ਮੇਰੀ ਗੇਂਦਬਾਜ਼ੀ ਦਾ ਤਰੀਕਾ ਲਿਓਨ ਤੋਂ ਵੱਖਰਾ : ਅਸ਼ਵਿਨ

ਸਿਡਨੀ- ਭਾਰਤੀ ਆਫ ਸਪਿਨਰ ਰਵੀਚੰਦਰਨ ਅਸ਼ਵਿਨ ਨੇ ਕਿਹਾ ਹੈ ਕਿ ਉਹ ਆਸਟਰੇਲੀਆਈ ਖਿਡਾਰੀ ਨਾਥਨ ਲਿਓਨ ਦੀ ਗੇਂਦਬਾਜ਼ੀ ਤੋਂ ਕਾਫੀ ਪ੍ਰਭਾਵਿਤ ਹੈ ਪਰ ਉਸ ਦੇ ਐਕਸ਼ਨ ਦੀ ਨਕਲ ਕਰਨਾ ਮੂਰਖਤਾ ਹੋਵੇਗੀ। ਕ੍ਰਿਕਟ ਆਸਟਰੇਲੀਆ ਇਲੈਵਨ ਖਿਲਾਫ ਸਿਡਨੀ ਕ੍ਰਿਕਟ ਗਰਾਊਂਡ ‘ਤੇ ਚੱਲ ਰਹੇ ਅਭਿਆਸ ਮੈਚ ਦੇ ਤੀਜੇ ਦਿਨ ਦੀ ਖੇਡ ਦੀ ਸਮਾਪਤੀ ਤੋਂ ਬਾਅਦ ਅਸ਼ਵਿਨ ਨੇ ਕਿਹਾ ਕਿ ਉਹ ਆਸਟਰੇਲੀਆਈ ਸਪਿਨਰ ਲਿਓਨ ਨੂੰ ਕਾਫ਼ੀ ਪਸੰਦ ਕਰਦਾ ਹੈ ਪਰ ਸਾਰਿਆਂ ਦਾ ਗੇਂਦਬਾਜ਼ੀ ਕਰਨ ਦਾ ਤਰੀਕਾ ਵੱਖਰਾ ਹੁੰਦਾ ਹੈ ਅਤੇ ਇਸ ਦੀ ਨਕਲ ਕਰਨਾ ਮੂਰਖਤਾ ਹੋਵੇਗੀ । ਲਿਓਨ ਨੂੰ ਰਸਮੀ ਤਰੀਕੇ ਨਾਲ ਗੇਂਦਬਾਜ਼ੀ ਕਰਨ ਅਤੇ ਉਸ ਦੀਆਂ ਓਵਰ ਸਪਿਨ ਗੇਂਦਾਂ ਲਈ ਜਾਣਿਆ ਜਾਂਦਾ ਹੈ, ਜੋ ਆਸਟਰੇਲੀਆ ਦੀਆਂ ਉਛਾਲ ਭਰੀਆਂ ਪਿੱਚਾਂ ‘ਤੇ ਕਾਫੀ ਕਾਰਗਰ ਸਾਬਤ ਹੁੰਦੀਆਂ ਹਨ, ਜਦਕਿ ਅਸ਼ਵਿਨ ਜ਼ਿਆਦਾਤਰ ਉਪ-ਮਹਾਦੀਪਾਂ ਦੀਆਂ ਪਿੱਚਾਂ ਦੇ ਹਿਸਾਬ ਨਾਲ ਗੇਂਦਬਾਜ਼ੀ ਕਰਦਾ ਹੈ। ਦੋਵਾਂ ਨੇ ਲਗਭਗ ਇਕੋ ਸਮੇਂ ਆਪਣਾ ਟੈਸਟ ਕਰੀਅਰ ਸ਼ੁਰੂ ਕੀਤਾ ਸੀ ਅਤੇ ਉਨ੍ਹਾਂ ਦੀ ਤੁਲਨਾ ਵੀ ਅਕਸਰ ਹੁੰਦੀ ਰਹਿੰਦੀ ਹੈ ।