ਆਸੀਆ ਨੂੰ ਆਖ਼ਿਰ ਮਿਲਿਆ ਇਨਸਾਫ਼

ਇਸਲਾਮਾਬਾਦ – ਪਾਕਿਸਤਾਨੀ ਸੁਪਰੀਮ ਕੋਰਟ ਨੇ ਅੱਜ ਮਿਸਾਲੀ ਫ਼ੈਸਲਾ ਸੁਣਾਉਂਦਿਆਂ ਕੁਫ਼ਰ ਤੋਲਣ (ਈਸ਼ ਨਿੰਦਾ) ਦੇ ਮਾਮਲੇ ਵਿਚ ਨਾਮਜ਼ਦ ਇਕ ਈਸਾਈ ਔਰਤ ਨੂੰ ਬਰੀ ਕਰ ਦਿੱਤਾ। ਚਾਰ ਬੱਚਿਆਂ ਦੀ ਮਾਂ ਆਸੀਆ ਬੀਬੀ (47) ਨੂੰ ਸਾਲ 2010 ਵਿਚ ਇਸ ਮਾਮਲੇ ਵਿਚ ਦੋਸ਼ੀ ਠਹਿਰਾਇਆ ਗਿਆ ਸੀ। ਆਸੀਆ ’ਤੇ ਗੁਆਂਢੀਆ ਨਾਲ ਹੋਏ ਇਕ ਝਗੜੇ ਵਿਚ ਇਸਲਾਮ ਦਾ ਨਿਰਾਦਰ ਕਰਨ ਦੇ ਦੋਸ਼ ਲਾਏ ਗਏ ਸਨ। ਉਸ ਨੇ ਹਮੇਸ਼ਾ ਖ਼ੁਦ ਨੂੰ ਬੇਗੁਨਾਹ ਦੱਸਿਆ, ਪਰ ਫਿਰ ਵੀ ਕਰੀਬ ਅੱਠ ਸਾਲ ਉਸ ਨੂੰ ਏਕਾਂਤ ’ਚ ਬੰਦੀ ਵਜੋਂ ਬਿਤਾਉਣੇ ਪਏ। ਚੀਫ਼ ਜਸਟਿਸ ਸਾਕਿਬ ਨਿਸਾਰ ਦੀ ਅਗਵਾਈ ਵਾਲੇ ਤਿੰਨ ਮੈਂਬਰੀ ਬੈਂਚ ਨੇ ਫ਼ੈਸਲੇ ਬਾਰੇ ਤਿੰਨ ਹਫ਼ਤੇ ਪਹਿਲਾਂ ਹੀ ਸਹਿਮਤੀ ਬਣਾ ਲਈ ਸੀ, ਪਰ ਕਾਨੂੰਨ ਦੇ ਹਮਾਇਤੀਆਂ ਵਲੋਂ ਪ੍ਰਦਰਸ਼ਨਾਂ ਦੇ ਡਰ ਕਾਰਨ ਅੱਜ ਫ਼ੈਸਲਾ ਸੁਣਾਇਆ ਗਿਆ। ਸਿਖਰਲੀ ਅਦਾਲਤ ਨੇ ਕਿਹਾ ਕਿ ਆਸੀਆ ਬੀਬੀ ਖ਼ਿਲਾਫ਼ ਇਸਤਗਾਸਾ ਪੱਖ ਵਲੋਂ ਪੇਸ਼ ਕੀਤੇ ਗਏ ਸਬੂਤ ਨਾਕਾਫ਼ੀ ਹਨ। ਚੀਫ਼ ਜਸਟਿਸ ਨੇ ਕਿਹਾ ਕਿ ‘ਇਸਲਾਮ ਦਾ ਮੁੱਢਲਾ ਸਿਧਾਂਤ ਹੀ ਸਹਿਣਸ਼ੀਲਤਾ ਹੈ’ ਅਤੇ ਬੀਬੀ ਸ਼ੇਖੂਪੁਰਾ ਜੇਲ੍ਹ ਵਿਚੋਂ ਹੁਣ ਆਪਣੇ ਘਰ ਜਾ ਸਕਦੀ ਹੈ। ਫ਼ੈਸਲੇ ਤੋਂ ਬਾਅਦ ਪਾਕਿਸਤਾਨ ਦੇ ਕਈ ਹਿੱਸਿਆਂ ਵਿਚ ਰੋਸ ਮੁਜ਼ਾਹਰੇ ਕੀਤੇ ਗਏ ਹਨ। ਇਸੇ ਦੌਰਾਨ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖ਼ਾਨ ਨੇ ਕੱਟੜਪੰਥੀਆਂ ਨੂੰ ਚਿਤਾਵਨੀ ਦਿੱਤੀ ਹੈ ਉਹ ਇਸ ਮੁੱਦੇ ’ਤੇ ਰਾਜ ਨਾਲ ਮੱਥਾ ਨਾ ਲਾਉਣ।