ਟਰੰਪ ਤੇ ਮਾਈਕ ਪੇਂਸ ਨੇ ਕਈ ਧਾਰਮਿਕ ਨੇਤਾਵਾਂ ਨਾਲ ਕੀਤੀ ਪ੍ਰਾਰਥਨਾ

ਵਾਸ਼ਿੰਗਟਨ ਡੀ.ਸੀ – ਬੀਤੀ ਸਵੇਰ ਵ੍ਹਾਈਟ ਹਾਊਸ ਦੇ ਰੋਜ਼ ਗਾਰਡਨ ਤੋਂ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਉਪ ਰਾਸ਼ਟਰਪਤੀ ਮਾਈਕ ਪੇਂਸ ਨੇ ਧਾਰਮਿਕ ਨੇਤਾਵਾਂ ਨਾਲ ਪ੍ਰਾਰਥਨਾ ਕੀਤੀ ਅਤੇ ਧਾਰਮਿਕ ਆਜ਼ਾਦੀ ਨੂੰ ਜ਼ਰੂਰੀ ਮੰਨਿਆ। ਉਨ੍ਹਾਂ ਕਿਹਾ ਕਿ ਹਰੇਕ ਨਾਗਰਿਕ ਨੂੰ ਆਪਣੇ ਧਰਮ ਦੀਆਂ ਸਿੱਖਿਆਵਾਂ ਅਨੁਸਾਰ ਰਹਿਣ ਦਾ ਪੂਰਾ ਹੱਕ ਹੈ। ਰਾਸ਼ਟਰਪਤੀ ਨੇ ਕਿਹਾ,“ਇਸ ਵਿਰਾਸਤ ਨੂੰ ਬਚਾਉਣ ਲਈ ਮੇਰੇ ਪ੍ਰਸ਼ਾਸਨ ਨੇ ਧਾਰਮਿਕ ਆਜ਼ਾਦੀ ਦੀ ਜ਼ੋਰਦਾਰ ਢੰਗ ਨਾਲ ਰੱਖਿਆ ਕੀਤੀ ਹੈ ਅਤੇ ਹਰ ਸਾਲ ਨੈਸ਼ਨਲ ਦਿਵਸ ਫੇਰੀ ਮੌਕੇ ਵ੍ਹਾਈਟ ਹਾਊਸ ਵਿਚ ਨਾਸ਼ਤਾ ਹੁੰਦਾ ਹੈ। ਵ੍ਹਾਈਟ ਹਾਊਸ ਵਿਚ ਰਾਤ ਦੇ ਖਾਣੇ ਲਈ ਸੈਂਕੜੇ ਭਾਈਚਾਰਿਆਂ ਦੇ ਆਗੂਆਂ ਨੂੰ ਸੱਦਾ ਦਿੱਤਾ ਜਾਂਦਾ ਹੈ। ਇਸ ਮੌਕੇ ਉਨ੍ਹਾਂ ਨਿਊਜ਼ੀਲੈਂਡ ਅਤੇ ਸ਼੍ਰੀਲੰਕਾ ਵਿੱਚ ਹੋਏ ਅੱਤਵਾਦੀ ਹਮਲਿਆਂ ਦੀ ਨਿੰਦਾ ਕੀਤੀ। ਰਾਸ਼ਟਰਪਤੀ ਨੇ ਸਵੇਰੇ ਟਵੀਟ ਕੀਤਾ,”ਜਦੋਂ ਅਸੀਂ ਪ੍ਰਾਰਥਨਾ ਲਈ ਇਕਜੁੱਟ ਹੁੰਦੇ ਹਾਂ ਤਾਂ ਅਸੀਂ ਹਰ ਧਰਮ ਦੀ ਸੁਰੱਖਿਆ ਲਈ ਸਾਡੇ ਸੰਕਲਪਾਂ ਨੂੰ ਰੀਨਿਉੂ ਕਰਦੇ ਹਾਂ ਅਤੇ ਯਕੀਨੀ ਬਣਾਉਂਦੇ ਹਾਂ ਕਿ ਸਾਡੇ ਸਾਰੇ ਲੋਕ ਸ਼ਾਂਤੀ ਵਿੱਚ ਜਿਊਣ ਦੀ ਪ੍ਰਾਰਥਨਾ ਅਤੇ ਪੂਜਾ ਕਰ ਸਕਦੇ ਹਨ।”ਇਸ ਮੌਕੇ ਯਹੂਦੀ ਧਰਮ ਦੇ ਲੋਕ ਵੀ ਪੁੱਜੇ ਹੋਏ ਸਨ, ਜਿਨ੍ਹਾਂ ‘ਤੇ ਕੁਝ ਦਿਨ ਪਹਿਲਾਂ ਗੋਲੀਬਾਰੀ ਹੋਈ ਸੀ। ਮੁਸਲਿਮ ਭਾਈਚਾਰੇ ਦੀ ਪ੍ਰਤੀਨਿਧਤਾ ਮੈਰੀਲੈਡ ਦੇ ਇਕ ਪ੍ਰਮੁੱਖ ਲੀਡਰ ਸਾਜਿਦ ਤਰਾਰ ਨੇ ਕੀਤੀ ਸੀ ਜੋ ਟਰੰਪ ਲਈ ਮੁਸਲਮਾਨਾਂ ਦੇ ਮੋਢੀ ਸਨ ਅਤੇ 2016 ਦੀਆਂ ਰਾਸ਼ਟਰਪਤੀ ਚੋਣਾਂ ਵਿਚ ਟਰੰਪ ਮੁਹਿੰਮ ਵਿਚ ਅਹਿਮ ਭੂਮਿਕਾ ਨਿਭਾਉਂਦੇ ਸਨ। ਉਨ੍ਹਾਂ ਨੇ ਵੀ ਅੱਤਵਾਦੀ ਹਮਲਿਆਂ ਦੀ ਸਖਤ ਸ਼ਬਦਾਂ ‘ਚ ਨਿੰਦਾ ਕੀਤੀ।