ਸਟਿਮਕ ਨੂੰ ਸੌ ਫ਼ੀਸਦੀ ਸਹਿਯੋਗ ਦੇਵਾਂਗੇ: ਛੇਤਰੀ

ਕਪਤਾਨ ਸੁਨੀਲ ਛੇਤਰੀ ਦੀ ਅਗਵਾਈ ਵਾਲੀ ਭਾਰਤੀ ਫੁਟਬਾਲ ਟੀਮ ਨੇ ਅੱਜ ਨਵੇਂ ਕੋਚ ਇਗੋਰ ਸਟਿਮਕ ਦਾ ਸਵਾਗਤ ਕਰਦੇ ਹੋਏ ਕਿਹਾ ਕਿ ਉਹ ਮੈਦਾਨ ’ਤੇ ਉਨ੍ਹਾਂ ਦੇ ਮਾਰਗਦਰਸ਼ਨ ਵਿੱਚ ਆਪਣਾ ਸੌ ਫ਼ੀਸਦੀ ਸਹਿਯੋਗ ਦੇਣ ਲਈ ਵਚਨਬੱਧ ਹਨ।ਸਟਿਮਕ ਕ੍ਰੋਏਸ਼ੀਆ ਦੀ 1998 ਵਿਸ਼ਵ ਕੱਪ ਟੀਮ ਦਾ ਹਿੱਸਾ ਸੀ ਜੋ ਫਰਾਂਸ ਵਿੱਚ ਤੀਜੇ ਸਥਾਨ ’ਤੇ ਰਹੀ ਸੀ। 51 ਸਾਲਾ ਸਟਿਮਕ ਨੂੰ ਬੁੱਧਵਾਰ ਨੂੰ ਅਧਿਕਾਰਤ ਤੌਰ ’ਤੇ ਭਾਰਤੀ ਟੀਮ ਦਾ ਮੁੱਖ ਕੋਚ ਨਿਯੁਕਤ ਕੀਤਾ ਗਿਆ। ਉਸ ਨੂੰ ਕੋਚਿੰਗ ਵਿੱਚ 18 ਸਾਲਾਂ ਦਾ ਤਜ਼ਰਬਾ ਹੈ। ਉਸ ਦੀ ਵੱਡੀ ਉਪਲਬਧੀਆਂ ਵਿੱਚ ਕ੍ਰੋਏਸ਼ੀਆ ਨੂੰ ਬ੍ਰਾਜ਼ੀਲ ਵਿੱਚ 2014 ਫੀਫਾ ਵਿਸ਼ਵ ਕੱਪ ਫਾਈਨਲਜ਼ ਤੱਕ ਪਹੁੰਚਾਉਣਾ ਸ਼ਾਮਲ ਹੈ। ਛੇਤਰੀ ਨੇ ਸਟਿਮਕ ਦੀ ਨਿਯੁਕਤੀ ਤੋਂ ਬਾਅਦ ਟਵੀਟ ਕੀਤਾ ਸੀ,‘‘ਮੈ ਕੌਮੀ ਟੀਮ ਦੇ ਕੋਚ ਦੇ ਤੌਰ ’ਤੇ ਇਗੋਰ ਸਟਿਮਕ ਦੀ ਨਿਯੁਕਤੀ ਦਾ ਸਵਾਗਤ ਕਰਨਾ ਚਾਹਾਂਗਾ। ਉਨ੍ਹਾਂ ਕੋਲ ਫੁਟਬਾਲ ਦੇ ਵੱਡੇ ਮੰਚ ’ਤੇ ਕੋਚਿੰਗ ਦਾ ਵੱਡਾ ਤਜ਼ਰਬਾ ਹੈ। ਸਾਨੂੰ ਵੀ ਇਸ ਤੋਂ ਫਾਇਦਾ ਮਿਲੇਗਾ।’’ਉਨ੍ਹਾਂ ਕਿਹਾ ਕਿ ਇਹ ਇਕ ਪ੍ਰਕਿਰਿਆ ਹੈ ਅਤੇ ਉਹ ਸੌ ਫ਼ੀਸਦੀ ਤੋਂ ਥੋੜਾ ਜਿਹਾ ਵੀ ਘੱਟ ਨਹੀਂ ਦੇਣਗੇ। ਉਸ ਨੇ ਕਿਹਾ ਕਿ ਉਸ ਨੇ ਕੌਮੀ ਟੀਮ ਦੇ ਮੁੰਡਿਆਂ ਨਾਲ ਪਹਿਲਾਂ ਹੀ ਗੱਲ ਕਰ ਲਈ ਹੈ ਅਤੇ ਉਨ੍ਹਾਂ ਨੇ ਆਪਣੇ ਫਿੱਟਨੈੱਸ ’ਤੇ ਕੰਮ ਸ਼ੁਰੂ ਕਰ ਦਿੱਤਾ ਹੈ ਕਿਉਂਕਿ ਉਨ੍ਹਾਂ ਨੂੰ ਜਲਦੀ ਅੱਗੇ ਦੀ ਪ੍ਰਕਿਰਿਆ ਢਲਣਾ ਹੋਵੇਗਾ।