2020 ਚੋਣਾਂ ਲਈ ਟਰੰਪ ਨਵਾਂ ਜੰਗੀ ਖੇਤਰ ਕਰ ਰਹੇ ਹਨ ਤਿਆਰ

ਵਾਸ਼ਿੰਗਟਨ – ਰੂਸ ਅਤੇ ਚੀਨ ਤੋਂ ਮਿਲ ਰਹੇ ਖਤਰੇ ਅਤੇ ਦੁਸ਼ਮਣੀ ਦੇ ਮੱਦੇਨਜ਼ਰ ਵ੍ਹਾਈਟ ਹਾਊਸ ਨੇ ਵੀਰਵਾਰ ਨੂੰ ਇਕ ਨਵੀਂ ਰਣ-ਖੇਤਰ (ਜੰਗੀ ਮੈਦਾਨ) ਦੀ ਫੌਜ ਬਣਾਉਣ ਦਾ ਐਲਾਨ ਕੀਤਾ ਹੈ। ਅਮਰੀਕਾ ਨੇ 2020 ਤੱਕ ਯੂ. ਐੱਸ. ਸਪੇਸ ਫੋਰਸ ਬਣਾਉਣ ਦਾ ਫੈਸਲਾ ਕੀਤਾ ਹੈ। ਇਹ ਨਵੀਂ ਸੇਵਾ ਅਮਰੀਕਾ ਦੀ ਬਾਕੀ ਫੌਜ ਤੋਂ ਵੱਖਰੀ ਹੋਵੇਗੀ ਅਤੇ ਇਹ ਅਮਰੀਕਾ ਦੀ 6ਵੀਂ ਫੌਜੀ ਸੇਵਾ ਹੋਵੇਗੀ। ਉਂਝ ਵੀ ਅਮਰੀਕੀ ਲੋਕਾਂ ਦਾ ਸਪੇਸ ਪ੍ਰੇਮ ਜਗਜਾਹਿਰ ਹੈ ਅਤੇ ਹਾਲੀਵੁੱਡ ਸਪੇਸ ਵਾਰ ਦੇ ਟਾਪਿਕ ‘ਤੇ ਅਰਸੇ ਤੋਂ ਫਿਲਮ ਬਣਾਉਂਦਾ ਆ ਰਿਹਾ ਹੈ। ਹਾਲਾਂਕਿ ਟਰੰਪ ਪ੍ਰਸ਼ਾਸਨ ਦੇ ਇਸ ਫੈਸਲੇ ਦੇ ਸਾਹਮਣੇ ਕਈ ਚੁਣੌਤੀਆਂ ਵੀ ਹਨ। ਇਸ ਨਵੀਂ ਫੋਰਸ ਨੂੰ ਅਜੇ ਅਮਰੀਕੀ ਕਾਂਗਰਸ (ਅਮਰੀਕੀ ਸੰਸਦ) ਦੀ ਇਜਾਜ਼ਤ ਦੀ ਜ਼ਰੂਰਤ ਹੈ। ਅਮਰੀਕਾ ਦੇ ਉਪ-ਰਾਸ਼ਟਰਪਤੀ ਮਾਈਕ ਪੇਂਸ ਨੇ ਪੇਂਟਾਗਨ ਦੀ ਇਕ ਸਪੀਚ ਦੌਰਾਨ ਇਸ ਨਵੀਂ ਫੋਰਸ ਬਣਾਉਣ ਦਾ ਐਲਾਨ ਕੀਤਾ। ਉਨ੍ਹਾਂ ਆਖਿਆ ਕਿ ਰਾਸ਼ਟਰਪਤੀ ਟਰੰਪ ਨੇ ਸਪੇਸ ‘ਚ ਵੀ ਅਮਰੀਕੀ ਹਕੂਮਤ ਨੂੰ ਯਕੀਨਨ ਕਰਨ ਦਾ ਫੈਸਲਾ ਕੀਤਾ ਹੈ। ਪੇਂਸ ਨੇ ਅੱਗੇ ਆਖਿਆ ਕਿ ਹੁਣ ਸਮਾਂ ਆ ਗਿਆ ਹੈ ਕਿ ਆਪਣੇ ਫੌਜੀ ਇਤਿਹਾਸ ‘ਚ ਇਕ ਹੋਰ ਮਹਾਨ ਅਧਿਆਇ ਲਿੱਖਿਆ ਜਾਵੇ। ਪੇਂਸ ਨੇ ਆਖਿਆ ਕਿ ਹੁਣ ਨਵੀਂ ਯੁੱਧ ਭੂਮੀ ਲਈ ਤਿਆਰੀ ਦੀ ਜ਼ਰੂਰਤ ਹੈ ਤਾਂ ਜੋਂ ਉਥੇ ਸਾਡੇ ਲੋਕਾਂ ਅਤੇ ਦੇਸ਼ ਨੂੰ ਮਿਲ ਰਹੇ ਖਤਰਿਆਂ ਨਾਲ ਨਜਿੱਠਿਆ ਜਾਵੇ। ਟਰੰਪ ਨੇ ਪੇਂਸ ਦੇ ਐਲਾਨ ਤੋਂ ਬਾਅਦ ਟਵੀਟ ਕਰ ਲਿੱਖਿਆ ਕਿ ਸਪੇਸ ਫੋਰਸ ਆ ਰਹੀ ਹੈ।