ਵਾਰਾਨਸੀ ਵਾਂਗ ਕੇਰਲ ਵੀ ਮੈਨੂੰ ਪਿਆਰਾ: ਮੋਦੀ

ਗੁਰੂਵਯੂਰ – ਭਗਵਾਂ ਪਾਰਟੀ ’ਚ ਮੁੜ ਭਰੋਸਾ ਜਤਾਉਣ ਲਈ ਵੋਟਰਾਂ ਦਾ ਧੰਨਵਾਦ ਕਰਦਿਆਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸ਼ਨਿਚਰਵਾਰ ਨੂੰ ਕਿਹਾ ਕਿ ਸਿਆਸੀ ਪਾਰਟੀਆਂ ਅਤੇ ਮਾਹਿਰ ਲੋਕ ਸਭਾ ਚੋਣਾਂ ਤੋਂ ਪਹਿਲਾਂ ਲੋਕਾਂ ਦਾ ਰੌਂਅ ਪੜ੍ਹਨ ’ਚ ਨਾਕਾਮ ਰਹੇ। ਦੂਜੀ ਵਾਰ ਲਗਾਤਾਰ ਸੱਤਾ ’ਚ ਆਉਣ ਮਗਰੋਂ ਸ੍ਰੀ ਮੋਦੀ ਨੇ ਕਿਹਾ ਕਿ ਪਾਰਟੀ ਦਾ ਇਕ ਵੀ ਸੰਸਦ ਮੈਂਬਰ ਨਾ ਜਿੱਤਣ ਦੇ ਬਾਵਜੂਦ ਉਹ ਕੇਰਲ ਦਾ ਦੌਰਾ ਕਰ ਰਹੇ ਹਨ ਕਿਉਂਕਿ ਉਨ੍ਹਾਂ ਨੂੰ ਕੇਰਲ ਆਪਣੇ ਹਲਕੇ ਵਾਰਾਨਸੀ (ਯੂਪੀ) ਵਾਂਗ ਪਿਆਰਾ ਹੈ। ‘ਜਿਨ੍ਹਾਂ ਸਾਨੂੰ ਜਿਤਾਇਆ ਅਤੇ ਜਿਹੜੇ ਲੋਕਾਂ ਨੇ ਸਾਨੂੰ ਵੋਟ ਨਹੀਂ ਦਿੱਤੇ, ਉਹ ਸਾਰੇ ਸਾਡੇ ਆਪਣੇ ਹਨ।’ ਹੁਣੇ ਜਿਹੇ ਮੁਕੰਮਲ ਹੋਈਆਂ ਲੋਕ ਸਭਾ ਚੋਣਾਂ ਨੂੰ ‘ਜਮਹੂਰੀਅਤ ਦਾ ਤਿਓਹਾਰ’ ਕਰਾਰ ਦਿੰਦਿਆਂ ਸ੍ਰੀ ਮੋਦੀ ਨੇ ਕੇਰਲ ਦੇ ਵੋਟਰਾਂ ਵੱਲੋਂ ਇਸ ’ਚ ਪਾਏ ਯੋਗਦਾਨ ਦੀ ਸ਼ਲਾਘਾ ਕੀਤੀ ਅਤੇ ਉਨ੍ਹਾਂ ਦਾ ਧੰਨਵਾਦ ਕੀਤਾ। ਇਸ ਤੋਂ ਪਹਿਲਾਂ ਉਨ੍ਹਾਂ ਮਸ਼ਹੂਰ ਭਗਵਾਨ ਕ੍ਰਿਸ਼ਨ ਦੇ ਮੰਦਰ ’ਚ ਪ੍ਰਾਰਥਨਾ ਕੀਤੀ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਲੋਕਾਂ ਨੇ 2019 ਦੀਆਂ ਲੋਕ ਸਭਾ ਚੋਣਾਂ ਦੌਰਾਨ ਨਾਂਹਪੱਖੀ ਹੁੰਗਾਰੇ ਨੂੰ ਰੱਦ ਕਰਕੇ ਹਾਂ ਪੱਖੀ ਸੋਚ ਨੂੰ ਸਵੀਕਾਰ ਕੀਤਾ। ਉਨ੍ਹਾਂ ਨਵੇਂ ਭਾਰਤ ਦੇ ਨਿਰਮਾਣ ਲਈ ਰਲ ਕੇ ਕੰਮ ਕਰਨ ਦਾ ਸੱਦਾ ਦਿੱਤਾ।