ਤਲਾਕ ਮਾਮਲੇ ਦੀ ਸੁਣਵਾਈ ਲਈ ਪਟਨਾ ਪਹੁੰਚੇ ਤੇਜ ਪ੍ਰਤਾਪ

ਮਥੁਰਾ – ਬਿਹਾਰ ਦੇ ਸਾਬਕਾ ਮੁੱਖ ਮੰਤਰੀ ਲਾਲੂ ਪ੍ਰਸਾਦ ਦੇ ਪੁੱਤਰ ਅਤੇ ਸੂਬੇ ਦੇ ਸਾਬਕਾ ਸਿਹਤ ਮੰਤਰੀ ਤੇਜ ਪ੍ਰਤਾਪ ਯਾਦਵ ਕੁਝ ਦਿਨ ਤਕ ਬ੍ਰਿਜ ਖੇਤਰ ਵਿੱਚ ਰਹਿਣ ਮਗਰੋਂ ਪਟਨਾ ਵਾਪਿਸ ਆਏ ਹਨ| ਕਿਹਾ ਜਾ ਰਿਹਾ ਹੈ ਕਿ ਉਹ ਇਸ ਮਹੀਨੇ ਦੀ ਸ਼ੁਰੂਆਤ ਵਿਚ ਕੋਰਟ ਵਿੱਚ ਦਾਇਰ ਕੀਤੀ ਗਈ ਤਲਾਕ ਸਬੰਧੀ ਅਰਜ਼ੀ ਦੀ ਸੁਣਵਾਈ ਦੀ ਪ੍ਰਕਿਰਿਆ ਵਿਚ ਸ਼ਾਮਿਲ ਹੋਣਗੇ| ਜ਼ਿਕਰਯੋਗ ਹੈ ਕਿ ਵਿਆਹ ਦੇ ਸਿਰਫ 6 ਮਹੀਨੇ ਬਾਅਦ ਤੇਜ ਪ੍ਰਤਾਪ ਨੇ ਬੀਤੀ 1 ਨਵੰਬਰ ਨੂੰ ਤਲਾਕ ਦੀ ਅਰਜ਼ੀ ਦਾਇਰ ਕੀਤੀ ਸੀ ਅਤੇ ਉਸ ਤੋਂ ਬਾਅਦ ਉਹ ਕੁਝ ਤੀਰਥ ਸਥਾਨਾਂ ਦੀ ਯਾਤਰਾ ਕਰਨ ਮਗਰੋਂ ਆਪਣੇ ਅੱਧਾ ਦਰਜਨ ਦੋਸਤਾਂ ਦੀ ਮੰਡਲੀ ਨਾਲ 6 ਨਵੰਬਰ ਨੂੰ ਅਚਾਨਕ ਵਰਿੰਦਾਵਨ ਪਹੁੰਚੇ ਸਨ| ਇੱਥੇ ਠਹਿਰਣ ਦੌਰਾਨ ਉਨ੍ਹਾਂ ਨੇ ਆਪਣਾ ਪੂਰਾ ਸਮਾਂ ਗੈਸਟ ਹਾਊਸ ਵਿੱਚ ਬਿਤਾਇਆ ਜਾਂ ਫਿਰ ਵੱਖ-ਵੱਖ ਤੀਰਥ ਸਥਾਨਾਂ ਦੀ ਯਾਤਰਾ ਕਰਦੇ ਰਹੇ ਪਰ ਮੀਡੀਆ ਤੋਂ ਪੂਰੀ ਤਰ੍ਹਾਂ ਦੂਰੀ ਬਣਾ ਕੇ ਰੱਖੀ| ਇਸ ਦੌਰਾਨ ਉਨ੍ਹਾਂ ਨੇ ਬਿਹਾਰ ਵਨ ਗਊਸ਼ਾਲਾ ਵਿਚ ਗਊਆਂ ਨਾਲ ਸਮਾਂ ਬਿਤਾਇਆ| ਚਮੇਲੀ ਵਨ, ਵਰਿੰਦਾਦੇਵੀ, ਨੰਦਭਵਨ, ਗਹਵਰ ਵਨ, ਪ੍ਰਿਆ ਕੁੰਡ, ਸੂਰਈਆ ਕੁੰਡ, ਗੋਕੁਲ, ਮਹਾਵਨ, ਦਾਊਜੀ ਆਦਿ ਦੇ ਦਰਸ਼ਨ ਕੀਤੇ| ਤੇਜ ਪ੍ਰਤਾਪ ਦੇ ਮਿੱਤਰ ਨੇ ਉਮੀਦ ਜ਼ਾਹਿਰ ਕੀਤੀ ਹੈ ਕਿ ਉਹ ਮਾਮਲੇ ਦੀ ਪੈਰਵੀ ਕਰਨ ਤੋਂ ਬਾਅਦ ਆਪਣੇ ਸਿਆਸੀ ਜੀਵਨ ਵਿਚ ਪਰਤ ਆਉਣਗੇ| ਉਨ੍ਹਾਂ ਨੇ ਇਹ ਵੀ ਸੰਭਾਵਨਾ ਜ਼ਾਹਰ ਕੀਤੀ ਹੈ ਕਿ ਉਹ ਬਿਹਾਰ ਵਿਧਾਨ ਸਭਾ ਦੇ ਸਰਦ ਰੁੱਤ ਸੈਸ਼ਨ ਵਿੱਚ ਹਿੱਸਾ ਲੈਣਗੇ ਅਤੇ ਖੇਤਰੀ ਜਨਤਾ ਦੇ ਹਿੱਤਾਂ ਦੇ ਮੁੱਦੇ ਚੁੱਕਦੇ ਹੋਏ ਨਜ਼ਰ ਆਉਣਗੇ|