਲਾਂ ਰੋਹਿਤ ਜੁਲਾਈ ਵਿਚ ਵੀ ਦੂਜੇ ਸਥਾਨ ‘ਤੇ ਪਹੁੰਚੇ ਸੀ। ਰੋਹਿਤ ਏਸ਼ੀਆ ਕੱਪ ਵਿਚ 317 ਦੌੜਾਂ ਬਣਾ ਕੇ ਟੂਰਨਾਮੈਂਟ ਵਿਚ ਸਭ ਤੋਂ ਵਧ ਦੌੜਾਂ ਬਣਾਉਣ ਵਾਲੇ ਬੱਲੇਬਾਜ਼ਾਂ ਵਿਚ ਦੂਜੇ ਸਥਾਨ ‘ਤੇ ਸੀ। ਭਾਰਤ ਨੇ ਫਾਈਨਲ ਵਿਚ ਬੰਗਲਾਦੇਸ਼ ਨੂੰ 3 ਵਿਕਟ ਹਰਾ ਕੇ 7ਵੀਂ ਵਾਰ ਏਸ਼ੀਆ ਕੱਪ ਜਿੱਤਿਆ ਸੀ। ਟੂਰਨਾਮੈਂਟ ਵਿਚ ਸਭ ਤੋਂ ਵਧ 342 ਦੌੜਾਂ ਬਣਾਉਣ ਵਾਲੇ ਸ਼ਿਖਰ ਧਵਨ 4 ਸਥਾਨਾਂ ਦੇ ਸੁਧਾਰ ਦੇ ਨਾਲ 5ਵੇਂ ਨੰਬਰ ‘ਤੇ ਪਹੁੰਚ ਗਏ ਹਨ। ਭਾਰਤ ਦੇ ਦੋਵੇਂ ਸਲਾਮੀ ਬੱਲੇਬਾਜ਼ ਰੋਹਿਤ ਅਤੇ ਸ਼ਿਖਰ ਅਫਗਾਨਿਸਤਾਨ ਖਿਲਾਫ ਆਪਣੇ ਆਖਰੀ ਸੁਪਰ-4 ਮੈਚ ਵਿਚ ਨਹੀਂ ਖੇਡੇ ਸੀ ਜੋ ਟਾਈ ਰਿਹਾ ਸੀ। ਸ਼ਿਖਰ ਨੇ ਟੂਰਨਾਮੈਂਟ ਵਿਚ 2 ਸੈਂਕੜੇ ਅਤੇ ਰੋਹਿਤ ਨੇ 1 ਸੈਂਕੜਾ ਲਗਾਇਆ ਸੀ।